ചവറ: മീന്പിടിത്ത വള്ളം മറിഞ്ഞ് കടലില് കാണാതായ നീണ്ടകര പുത്തന്തുറ സ്വദേശി ഗൗതം കൃഷ്ണ (26) യ്ക്കായുള്ള തെരച്ചില് ഇന്നലെയും തുടര്ന്നു. കടല് പ്രക്ഷുബ്ധമായതിനാല് അത്യാധുനിക സംവിധാനമുപയോഗിച്ചുള്ള തെരച്ചിലും ഫലപ്രദമായില്ല. തെരച്ചിലില് താന് തൃപ്തയല്ലെന്ന് ഗൗതം കൃഷ്ണയുടെ മാതാവ് എസ്. രേഷ്മ പറഞ്ഞു. സംവിധാനങ്ങളെല്ലാം എത്തിച്ചെങ്കിലും തെരച്ചില് കാര്യക്ഷമമല്ലെന്നും കണ്ണില് പൊടിയിടാനുള്ള ഒന്നായി അതു മാറരുതെന്നും അവര് കൂട്ടിച്ചേര്ത്തു. നീണ്ടകര തീരദേശ പോലീസ് സ്റ്റേഷനു മുന്നില് കഴിഞ്ഞദിവസം രേഷ്മ കുത്തിയിരുന്നു പ്രതിഷേധിച്ചിരുന്നു. ഇതിനുശേഷമാണ് തെരച്ചില് ഊര്ജിതമാക്കിയത്. ഡ്രോണ് സംവിധാനത്തിനു പുറമേ മറൈന് എന്ഫോഴ്സ്മെന്റ്, തീരദേശ പോലീസ്, കോസ്റ്റ് ഗാര്ഡ്, ഫിഷിങ് പട്രോള്, സ്പീഡ് ബോട്ടുകള്, കോസ്റ്റ് ഗാര്ഡിന്റെ ഹെലിക്കോപ്റ്റര് തുടങ്ങിയ സംവിധാനങ്ങളും തെരച്ചിലിനായി ഉപയോഗിച്ചു. വള്ളം മറിഞ്ഞ ഭാഗത്തും പുലിമുട്ടിന്റെ ഭാഗത്തുമെല്ലാം വ്യാപക തെരച്ചില് നടത്തിയെങ്കിലും ഫലമുണ്ടായില്ല. കടലില് തിരയും അടിയൊഴുക്കും കൂടുതലാണ്. ഇടയ്ക്കിടെ മഴ ശക്തമാകുന്നതും തെരച്ചിലിനു തടസമാകുന്നുണ്ട്. ജൂലൈ 31-നു രാവിലെ നീണ്ടകരയില്നിന്ന് മീന്പിടിക്കാന് പോയ ശ്രീകൃഷ്ണഭഗവാന് കുറുവടിക്കാരന് എന്ന ഔട്ട്ബോര്ഡ് ഫൈബര് വള്ളമാണ് അപകടത്തില്പ്പെട്ടത്. കടലില് മുങ്ങിപ്പോയ 14 തൊഴിലാളികളില് 11 പേരെ മറ്റ് മത്സ്യത്തൊഴിലാളികള് രക്ഷപ്പെടുത്തി. സംഭവസമയത്തുതന്നെ ഒരാള് മരിച്ചിരുന്നു. പുത്തന്തുറ പൂമുഖത്ത് വീട്ടില് രാജീവനാണ് (76) മരിച്ചത്. രാജീവന്റെ മരുമകന് പുത്തന്തുറ കടുവുങ്കല് രാധാകൃഷ്ണന്റെ (47) മൃതദേഹം കഴിഞ്ഞദിവസം കണ്ടെത്തി. രാധാകൃഷ്ണന്റെ മകനാണ് കാണാതായ ഗൗതം കൃഷ്ണ.
ഫലപ്രദമായ തെരച്ചില് നടത്തണമെന്നാവശ്യപ്പെട്ട് മത്സ്യത്തൊഴിലാളി യൂണിയന് (സി.ഐ.ടി.യു), ഡി.വൈ.എഫ്.ഐ, പുത്തന്തുറ അരയ സേവാ സമിതി, വള്ളത്തൊഴിലാളി യൂണിയന് തുടങ്ങി നിരവധി സംഘടനകള് നീണ്ടകര ഹാര്ബറിലേക്കും കലക്ടറേറ്റിലേക്കും ഫിഷറീസ് അസി. ഡയറക്ടര് ഓഫീസിലേക്കും പ്രതിഷേധ മാര്ച്ച് നടത്തി.
ചവറ സുരേന്ദ്രന് പിള്ള
Comments