കേരളത്തിന്റെ വികസനത്തിന് ദിശാബോധം നല്കുന്ന പ്രധാന സ്ഥാപനങ്ങളിലൊന്നാണ് സംസ്ഥാന ആസൂത്രണ ബോര്ഡ്. എന്നാല്, ഇന്ന് ഈ സ്ഥാപനത്തിന്റെ പ്രവര്ത്തനങ്ങള്ക്കപ്പുറം അതിന്റെ പേരും പുനപ്പരിശോധിക്കേണ്ട സമയമാണ് വന്നിരിക്കുന്നത്. 'സംസ്ഥാന ആസൂത്രണ ബോര്ഡ്' എന്ന പേര് ഇന്ത്യയുടെ പഴയ വികസനരീതിയുമായി ബന്ധപ്പെട്ടതാണ്. കേന്ദ്രത്തില് അഞ്ചുവര്ഷ പദ്ധതികള് തയാറാക്കി രാജ്യത്തിന്റെ വികസനത്തിന് നേതൃത്വം നല്കിയിരുന്ന പ്ലാനിങ് കമ്മീഷന് നിലവിലുണ്ടായിരുന്ന കാലത്ത് ആ പേര് വളരെ യോജിച്ചതായിരുന്നു.
എന്നാല്, 2015ല് പ്ലാനിങ് കമ്മീഷന് പകരം നിതി ആയോഗ് നിലവില് വന്നതോടെ ഇന്ത്യയുടെ വികസന സമീപനത്തില് വലിയ മാറ്റമുണ്ടായി. ഇത് ഒരു പേര് മാറ്റം മാത്രമായിരുന്നില്ല. കേന്ദ്രവത്കൃത ആസൂത്രണത്തില്നിന്ന് നയരൂപീകരണത്തിലേക്കും, അറിവ്, ഗവേഷണം, നവീകരണം, തെളിവുകളുടെ അടിസ്ഥാനത്തിലുള്ള തീരുമാനങ്ങള്, സഹകരണ ഫെഡറലിസം എന്നിവയ്ക്ക് പ്രാധാന്യം നല്കുന്ന പുതിയ ഭരണരീതിയിലേക്കുമുള്ള മാറ്റമായിരുന്നു അത്.
പത്ത് വര്ഷത്തിലേറെയായി ഈ മാറ്റം നടന്നിട്ടും കേരളം ഇപ്പോഴും 'സംസ്ഥാന ആസൂത്രണ ബോര്ഡ്' എന്ന പഴയ പേരാണ് ഉപയോഗിക്കുന്നത്. സ്ഥാപനത്തിന്റെ പ്രവര്ത്തനങ്ങള് കാലത്തിനനുസരിച്ച് മാറിയെങ്കിലും, അതിന്റെ പേര് പഴയ ഭരണസമ്പ്രദായത്തിന്റെ ഓര്മയാണ് നല്കുന്നത്. അതിനാല് ഇന്നത്തെ ഉത്തരവാദിത്വങ്ങളും ഭാവി കാഴ്ചപ്പാടും പ്രതിഫലിപ്പിക്കുന്ന പുതിയൊരു പേര് നല്കേണ്ടത് കാലഘട്ടത്തിന്റെ ആവശ്യമാണ്.
കേരളത്തിന്റെ വികസനചരിത്രത്തില് സംസ്ഥാന ആസൂത്രണ ബോര്ഡിന്റെ പങ്ക് അതുല്യമാണ്. ജനകീയാസൂത്രണ പ്രസ്ഥാനത്തിന് നേതൃത്വം നല്കുകയും, വികേന്ദ്രീകൃത ഭരണത്തെ ശക്തിപ്പെടുത്തുകയും, വിദ്യാഭ്യാസം, ആരോഗ്യം, തദ്ദേശസ്വയംഭരണം, സാമൂഹിക വികസനം തുടങ്ങിയ മേഖലകളില് കേരളത്തിന്റെ മാതൃക രൂപപ്പെടുത്തുന്നതിലും ഈ സ്ഥാപനം നിര്ണായക പങ്കുവഹിച്ചു. അതിനാല് പേര് മാറ്റം എന്നത് ഈ ചരിത്രത്തെ നിഷേധിക്കുന്നതല്ല. മറിച്ച്, കാലത്തിനനുസരിച്ച് സ്ഥാപനങ്ങളും വളരണമെന്നും മാറണമെന്നും അംഗീകരിക്കുന്ന ഒരു നടപടിയാണ്.
