മുംബൈ: ക്രിക്കറ്റിന്റെ എല്ലാ ഫോര്മാറ്റുകളില്നിന്നും വിരമിച്ച് ഇന്ത്യന് താരം അജിന്ക്യ രഹാനെ. വ്യാഴാഴ്ച ഇന്സ്റ്റഗ്രാമില് പങ്കുവച്ച വിഡിയോയിലാണ് രഹാനെ കരിയര് അവസാനിപ്പിക്കുന്നതായി പ്രഖ്യാപിച്ചത്.
ഇന്ത്യയ്ക്കായി 85 ടെസ്റ്റുകളും 90 ഏകദിനങ്ങളും 20 ട്വന്റി20 മത്സരങ്ങളും കളിച്ച രഹാനെ, 8414 റണ്സ് സ്കോര് ചെയ്തിട്ടുണ്ട്. ടെസ്റ്റില് 12 സെഞ്ചറികളും 26 അര്ധ സെഞ്ചറികളും സ്വന്തമാക്കി. ഏകദിനത്തില് മൂന്ന് സെഞ്ചറികളും 24 അര്ധ സെഞ്ചറികളുമുണ്ട്.
2023 ജൂലൈയില് വെസ്റ്റിന്ഡീനെതിരായ ടെസ്റ്റ് പരമ്പരയിലാണ് താരം ഇന്ത്യന് ജഴ്സിയില് അവസാനമായി കളിച്ചത്. ആഭ്യന്തര ക്രിക്കറ്റില് മുംബൈയുടെ താരമാണ്. 2020-21 ബോര്ഡര് ഗാവസ്കര് ട്രോഫിയില് പരുക്കില് വലഞ്ഞ ഇന്ത്യന് ടീം ഓസ്ട്രേലിയന് മണ്ണില് 21ന് വിജയിച്ചപ്പോള് രഹാനെയായിരുന്നു ടീം ക്യാപ്റ്റന്. ഇന്ത്യയ്ക്കായി കളിക്കുകയെന്നതായിരുന്നു തന്റെ എക്കാലത്തെയും വലിയ സ്വപ്നമെന്ന് രഹാനെ ഇന്സ്റ്റഗ്രാം വിഡിയോയില് പ്രതികരിച്ചു.
''എല്ലാ കാര്യത്തിനും ഒരു തുടക്കവും അവസാനവുമുണ്ടാകുമെന്നതാണു സത്യം. സമയം വരുമ്പോള് അത് അംഗീകരിച്ചു മുന്നോട്ടു പോകുകയാണു വേണ്ടത്. ടൈമിംഗ് എന്നത് എത്രത്തോളം പ്രധാനപ്പെട്ടതാണെന്നു മനസിലാക്കിയാണ് ഞാന് ബാറ്റു ചെയ്തത്. മുന്നോട്ടു പോകാനുള്ള സമയമായെന്ന് മനസ്സിലാക്കി ഇന്ന് രാജ്യാന്തര ക്രിക്കറ്റില്നിന്നും എല്ലാ ഫോര്മാറ്റുകളില്നിന്നും ഞാന് വിരമിക്കല് പ്രഖ്യാപിക്കുകയാണ്. കഴിഞ്ഞ 20 വര്ഷമായി ഇന്ത്യന് ക്രിക്കറ്റിന്റെ വളര്ച്ചയുടെ ഭാഗമാകാന് സാധിച്ചതില് എനിക്ക് അഭിമാനമുണ്ട്. പക്ഷേ ക്രിക്കറ്റിനൊപ്പമുള്ള എന്റെ യാത്ര അവസാനിക്കുന്നില്ല.
ക്രിക്കറ്റില് വിജയവും തോല്വിയും ഞാന് നേരിട്ടിട്ടുണ്ട്. എന്നാല് തോല്ക്കാത്ത ഒരേയൊരിടം നിങ്ങളുടെ ഹൃദയത്തിലാണ്. ആരാധകരുടെ സ്നേഹത്തിനും കരുതലിനും നന്ദിയുണ്ട്. എന്നെ പിന്തുണച്ച ബി.സി.സി.ഐയ്ക്കും മഹാരാഷ്ട്ര ക്രിക്കറ്റ് അസോസിയേഷനും കുടുംബത്തിനും നന്ദി അറിയിക്കുകയാണ്. ക്യാപ് നമ്പര് 278 സൈനിങ് ഓഫ്.''-രഹാനെ പറഞ്ഞു.
തോല്വി അറിയാതെ നയിച്ച ക്യാപ്റ്റന്
ഇന്ത്യന് ക്രിക്കറ്റിലെ വെറ്ററന് താരങ്ങളിലൊരാളായ അജിന്ക്യ രഹാനെ ഇന്ത്യയെ തോല്വി അറിയാതെ നയിച്ച ക്യാപ്റ്റനാണ്. ടെസ്റ്റ്, ഏകദിന ഫോര്മാറ്റുകളില് ക്യാപ്റ്റനെന്ന നിലയില് തോല്വി വഴങ്ങാതെയാണ് രഹാനെ കരിയര് അവസാനിപ്പിക്കുന്നത്. 2020-21 ലെ ബോര്ഡര് ഗാവസ്കര് ട്രോഫിയിലാണ് ക്യാപ്റ്റന്സിയില് രഹാനെയുടെ ബ്രില്യന്സിനു രാജ്യം സാക്ഷിയായത്. പരുക്കിന്റെ പിടിയിലായ ഇന്ത്യന് ടീമിനെ സ്ഥിരം ക്യാപ്റ്റന് വിരാട് കോലി കൈവിട്ടപ്പോള്, 21ന്റെ വീരോചിത വിജയം നേടിക്കൊടുക്കാന് നേതൃത്വം നല്കിയത് രഹാനെയുടെ മികവായിരുന്നു. പരമ്പര 21ന് വിജയിച്ച ഇന്ത്യ, ഗാബയില് ഓസ്ട്രേലിയയെ മുട്ടുകുത്തിച്ചും ചരിത്രമെഴുതി.
