വിഴിഞ്ഞം രാജ്യാന്തര തുറമുഖം സമ്പൂര്ണ എക്സിം പ്രവര്ത്തനങ്ങളിലേക്ക് കടന്നത് കേരളത്തിന്റെ വികസനചരിത്രത്തിലെ നിര്ണായക വഴിത്തിരിവാണ്. ഇതുവരെ പ്രധാനമായും ട്രാന്ഷിപ്പ്മെന്റ് കേന്ദ്രമായി പ്രവര്ത്തിച്ചിരുന്ന വിഴിഞ്ഞം ഇനി കേരളത്തിന്റെ സ്വന്തം ഉല്പന്നങ്ങള് ലോകവിപണിയിലെത്തിക്കുന്ന വാണിജ്യകവാടമാകാനുള്ള സാധ്യതയാണ് തുറന്നിരിക്കുന്നത്. അതുകൊണ്ടുതന്നെ ആദ്യ എക്സിം കണ്ടെയ്നറിന് തുടക്കം കുറിച്ചതും മിഷന് സമുദ്ര പ്രഖ്യാപിച്ചതും കേരളത്തിന്റെ സാമ്പത്തിക ദിശ മാറ്റാനുള്ള അവസരവുമാണ്.
ചുരുങ്ങിയ കാലത്തിനുള്ളില് ആഗോള കപ്പല്ശൃംഖലയില് വിഴിഞ്ഞം നേടിയ സ്ഥാനം അതിന്റെ സാധ്യതകളുടെ തെളിവാണ്. ആഴമേറിയ സ്വാഭാവിക തുറമുഖവും രാജ്യാന്തര കപ്പല്ച്ചാലിനോടുള്ള സാമീപ്യവും വന്കിട മദര്ഷിപ്പുകള് കൈകാര്യം ചെയ്യാനുള്ള ശേഷിയും വിഴിഞ്ഞത്തെ തന്ത്രപ്രധാനമാക്കുന്നു. എന്നാല്, ഒരു തുറമുഖത്തിന്റെ വിജയം എത്ര കണ്ടെയ്നറുകള് കൈകാര്യം ചെയ്തു എന്നതില് മാത്രം അളക്കാനാവില്ല. അതിലൂടെ കേരളത്തില് നിന്നെത്ര ഉല്പന്നങ്ങള് ലോക വിപണിയിലേക്ക് പോകുന്നു എന്നതാണ് യഥാര്ഥ മാനദണ്ഡം.
ഇവിടെയാണ് എക്സിം പ്രവര്ത്തനങ്ങളുടെ പ്രസക്തി. ട്രാന്ഷിപ്പ്മെന്റിലെ ഇടനിലകള് കുറയുന്നതിലൂടെ സമയവും ലോജിസ്റ്റിക്സ് ചെലവും കുറയ്ക്കാന് കഴിയും. പക്ഷേ, അതിന്റെ നേട്ടം ലഭിക്കണമെങ്കില് വിഴിഞ്ഞത്തെ തുറമുഖമായി മാത്രം കാണാതെ ഉല്പാദനത്തിന്റെ കേന്ദ്രമായി വികസിപ്പിക്കണം. ഭക്ഷ്യസംസ്കരണം, കശുവണ്ടി, റബര്, ഫാര്മസ്യൂട്ടിക്കല്സ്, ആയുര്വേദം, ഇലക്ട്രോണിക്സ്, ഹൈടെക് മാനുഫാക്ചറിങ്, സമുദ്രോല്പന്നങ്ങള് തുടങ്ങിയ മേഖലകളെ തുറമുഖവുമായി ബന്ധിപ്പിക്കണം.
മിഷന് സമുദ്ര ഈ ദിശയില് സമഗ്രമായ കാഴ്ചപ്പാട് മുന്നോട്ടുവയ്ക്കുന്നു. വ്യവസായ ക്ലസ്റ്ററുകള്, ലോജിസ്റ്റിക്സ് ശൃംഖല, മള്ട്ടിമോഡല് സംവിധാനങ്ങള്, ചെറുകിട തുറമുഖങ്ങളുടെ ഏകോപനം എന്നിവ യാഥാര്ഥ്യമാകണം. പ്രഖ്യാപനങ്ങള് പദ്ധതികളായും പദ്ധതികള് നിക്ഷേപമായും നിക്ഷേപം തൊഴിലായും മാറുമ്പോഴാണ് ദൗത്യം വിജയിക്കുക.