ഇന്നത്തെ കേരള സര്ക്കാര് വികസനത്തെ പഴയ രീതിയിലുള്ള പദ്ധതികളായി മാത്രം കാണുന്നില്ല. മുഖ്യമന്ത്രി വി.ഡി. സതീശന്റെ നേതൃത്വത്തില് വിജ്ഞാനാധിഷ്ഠിത സമ്പദ്?വ്യവസ്ഥ, സാങ്കേതിക നവീകരണം, ഡിജിറ്റല് ഭരണസംവിധാനം, കാലാവസ്ഥാ പ്രതിരോധം, ആധുനിക അടിസ്ഥാനസൗകര്യങ്ങള്, വ്യവസായ വികസനം, സാമൂഹിക നീതി, ലിംഗസമത്വം, സുസ്ഥിര വികസനം തുടങ്ങിയ മേഖലകള്ക്ക് പ്രത്യേക പ്രാധാന്യം നല്കുകയാണ്. ഈ പുതിയ വികസന കാഴ്ചപ്പാട് ആസൂത്രണത്തെക്കാള് വിശാലമാണ്. അതിനാല് സംസ്ഥാനത്തിന്റെ പ്രധാന നയോപദേശ സ്ഥാപനത്തിന്റെ പേരും ഈ മാറ്റം പ്രതിഫലിപ്പിക്കേണ്ടതാണ്.
കേരളത്തിന്റെ വികസന മാതൃകയുടെ ഏറ്റവും വലിയ പ്രത്യേകത സാമ്പത്തിക വളര്ച്ചയും സാമൂഹിക നീതിയും ഒരുമിച്ച് മുന്നോട്ട് കൊണ്ടുപോകുന്നതാണ്. വിദ്യാഭ്യാസം, ആരോഗ്യം, പൊതുവിതരണ സംവിധാനം, സാമൂഹിക സുരക്ഷാ പെന്ഷന്, സ്ത്രീ ശാക്തീകരണം, തദ്ദേശഭരണം തുടങ്ങിയ മേഖലകളിലെ നിക്ഷേപങ്ങളെ കേരളം ചെലവായി കാണാതെ ഭാവിയിലേക്കുള്ള നിക്ഷേപമായാണ് കണക്കാക്കുന്നത്. അതോടൊപ്പം വ്യവസായ നിക്ഷേപം, ഡിജിറ്റല് സമ്പദ്?വ്യവസ്ഥ, അടിസ്ഥാനസൗകര്യ വികസനം, തൊഴില്സൗഹൃദ അന്തരീക്ഷം എന്നിവയും ശക്തിപ്പെടുത്തുകയാണ്. ഇത്തരത്തിലുള്ള സമഗ്ര വികസനത്തിന് സാമ്പത്തികം, പരിസ്ഥിതി, സാങ്കേതികവിദ്യ, സാമൂഹിക മേഖലകള് എന്നിവയെ ഒരുമിച്ച് കാണുന്ന സ്ഥാപനമാണ് ആവശ്യമായത്. 'ആസൂത്രണ ബോര്ഡ്' എന്ന പേര് മാത്രം ഈ വിശാല ഉത്തരവാദിത്വം വ്യക്തമാക്കുന്നില്ല.
കാലാവസ്ഥാ വ്യതിയാനവും സ്ഥാപനത്തിന്റെ പുതിയ പങ്ക് വ്യക്തമാക്കുന്നു. പ്രളയങ്ങള്, ഉരുള്പൊട്ടലുകള്, തീരശോഷണം, ചൂട് വര്ധിക്കല്, മഴയുടെ രീതിയിലെ മാറ്റങ്ങള് തുടങ്ങിയ വെല്ലുവിളികള് കേരളം കഴിഞ്ഞ വര്ഷങ്ങളില് നേരിട്ടു. കാലാവസ്ഥാ മാറ്റം ഇനി പരിസ്ഥിതി വകുപ്പിന്റെ മാത്രം വിഷയമല്ല. കൃഷി, ആരോഗ്യം, ജലവിഭവം, ഭവനനിര്മാണം, മത്സ്യബന്ധനം, ടൂറിസം, നഗരവികസനം തുടങ്ങി എല്ലാ മേഖലകളെയും അത് ബാധിക്കുന്നു. അതിനാല്, ദീര്ഘകാല പഠനവും ശാസ്ത്രീയ ഗവേഷണവും വിവിധ വകുപ്പുകളുടെ ഏകോപനവും ആവശ്യമാണ്. പരമ്പരാഗത ആസൂത്രണം മാത്രം ഇതിന് മതിയാകില്ല.
