ലണ്ടന്: പ്രശസ്ത നേപ്പാളി-ബ്രിട്ടീഷ് പര്വതാരോഹകന് നിര്മല് പുര്ജ (43) പാകിസ്താനിലെ ബ്രോഡ് പീക്ക് പര്വതത്തിലുണ്ടായ മഞ്ഞുവീഴ്ചയില് കൊല്ലപ്പെട്ടു. കഴിഞ്ഞ 30 നാണ് പുര്ജ ഉള്പ്പെട്ട സംഘം ദുരന്തത്തില്പ്പെട്ടതെന്ന് അദ്ദേഹത്തിന്റെ സഹഉടമസ്ഥതയിലുള്ള പര്വതാരോഹക കമ്പനി 'എലൈറ്റ് എക്സ്പെഡ്' അറിയിച്ചു. സംഘവുമായി ബന്ധപ്പെടാന് കഴിഞ്ഞിട്ടില്ലെന്ന് പാകിസ്താനി പര്വതാരോഹണ അധികൃതരും അറിയിച്ചു. സംഘത്തിലുള്ള എല്ലാവരും മരിച്ചതായാണ് റിപ്പോര്ട്ട്. ആറ് നേപ്പാളി പര്വ്വതാരോഹകരും പാകിസ്താന്, ഒമാന്, അമേരിക്ക, ചൈന എന്നിവിടങ്ങളില് നിന്നുള്ള ഓരോരുത്തരും അടങ്ങുന്നതായിരുന്നു സംഘം.
'നിംസ് ദായ്' എന്ന പേരില് അറിയപ്പെടുന്ന, നേപ്പാളില് ജനിച്ച പുര്ജ മുന് ബ്രിട്ടീഷ് ആര്മി സൈനികനാണ്. 2019-ല് 189 ദിവസങ്ങള് കൊണ്ട് ലോകത്തിലെ ഏറ്റവും ഉയര്ന്ന 14 പര്വതശിഖരങ്ങള് കീഴടക്കിയാണ് അദ്ദേഹം ലോകശ്രദ്ധ നേടിയത്. അന്ന് ഇത് ലോക റെക്കോഡ് ആയിരുന്നു. അദ്ദേഹത്തിന്റെ ഈ അപൂര്വ്വ നേട്ടം '14 പീക്സ്: നത്തിങ് ഈസ് ഇംപോസിബിള്' എന്ന പേരില് നെറ്റ്ഫ്ളിക്സ് ഡോക്യുമെന്ററിയിലൂടെ പ്രദര്ശിപ്പിച്ചിരുന്നു. 2023 ലാണ് ഈ റെക്കോഡ് തകര്ന്നത്. ലോകത്തെ ഏറ്റവും ഉയരമുള്ള രണ്ടാമത്തെ കൊടുമുടിയായ കെ 2 ശൈത്യകാലത്ത് വിജയകരമായി കീഴടക്കിയ 10 അംഗ നേപ്പാളി സംഘത്തിലും പുര്ജ ഉണ്ടായിരുന്നു. 2021 ല് ആയിരുന്നു ഈ നേട്ടം. പൂര്ണസമയ പര്വ്വതാരോഹകനാകുന്നതിന് മുമ്പ് പുര്ജ ബ്രിട്ടന്റെ 'ബ്രിഗേഡ് ഓഫ് ഗൂര്ഖാസില്' സേവനമനുഷ്ഠിച്ചിരുന്നു. അതിനുശേഷമാണ് റോയല് മറൈന്സിന്റെ സ്പെഷ്യല് ബോട്ട് സ്ക്വാഡ്രണില് ചേരുന്നത്.
ലോകത്തിലെ 'ഏറ്റവും മികച്ച പര്വ്വതാരോഹകരില് ഒരാള്' എന്നാണ് പുര്ജ വിശേഷിപ്പിക്കപ്പെടുന്നത്. എണ്ണായിരത്തിലധികം മീറ്റര് ഉയരമുള്ള കൊടുമുടികളാണ് അദ്ദേഹം മിക്കപ്പോഴും കീഴടക്കിയിരുന്നതെന്ന് മുന് നേപ്പാള് പര്വതാരോഹണ അസോസിയേഷന് പ്രസിഡന്റ് ആങ് ഷെറിംഗ് ഷെര്പ്പ പറഞ്ഞു. ലോകത്തിലെ ഏറ്റവും ഉയരമുള്ള പന്ത്രണ്ടാമത് കൊടുമുടിയായ ബ്രോഡ് പീക്കിന്റെ ഉയരം 8,051 മീറ്ററാണ്. ജൂണ് മുതല് ഓഗസ്റ്റ് വരെയുള്ള പാകിസ്താനിലെ വേനല്ക്കാല പര്വതാരോഹണ സീസണില് പലപ്പോഴും കടുത്ത മഞ്ഞുവീഴ്ചയും വേഗത്തില് മാറുന്ന കാലാവസ്ഥയും പര്യവേക്ഷണങ്ങളെ അപകടകരമാക്കാറുണ്ട്.
Comments