വികസനത്തോടൊപ്പം തീരദേശ പരിസ്ഥിതിയുടെയും മത്സ്യത്തൊഴിലാളി സമൂഹത്തിന്റെയും താല്പര്യങ്ങള് സംരക്ഷിക്കേണ്ടതും അനിവാര്യമാണ്. തുറമുഖം വളരുകയും തീരം നിലനില്ക്കുകയും വേണം.
വിഴിഞ്ഞം ലോകത്തെ കേരളത്തിലേക്ക് കൊണ്ടുവരാനുള്ള വാതില് തുറന്നുകഴിഞ്ഞു. ഇനി കേരളത്തെ ലോകവിപണിയിലേക്ക് കൊണ്ടുപോകുകയാണ് ലക്ഷ്യം. ഒരിക്കല് കേരളത്തിന്റെ സുഗന്ധവ്യഞ്ജനങ്ങള് കടല് കടന്ന് ലോകത്തെ തേടിയെത്തി. ഇന്ന് ആ കടല്വഴിയിലൂടെ കേരളത്തിന്റെ ഉല്പന്നങ്ങളും വൈദഗ്ധ്യവും സംരംഭകത്വവും സഞ്ചരിക്കണം. അതാണ് വിഴിഞ്ഞത്തിന്റെ വിജയം.
കേരളത്തിന്റെ മാനവശേഷിയും നിലവിലുള്ള വ്യവസായ അടിത്തറയും ഈ അവസരത്തിന് കരുത്താണ്. എന്നാല്, വ്യവസായങ്ങള് സ്വാഭാവികമായി എത്തുമെന്ന് കാത്തിരിക്കാതെ നിക്ഷേപ സൗഹൃദ അന്തരീക്ഷം ഒരുക്കണം. ഭൂമി, വൈദ്യുതി, വെള്ളം, ഗതാഗതം, കസ്റ്റംസ് സൗകര്യങ്ങള്, സംഭരണകേന്ദ്രങ്ങള്, അനുമതികള് എന്നിവ ഒരേ ശൃംഖലയായി പ്രവര്ത്തിക്കണം. ചെറുകിട-ഇടത്തരം സംരംഭങ്ങള്ക്ക് പ്രോത്സാഹനം നല്കുകയും പ്രാദേശിക ഉല്പന്നങ്ങളെ ആഗോള നിലവാരത്തിലേക്ക് ഉയര്ത്തുകയും വേണം.
വിഴിഞ്ഞത്തെ ഒരു രാഷ്ട്രീയ നേട്ടത്തിന്റെ സ്മാരകമാക്കി ചുരുക്കരുത്. ഘട്ടങ്ങളായി നിരവധി സര്ക്കാരുകളും ജനപ്രതിനിധികളും ഉദ്യോഗസ്ഥരും സാങ്കേതിക വിദഗ്ധരും തൊഴിലാളികളും ചേര്ന്നാണ് ഇത് യാഥാര്ഥ്യമാക്കിയത്. അതിന്റെ അടുത്ത ഘട്ടവും രാഷ്ട്രീയ ഭിന്നതകള്ക്കപ്പുറം കേരളത്തിന്റെ സാമ്പത്തിക താല്പര്യമായി കാണണം.
വിഴിഞ്ഞത്തിന്റെ വിജയം കപ്പലുകളുടെ എണ്ണത്തിലും കണ്ടെയ്നറുകളുടെ കണക്കിലും മാത്രം ഒതുങ്ങുന്നതല്ല. ഈ തുറമുഖം കേരളത്തില് എത്ര പുതിയ വ്യവസായങ്ങള്ക്കും സംരംഭങ്ങള്ക്കും വഴിയൊരുക്കുന്നു, എത്ര തൊഴിലവസരങ്ങള് സൃഷ്ടിക്കുന്നു, എത്രത്തോളം കയറ്റുമതി വര്ധിപ്പിക്കുന്നു എന്നതിലാണ് അതിന്റെ യഥാര്ഥ ഫലം തെളിയുക. അത് സാധ്യമാകുന്നുവെങ്കില് വിഴിഞ്ഞം തുറമുഖം സംസ്ഥാനത്തിന്റെ സാമ്പത്തിക മുന്നേറ്റത്തിന് പുതിയ ദിശ നല്കിയ കേന്ദ്രമായി മാറും.
Comments