തിരുവനന്തപുരം: സംസ്ഥാനത്താകെ മഴക്കെടുതിയും മധ്യ-തെക്കന് ജില്ലകളില് പ്രളയസമാനസാഹചര്യവും തുടരുന്നു. മഴക്കെടുതിയില് ഇന്നലെ രണ്ടുപേര് കൂടി മരിച്ചതോടെ ആകെ മരണസംഖ്യ 18 ആയി. കോട്ടയം, അയര്ക്കുന്നം ആറുമാനൂരില് വെള്ളക്കെട്ടില് വീണ് യുവാവ് മരിച്ചു. ആറുമാനൂര് മൂഴിക്കല്കടവ് പുളിഞ്ചോട് ഭാഗത്തുകൂടി നടന്നുപോകുകയായിരുന്ന ആറുമാനൂര് അഴിയാത്ത് ജിന്റോ മാത്യു(43)വാണ് വെള്ളക്കെട്ടില് വീണത്. ഇന്നലെ രാവിലെ 11-നായിരുന്നു സംഭവം. ൈഡ്രവറായിരുന്ന ജിന്റോ അവിവാഹിതനാണ്. മാതാപിതാക്കള്: പരേതനായ മാത്യു, ക്ലാരമ്മ. സഹോദരങ്ങള്: ജോജി, ആന്സി. പത്തനംതിട്ട,
പന്തളത്ത് പുഞ്ചയില് കുളിക്കാന് പോയ യുവാവ് മുങ്ങിമരിച്ചു. പന്തളം ചെറുമല, പ്ലാവിള പാലനില്ക്കുന്നതില് വീട്ടില് പരേതനായ മുരളിയുടെ മകന് ലെനിന് മുരളി(32)യാണ് മരിച്ചത്. ഇന്നലെ ഉച്ചകഴിഞ്ഞ് രണ്ടിനായിരുന്നു അപകടം. അമ്മ തങ്കമ്മ. സഹോദരങ്ങള്: വിഷ്ണു മുരളി, അരണ്യാ മുരളി.
പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് ജില്ലകളില് ഇന്ന് ഓറഞ്ച് അലെര്ട്ട് പ്രഖ്യാപിച്ചു. തിരുവനന്തപുരം, കൊല്ലം ജില്ലകളില് യെലോ അലെര്ട്ടാണ്. ആറന്മുള ക്ഷേത്രത്തില് ഇന്നും നാളെയും നടക്കേണ്ടിയിരുന്ന വള്ളസദ്യകള് മാറ്റിവച്ചു.എറണാകുളം, ഇടുക്കി ജില്ലകളില് നീരൊഴുക്ക് ശക്തമായതോടെ മൂവാറ്റുപുഴയാറും തൊടുപുഴയാറും അപകടനിരപ്പിലെത്തി. ഇരുനദികളുടെയും കാളിയാറിന്റെയും തീരപ്രദേശങ്ങളില് വെള്ളപ്പൊക്കജാഗ്രതാ നിര്ദേശം നല്കി. നദികളില് ഇറങ്ങുന്നതിനു നിരോധനമുണ്ട്. വെള്ളക്കെട്ടിനേത്തുടര്ന്ന് എം.സി. റോഡില് തിരുവല്ല-ചെങ്ങന്നൂര് റൂട്ടില് കെ.എസ്.ആര്.ടി.സി. സര്വീസ് നിര്ത്തിവച്ചു. തിരുമൂലപുരത്ത് ഉള്പ്പെടെ വെള്ളംകയറി. പമ്പ, മണിമല, അച്ചന്കോവില് നദികളിലെ ജലനിരപ്പ് അപകടകരമായ രീതിയില് ഉയര്ന്നുനില്ക്കുന്നു. ആറന്മുള, കോഴഞ്ചേരി, പന്തളം, ഉപ്പുകുറ്റനാട് മേഖലകളിലും വെള്ളം കയറി. മലയോര മേഖലകളിലേക്ക് രാത്രിയാത്ര നിരോധിച്ചു. തിരുവനന്തപുരത്ത് പേപ്പാറ, അരുവിക്കര അണക്കെട്ടുകളുടെ ഷട്ടറുകള് ഉയര്ത്തി. തുടര്ച്ചയായ മൂന്നാംദിവസവും മീനച്ചിലാറ്റിലും മണിമലയാറ്റിലും ജലനിരപ്പുയര്ന്നു. പൂഞ്ഞാറിലെ ഉരുള്പൊട്ടലിനു പിന്നാലെ പനയ്ക്കപ്പാലം, മൂന്നാനി, പാലാ എന്നിവിടങ്ങളില് ഇന്നലെ വീണ്ടും വെള്ളം കയറിയത് ആധി പടര്ത്തി. പാലാ -ഈരാറ്റുപേട്ട, പാലാ- കോട്ടയം റൂട്ടുകളില് ഗതാഗതം വീണ്ടും മുടങ്ങി. കോട്ടയം - ചേര്ത്തല റൂട്ടിലും ഗതാഗതം തടസപ്പെട്ടു. ചങ്ങനാശേരി - ആലപ്പൂഴ റൂട്ടില് കിടങ്ങറയില് ഒരു കിലോമീറ്ററില് ഏറെ ദൂരം വെള്ളത്തിനടയിലാണ്.
അയ്മനം തിരുവാര്പ്പ്, കുമരകം പഞ്ചായത്തുകളിലേക്കു കിഴക്കന് വെള്ളം ഇരച്ചെത്തുകയാണ്. എന്.ഡി.ആര്.എഫ് സംഘവും സന്നദ്ധ പ്രവര്ത്തകരും രക്ഷാപ്രവര്ത്തനം തുടരുന്നു.
Comments