അഡ്ലെയ്ഡില് നടന്ന ഒന്നാം ടെസ്റ്റില് നാണം കെട്ട തോല്വി വഴങ്ങിയ ശേഷമാണ് പരമ്പരയില് ഇന്ത്യ തിരിച്ചുവരവ് നടത്തിയത്. മത്സരത്തിന്റെ രണ്ടാം ഇന്നിങ്സില് 36 റണ്സിന് ഓള്ഔട്ടായ ഇന്ത്യ ടെസ്റ്റില് ഏറ്റവും ചെറിയ ടോട്ടലെന്ന നാണക്കേടിന്റെ റെക്കോര്ഡുമായി, എട്ടു വിക്കറ്റ് തോല്വിയാണു വഴങ്ങിയത്. തോല്വിക്കു പിന്നാലെ ടീം ക്യാപ്റ്റന് വിരാട് കോലി നാട്ടിലേക്കു മടങ്ങുകയും ചെയ്തു. ഇതോടെയാണ് ക്യാപ്റ്റന് സ്ഥാനം രഹാനെയ്ക്കു ലഭിക്കുന്നത്. മെല്ബണില് നടന്ന രണ്ടാം ടെസ്റ്റില് സെഞ്ചറി നേടിയ രഹാനെ, ഇന്ത്യയ്ക്ക് എട്ടു വിക്കറ്റ് വിജയം നേടി പരമ്പര സമനിലയിലെത്തിച്ചു.
സിഡ്നിയില് നടന്ന മൂന്നാം ടെസ്റ്റില് അഞ്ചാം ദിനം വരെ പൊരുതിയ ഇന്ത്യ സമനിലയും പിടിച്ചെടുത്തു. ഗാബയില് നടന്ന നാലാം ടെസ്റ്റില് മത്സരത്തിന്റെ അവസാന ദിവസം 328 റണ്സ് വിജയലക്ഷ്യം ചേസ് ചെയ്തു വിജയിച്ച ഇന്ത്യ, 32 വര്ഷത്തിനിടെ ഓസ്ട്രേലിയയെ ഈ ഗ്രൗണ്ടിലെ ആദ്യ തോല്വിയിലേക്കു തള്ളിവിട്ടു.
രണ്ടാം വിജയത്തോടെ ഇന്ത്യ പരമ്പരയും സ്വന്തമാക്കുകയായിരുന്നു. 268 റണ്സാണ് രഹാനെ ഈ പരമ്പരയില് സ്കോര് ചെയ്തത്. മുഹമ്മദ് ഷമി, ഉമേഷ് യാദവ്, ജസ്പ്രീത് ബുമ്ര, രവീന്ദ്ര ജഡേജ, ആര്. അശ്വിന് തുടങ്ങിയ മുന്നിര താരങ്ങള്ക്കു പരുക്കേറ്റപ്പോഴും സമ്മര്ദത്തില് പെടാതെ, രഹാനെ ഇന്ത്യയുടെ തിരിച്ചടിക്കു നേതൃത്വം നല്കി.
ഇന്ത്യന് ക്രിക്കറ്റ് ടീമിന്റെ നേതൃനിരയില് കരിയറിന്റെ ഭൂരിഭാഗം സമയവും ഉണ്ടായിട്ടും, ഫുള് ടൈം ക്യാപ്റ്റനെന്ന ചുമതല രഹാനെയെ തേടിയെത്തിയില്ല. ക്യാപ്റ്റന് കളിക്കാതിരിക്കുമ്പോള് മാത്രമാണ് പകരക്കാരനായി രഹാനെയ്ക്കു ചുമതല നല്കിയിരുന്നത്. ആറു ടെസ്റ്റു മത്സരങ്ങളില് ടീമിനെ നയിച്ച രഹാനെ നാലെണ്ണം ജയിപ്പിച്ചു. രണ്ടു കളികള് സമനിലയിലായി. അഞ്ച് ടെസ്റ്റ് മത്സരങ്ങളിലെങ്കിലും ഇന്ത്യന് ടീമിനെ നയിച്ചിട്ടുള്ള ക്യാപ്റ്റന്മാരില്, ഉയര്ന്ന വിജയ ശരാശരിയുള്ളത് രഹാനെയ്ക്കാണ്. വിജയ ശരാശരിയില് വിരാട് കോലിക്കും മഹേന്ദ്ര സിങ് ധോണിക്കും രോഹിത് ശര്മയ്ക്കും മുകളിലാണു രഹാനെയുടെ സ്ഥാനം.
Comments