ശാസ്ത്രീയ മനോഭാവം വളര്ത്തുന്നതിലും കേരളം എന്നും മുന്നിലായിരുന്നു. പൊതുവിദ്യാഭ്യാസം, സാക്ഷരതാ പ്രസ്ഥാനം, ശാസ്ത്ര പ്രചാരണം എന്നിവയിലൂടെ കേരളം ഭരണനിര്വഹണത്തില് ശാസ്ത്രീയ സമീപനത്തിന് വലിയ പ്രാധാന്യം നല്കി. ഇന്ന് നിര്മിത ബുദ്ധി, ഡേറ്റാ ഭരണസംവിധാനം, ബയോടെക്നോളജി, ഗവേഷണം, ഉന്നതവിദ്യാഭ്യാസം തുടങ്ങിയ മേഖലകളിലും സര്ക്കാര് കൂടുതല് ശ്രദ്ധ കേന്ദ്രീകരിക്കുകയാണ്. അതിനാല് വികസന സ്ഥാപനങ്ങള് ഇനി ആസൂത്രണ സ്ഥാപനങ്ങള് മാത്രമല്ല; അറിവും ഗവേഷണവും നയവിശകലനവും നടത്തുന്ന വിജ്ഞാനകേന്ദ്രങ്ങളായിരിക്കണം.
കേരളത്തിന്റെ സമ്പദ്?വ്യവസ്ഥയെക്കുറിച്ചുള്ള ധവളപത്രവും സംസ്ഥാന ബജറ്റും ഇതിന് നല്ല ഉദാഹരണങ്ങളാണ്. ഇന്ന് അവ വരവും ചെലവും മാത്രം അവതരിപ്പിക്കുന്ന രേഖകളല്ല. സാമ്പത്തിക സ്ഥിരത, ജനസംഖ്യാ മാറ്റങ്ങള്, അടിസ്ഥാനസൗകര്യ വികസനം, സാങ്കേതിക പുരോഗതി, ഭാവി വികസന ദിശകള് എന്നിവയെക്കുറിച്ചുള്ള സമഗ്ര കാഴ്ചപ്പാടാണ് അവ നല്കുന്നത്. അതിനാല് സര്ക്കാരിന് നയോപദേശം നല്കുന്ന സ്ഥാപനത്തിനും അതിനനുസരിച്ചുള്ള പുതിയ തിരിച്ചറിയല് ആവശ്യമാണ്.
ഇതിന് ഫെഡറല് സംവിധാനത്തിലും പ്രസക്തിയുണ്ട്. നിതി ആയോഗ് നിലവില് വന്നതോടെ സംസ്ഥാനങ്ങള് കേന്ദ്രത്തിന്റെ പദ്ധതികള് നടപ്പാക്കുന്നവരായി മാത്രമല്ല, ദേശീയ വികസന ചര്ച്ചകളിലെ പങ്കാളികളായും മാറി. പൊതുജനാരോഗ്യം, തദ്ദേശഭരണം, വിദ്യാഭ്യാസം, ദുരന്തനിവാരണം, ഡിജിറ്റല് സേവനങ്ങള് തുടങ്ങിയ മേഖലകളില് കേരളം രാജ്യത്തിന് മാതൃകാപരമായ ആശയങ്ങള് നല്കിയിട്ടുണ്ട്. നിതി ആയോഗിന്റെ പുതിയ ഭരണസമീപനവുമായി യോജിക്കുന്ന ഒരു സ്ഥാപനനാമം കേരളത്തിന്റെ ദേശീയ തലത്തിലെ ഇടപെടലുകള് കൂടുതല് ശക്തിപ്പെടുത്തും. അതുകൊണ്ട് രാഷ്ട്രീയ നിലപാടുകള് മാറുന്നു എന്നര്ത്ഥമില്ല; ഭരണപരമായ ഏകോപനം മാത്രമാണ് അത് സൂചിപ്പിക്കുന്നത്.
