20 പൗണ്ടിൽ കൂടുതൽ ഭാരമുള്ളത് എടുക്കരുത്; ഗർഭകാലത്തെക്കുറിച്ചുള്ള രസകരമായ പോസ്റ്റുമായി ദീപിക പദുക്കോൺ

രണ്ടാമത്തെ കുഞ്ഞിനായുള്ള കാത്തിരിപ്പിലാണ് ബോളിവുഡ് താരം ദീപിക പദുകോൺ. തന്റെ മാതൃത്വ യാത്രയിലെ വിശേഷങ്ങളും അനുഭവങ്ങളുമെല്ലാം നർമ്മബോധത്തോടെ താരം ആരാധകരുമായി പങ്കുവെക്കാറുണ്ട്. ഇപ്പോഴിതാ ഗർഭകാലത്തിന്റെ യാഥാർത്ഥ്യങ്ങൾ വ്യക്തമാക്കുന്ന രസകരമായൊരു ഇൻസ്റ്റാഗ്രാം റീൽ സ്റ്റോറിയായി പങ്കുവെച്ചിരിക്കുകയാണ് ദീപിക.

ഗർഭിണിയായിരിക്കുമ്പോൾ 20 പൗണ്ടിൽ കൂടുതൽ ഭാരമുള്ളതൊന്നും എടുക്കരുത് എന്ന പതിവ് ഉപദേശത്തെ മറികടന്ന്, ഒരു ഗർഭിണിയായ സ്ത്രീ തന്റെ ചെറിയ കുട്ടിയെ എടുക്കുന്ന ദൃശ്യങ്ങളാണ് വീഡിയോയിലുള്ളത്. തുടർന്ന് വീഡിയോയിൽ "ഈ ഗർഭകാലം മുഴുവൻ ഞാൻ" എന്ന ക്യാപ്ഷനും താരം നൽകിയിട്ടുണ്ട്. പല അമ്മമാരും ആരോഗ്യ നിർദ്ദേശങ്ങൾ വകവെക്കാതെ തങ്ങളുടെ മൂത്ത കുട്ടികളെ എടുത്തു നടക്കാൻ നിർബന്ധിതരാകുന്നു എന്ന യാഥാർത്ഥ്യമാണ് ഇത് നർമ്മരൂപത്തിൽ അവതരിപ്പിക്കുന്നത്. വഡിയോയ്ക്കൊപ്പം നടി നൽകിയിരിക്കുന്ന സ്പൈഡർമാൻ ഇമോജിയും ഇതിന് കൂടുതൽ രസകരമായ ഭാവം നൽകുന്നു.

മുഖത്ത് എപ്പോഴും പുഞ്ചിരിയോടെ ദീപിക തന്റെ ഗർഭകാലത്തെ എത്രത്തോളം ആസ്വദിക്കുന്നുണ്ടെന്ന് വ്യക്തമാക്കുന്നതാണ് ഈ ലഘുവായ പോസ്റ്റ്. താരം ഗർഭകാലത്തെയും മാതൃത്വത്തെയും കുറിച്ചുള്ള മീമുകളും മറ്റ് പോസ്റ്റുകളും പങ്കുവെക്കുന്നത് ഇത് ആദ്യമായല്ല.ഇതിന് മുൻപും ഗർഭകാലത്തിന്റെ മൂന്നാം ട്രൈമേഷനിലെ ബുദ്ധിമുട്ടുകളെക്കുറിച്ച് ദീപിക രസകരമായ ഒരു മീം പങ്കുവെച്ചിരുന്നു. "മൂന്നാം ട്രൈമേഷനിൽ രാത്രി ടോയ്ലറ്റിൽ പോകാനായി എഴുന്നേൽക്കുമ്പോൾ" എന്നായിരുന്നു ആ പോസ്റ്റിലെ വരികൾ. ഗർഭിണികളായ നിരവധി സ്ത്രീകൾക്ക് തങ്ങളുടെ സ്വന്തം അനുഭവങ്ങളുമായി ഇതിനെ എളുപ്പത്തിൽ സാമ്യപ്പെടുത്താൻ കഴിഞ്ഞിരുന്നു.

അതേസമയം, കഴിഞ്ഞ ഏപ്രിലിലാണ് തങ്ങൾ രണ്ടാമത്തെ കുഞ്ഞിനെ വരവേൽക്കാൻ ഒരുങ്ങുകയാണെന്ന വിവരം ദീപികയും രൺവീറും ആരാധകരെ അറിയിച്ചത്. പോസിറ്റീവായ പ്രഗ്നൻസി കിറ്റ് കയ്യിൽ പിടിച്ചുനിൽക്കുന്ന മകൾ ദുവയുടെ ചിത്രം പങ്കുവെച്ചുകൊണ്ടായിരുന്നു താരങ്ങൾ ഈ സന്തോഷവാർത്ത പുറത്തുവിട്ടത്.

2013-ൽ പുറത്തിറങ്ങിയ 'രാം ലീല' എന്ന ചിത്രത്തിന്റെ സെറ്റിൽവെച്ചാണ് ദീപികയും രൺവീറും പ്രണയത്തിലാകുന്നത്. വർഷങ്ങൾ നീണ്ട ഡേറ്റിംഗിനു ശേഷം 2018 നവംബർ 14-നായിരുന്നു ഇരുവരുടെയും വിവാഹം. തുടർന്ന് 2024 സെപ്റ്റംബറിലാണ് ഇരുവർക്കും ആദ്യ കുഞ്ഞായ 'ദുവ' ജനിക്കുന്നത്.