തൊടുപുഴ: മലബാര് ഗോള്ഡ് ആന്ഡ് ഡയമണ്ട്സ് ഉള്പ്പെടെയുള്ള ബിസിനസ് സംരംഭങ്ങള്ക്ക് നേതൃത്വം നല്കുന്ന മലബാര് ഗ്രൂപ്പിന്റെയും തണല് ചാരിറ്റബിള് ട്രസ്റ്റിന്റെയും ആഭിമുഖ്യത്തിലുള്ള ആദ്യത്തെ മലബാര് തണല് ഏര്ളി ഇന്റര്വെന്ഷന് സെന്റര് തൊടുപുഴയിലെ കോലാനിയില് പ്രവര്ത്തനം തുടങ്ങി. കുട്ടികളിലെ ശാരീരികമാനസിക വൈകല്യങ്ങള് നേരത്തെ കണ്ടെത്തി തീര്ത്തും സൗജന്യമായി ആവശ്യമായ തെറാപ്പിയും ചികിത്സയും നല്കി അവരെ സാധാരണ സ്കൂളുകളില് വിദ്യാഭ്യാസത്തിനായി തയ്ാറാക്കുകയെന്നതാണ് ഏര്ളി ഇന്റര്വെന്ഷന് സെന്ററിന്റെ ലക്ഷ്യം. ഡോക്ടര്മാരുടെയും മറ്റ് മെഡിക്കല് വിദഗ്ധരുടെയും സേവനം സെന്ററില് ലഭ്യമാക്കും. ഇന്ററാക്ടീവ് സെന്സറിങ് അടക്കമുള്ള അത്യാധുനിക സാങ്കേതിക വിദ്യകള് ഉപയോഗിച്ചാണ് ഇവിടെ ചികിത്സ നടത്തുക.
ആരോഗ്യ മന്ത്രി കെ.മുരളീധരന് കോലാനിയിലെ ഏര്ളി ഇന്റര്വെന്ഷന് സെന്ററിന്റെയും ദയതണല് ഡയാലിസിസ് സെന്ററിന്റെയും ഉദ്ഘാടനം നിര്വഹിച്ചു. റോയ് കെ. പൗലോസ് എം.എല്.എ, ജില്ലാ പഞ്ചായത്ത് പ്രസിഡന്റ് ഷീല സ്റ്റീഫന്, മുന് മന്ത്രി പി.ജെ. ജോസഫ്, തൊടുപുഴ മുന്സിപ്പാലിറ്റി വൈസ് ചെയര്മാന് കെ. ദീപക്, മലബാര് ഗോള്ഡ് ഡയമണ്ട്സ് റീട്ടെയില് ഓപ്പറേഷന്സ് ഹെഡ് (കേരള) ആര്. അബ്ദുള് ജലീല് തുടങ്ങിയവര് ചടങ്ങില് പങ്കെടുത്തു. മലബാര് ഗ്രൂപ്പിന്റെ സി എസ് ആര് പദ്ധതിയുടെ ഭാഗമായി ഭവനരഹിതര്ക്ക് ഭവന നിര്മ്മാണത്തിനുള്ള ധനസഹായം ചടങ്ങില് വിതരണം ചെയ്തു
മലബാര് ഗ്രൂപ്പിന്റെ സി.എസ്.ആര്. പ്രവര്ത്തനങ്ങളുടെ ഭാഗമായി ഈ വര്ഷം 12 ഏര്ളി ഇന്റര്വെന്ഷന് സെന്ററുകള് സ്ഥാപിക്കാനാണ് തീരുമാനിച്ചത്. അതില് ആദ്യത്തേതാണ് കോലാനിയില് പ്രവര്ത്തനം തുടങ്ങിയത്. ഓരോ കുട്ടിക്കും അവരുടെ കഴിവുകള് തിരിച്ചറിഞ്ഞ് ആത്മവിശ്വാസത്തോടെ വളരാനും സമൂഹത്തിന്റെ മുഖ്യധാരയില് തുല്യരായി മുന്നേറാനും അവസരം ലഭിക്കണമെന്ന് മലബാര് ഗ്രൂപ്പ് ചെയര്മാന് എം.പി. അഹമ്മദ് പറഞ്ഞു.
Comments