രാജ്യത്തെ മറ്റ് സംസ്ഥാനങ്ങളും അവരുടെ വികസന സ്ഥാപനങ്ങളെ പുതുക്കുകയാണ്. കര്ണാടക, തമിഴ്നാട്, തെലങ്കാന, ഒഡീഷ, മഹാരാഷ്ട്ര തുടങ്ങിയ സംസ്ഥാനങ്ങള് നയ ഗവേഷണ സ്ഥാപനങ്ങള്, സാമ്പത്തിക ഉപദേശക സമിതികള്, ഇന്നൊവേഷന് മിഷനുകള്, വിജ്ഞാന കമ്മീഷനുകള് തുടങ്ങിയ പുതിയ സംവിധാനങ്ങള് രൂപീകരിച്ചിട്ടുണ്ട്. സാമ്പത്തിക വിദഗ്ധര്, ശാസ്ത്രജ്ഞര്, സാങ്കേതിക വിദഗ്ധര്, പരിസ്ഥിതി ഗവേഷകര്, സാമൂഹികശാസ്ത്രജ്ഞര് എന്നിവരുടെ പങ്കാളിത്തത്തോടെ ഇവ ഭാവിയിലെ വെല്ലുവിളികള് മുന്കൂട്ടി വിലയിരുത്തുകയും സര്ക്കാരിന് തെളിവുകളുടെ അടിസ്ഥാനത്തില് നയോപദേശം നല്കുകയും ചെയ്യുന്നു. കേരളത്തിനും ഇത്തരമൊരു ദേശീയ മാതൃകയായി മാറാന് ആവശ്യമായ അറിവും സ്ഥാപനശേഷിയും ധാരാളമുണ്ട്. അതിന് സംസ്ഥാന ആസൂത്രണ ബോര്ഡിന്റെ പേരും പ്രവര്ത്തനപരമായ സ്ഥാനവും പുതുക്കുന്നത് ശക്തമായ സന്ദേശമാകും.
അവസാനം ചോദിക്കേണ്ടത് കേരളത്തിന് ആസൂത്രണം വേണോ എന്നതല്ല. എല്ലാ സര്ക്കാരുകളും ആസൂത്രണം നടത്തും. എന്നാല്, ഇരുപത്തിയൊന്നാം നൂറ്റാണ്ടിലെ വെല്ലുവിളികളെ നേരിടാന് ആസൂത്രണം മാത്രം മതിയോ എന്നതാണ് യഥാര്ത്ഥ ചോദ്യം. അതിന്റെ ഉത്തരം വ്യക്തമാണ് - മതിയാകില്ല. കാലാവസ്ഥാ മാറ്റം, സാങ്കേതിക വിപ്ലവം, ശാസ്ത്രീയ ഗവേഷണം, സാമൂഹിക നീതി, ജനാധിപത്യ പങ്കാളിത്തം, ദീര്ഘകാല വികസന നയങ്ങള് എന്നിവയെ ഒരുമിച്ച് കൈകാര്യം ചെയ്യാന് കഴിയുന്ന ആധുനിക സ്ഥാപനങ്ങളാണ് ഇന്ന് ആവശ്യമായത്.
കേരളത്തിന് ഇതിനുള്ള കഴിവും അനുഭവസമ്പത്തും ഇതിനകം തന്നെ ഉണ്ട്. ഇനി വേണ്ടത്, ആ പുതിയ ദൗത്യവും ദര്ശനവും പ്രതിഫലിപ്പിക്കുന്ന മാറ്റമാണ്. അതുകൊണ്ട് സംസ്ഥാന ആസൂത്രണ ബോര്ഡിന്റെ പേര് മാറ്റുന്നത് ഒരു പ്രതീകാത്മക നടപടിമാത്രമല്ല. ഇന്ത്യയിലെ ഭരണപരമായ മാറ്റങ്ങളെ അംഗീകരിക്കുകയും, കേരളത്തിന്റെ പുതിയ വികസന കാഴ്ചപ്പാട് പ്രകടമാക്കുകയും, ഭാവിയിലെ വെല്ലുവിളികള് നേരിടാന് സംസ്ഥാനത്തിന്റെ പ്രധാന നയസ്ഥാപനത്തെ കൂടുതല് സജ്ജമാക്കുകയും ചെയ്യുന്ന ഒരു ചരിത്രപരമായ തീരുമാനമായിരിക്കും അത്.
ഡോ. ജോസ് ചാത്തുകുളം
(ബംഗളുരു ഇന്സ്റ്റിറ്റ്യൂട്ട് ഫോര് സോഷ്യല് ആന്ഡ് ഇക്കണോമിക് ചേഞ്ചിലെ (ഐ.എസ്.ഇ.സി.) ഡിസെന്ട്രലൈസേഷന് ആന്ഡ് ഡെവലപ്മെന്റ് വിഭാഗത്തിലെ ശ്രീ രാമകൃഷ്ണ ഹെഗ്ഡെ ചെയര് മുന് പ്രഫസറാണു ലേഖകന്. നിലവില് കോട്ടയത്തെ സെന്റര് ഫോര് റൂറല് മാനേജ്മെന്റ് (സി.ആര്.എം.) ഡയറക്ടറായി സേവനമനുഷ്ഠിക്കുന്നു.)
Comments