ലഖ്നൗ: ഭാര്യയെ ഓഫീസില്നിന്ന് വിളിച്ചിറക്കി വെടിവച്ചുകൊന്നശേഷം വീട്ടിലെത്തി സഹോദരിയെയും കൊലപ്പെടുത്തിയ യുവാവ് ജീവനൊടുക്കി. ലഖ്നൗവില് ