ആലപ്പുഴ: കരുവാറ്റയിലെ വൃദ്ധന്റെ കൊലപാതകത്തില്‍ മുത്തശ്ശനെ കൊല്ലുന്നത് പ്രതികള്‍ വീഡിയോകോള്‍ വിളിച്ച് 13 കാരി പെണ്‍കുട്ടിയെ കാണിച്ചതായി റിപ്പോര്‍ട്ടുകള്‍. പെണ്‍കുട്ടിയുടെ ക്വട്ടേഷനിലായിരുന്നു കൃത്യം നടത്തിയതെന്നാണ് വിവരം. പെണ്‍കുട്ടിക്ക് ഐഫോണും പ്രതികള്‍ക്ക്് അത്യാധുനിക മോട്ടോര്‍ബൈക്കും വാങ്ങാനായിരുന്നു മോഷണം നടത്തിയത്. വീട്ടില്‍ നിന്നും ആറു പവന്‍ സ്വര്‍ണ്ണാഭരണങ്ങള്‍ നഷ്ടമായിട്ടുണ്ട്. സിസിടിവി ദൃശ്യങ്ങളും സംഘം നശിപ്പിച്ചു കളഞ്ഞു.
ഞായറാഴ്ച രാത്രിയിലാണ് കൊലപാതകം. കൃത്യത്തിന് ശേഷം സംഘം രാത്രിയില്‍ തന്നെ കൊല്ലം പരവൂരില്‍ എത്തിയിരുന്നു. 67 കാരനെ നഗ്നമാക്കിയ ശേഷം കാലും കയ്യും കൂച്ചിക്കെട്ടിയിരുന്നു. ശ്വാസം മുട്ടിച്ചായിരുന്നു കൊലപാതകമെന്നാണ് വിവരം. പെണ്‍കുട്ടി തനിക്ക് സൗഹൃദമുള്ള ഒരു 17 കാരനെ വിളിച്ചായിരുന്നു ക്വട്ടേഷന്‍ നല്‍കിയതെന്നാണ് വിവരം. ഇയാള്‍ തന്റെ സുഹൃത്തുക്കളായ മൂന്ന് പേരെ സഹായത്തിന് വിളിക്കുകയായിരുന്നു. മോഷണം നടത്തിയ സ്വര്‍ണ്ണം കരുനാഗപ്പള്ളിയിലുള്ള ഒരാള്‍ വഴി വില്‍പ്പന നടത്താനായിരുന്നു സംഘത്തിന്റെ ശ്രമം. ഇയാളെയും പോലീസ് കസ്റ്റഡിയില്‍ എടുത്തിട്ടുണ്ട്.
ഒരിടത്തും ഫിംഗര്‍പ്രിന്റ് പതിഞ്ഞിട്ടില്ലാത്തതിനാല്‍ ഗ്‌ളൗസ് ഇട്ടായിരുന്നു കൊലപാതകമെന്നും സംശയിക്കുന്നുണ്ട്. കൃത്യം നടത്തിയ ശേഷം ചുറ്റും മുളകുപൊടി വിതറി. ആസൂത്രിതമായിട്ടായിരുന്നു കൊലപാതകമെന്നും ഒരാഴ്ച മുമ്പ് പദ്ധതിയിട്ടിരുന്നതായി സംശയിക്കുന്നു. അമ്മ ആശുപത്രിയിലേക്ക് പോകുമെന്നും മുത്തശ്ശന്‍ വീട്ടില്‍ തനിച്ചാകുമെന്നും പെണ്‍കുട്ടി നേരത്തേ തന്നെ മനസ്സിലാക്കിയിരുന്നു. കൊലപാതകത്തിന് കാരണം മോഷണം മാത്രമായിരുന്നോ എന്ന കാര്യവും അന്വേഷണത്തിലാണ്. പൂര്‍ണ്ണ നഗ്നനാക്കിയും കൊലപാതകദൃശ്യം വീഡിയോകോള്‍ വഴി കാണിക്കുകയും ചെയ്തതിനാലാണ് ഈ സംശയം. 67 കാരനായ ശിവന്‍കുട്ടി ഏതെങ്കിലും വിധത്തില്‍ പെണ്‍കുട്ടിയെ ഉപദ്രവിച്ചിരുന്നോ എന്ന കാര്യവും പോലീസിന്റെ അന്വേഷണത്തിലുണ്ട്.
മുത്തശ്ശന്‍ മരിച്ചുകിടക്കുന്നത് കണ്ടിട്ടും തനിക്ക് പരീക്ഷയ്ക്ക് പോകണമെന്ന പെണ്‍കുട്ടിയുടെ മാനസീകാവസ്ഥയാണ് പോലീസിന് സംശയം ഉണ്ടാക്കിയത്. തുടര്‍ന്ന് നടത്തിയ ചോദ്യം ചെയ്യലിലാണ് പെണ്‍കുട്ടിയുടെ ക്വട്ടേഷനാണെന്ന രീതിയിലുള്ള കാര്യങ്ങളിലേക്ക് എത്തിയത്. ഐഫോണിന് വേണി മാത്രമായിരുന്നോ പെണ്‍കുട്ടിക്ക് ഇയാളോട് വൈരാഗ്യം ഉണ്ടായിരുന്നോ എന്നും അന്വേഷിക്കും.
Comments