തൊടുപുഴ: ഇടുക്കി ജില്ലയില് മഴയുടെ ശക്തിക്ക് നേരിയ കുറവുണ്ടെങ്കിലും ഹൈറേഞ്ച്, ലോറേഞ്ച് മേഖലകളില് ഇടവിട്ട് ശക്തമായ മഴ. മണ്ണിടിച്ചില് ഭീഷണി നിലനില്ക്കുന്നതിനാല് ദേശീയപാത 85-ല് നേര്യമംഗലം മുതല് അടിമാലി വരെ ഗതാഗത നിരോധനം തുടരുകയാണ്. ഇടുക്കി ജില്ലയില് രാത്രികാല യാത്രാ നിരോധനവും വിനോദസഞ്ചാര കേന്ദ്രങ്ങളിലേക്കുള്ള പ്രവേശന വിലക്കും തുടരുന്നുണ്ട്.
ഉള്പ്രദേശങ്ങളില് പലയിടത്തും മണ്ണും കല്ലും റോഡിലേക്ക് പതിച്ച് ഗതാഗതം തടസപ്പെട്ടു. വൈദ്യുതി വിതരണം ഭാഗികമായി തകരാറിലായി. തൊടുപുഴ മലങ്കര ഡാമിലെ ജലനിരപ്പ് റെഡ് അലര്ട്ട് പരിധിയായ 41.30 മീറ്ററിലെത്തിയതോടെ ആവശ്യാനുസരണം ഡാമിന്റെ ഷട്ടറുകള് ഘട്ടംഘട്ടമായി ഒരു മീറ്റര് വരെ ഉയര്ത്തി വെള്ളം പുറത്തേക്ക് ഒഴുക്കിവിടുകയാണ്. മൂവാറ്റുപുഴ, തൊടുപുഴ നദികളുടെ തീരങ്ങളിലും താഴ്ന്ന പ്രദേശങ്ങളിലും താമസിക്കുന്നവര് അതീവ ജാഗ്രത പാലിക്കണമെന്ന് അധികൃതര് മുന്നറിയിപ്പ് നല്കി. അതേസമയം ഇടുക്കി, മുല്ലപ്പെരിയാര്, ചെങ്കുളം ഡാമുകള് സുരക്ഷിത നിലയിലാണെന്ന് അധികൃതര് അറിയിച്ചു. ഇടുക്കി ഡാമിലെ നിലവിലെ ജലനിരപ്പ് 2343.56 അടിയാണ്. കഴിഞ്ഞ വര്ഷം ഇതേ ദിവസം ഇത് 2376.50 അടിയായിരുന്നു. ഡാമില് സംഭരണ ശേഷിയുടെ 40.44 ശതമാനം വെള്ളമാണുള്ളത്. ഷട്ടറുകള് നിലവില് അടഞ്ഞുകിടക്കുകയാണ്. മുല്ലപ്പെരിയാര് ഡാമിലെ ജലനിരപ്പ് 118.35 അടിയിലും ചെങ്കുളം ഡാമിലെ ജലനിരപ്പ് 846.75 മീറ്ററിലും (45.45 ശതമാനം സംഭരണം) തുടരുകയാണ്.
കഴിഞ്ഞ 24 മണിക്കൂറിനിടെ ജില്ലയില് ഏറ്റവും കൂടുതല് മഴ ലഭിച്ചത് ഇടുക്കി മീന്മുട്ടിയിലാണ്. 132.5 മില്ലീമീറ്റര് മഴ രേഖപ്പെടുത്തി. കുളമാവില് 125 മില്ലീമീറ്ററും ഉടുമ്പന്ചോലയില് 92 മില്ലീമീറ്ററും ഇടുക്കിയിലും ആലടിയിലും 88.8 മില്ലീമീറ്ററും തട്ടത്തിക്കുടിയില് 87 മില്ലീമീറ്ററും ആനവിലാസത്ത് 82.8 മില്ലീമീറ്ററും കട്ടപ്പനയില് 61.2 മില്ലീമീറ്ററും പെരിയാര് മേഖലയില് 54 മില്ലീമീറ്ററും കടമാക്കുഴിയില് 33.6 മില്ലീമീറ്ററും മഴ ലഭിച്ചു.
Comments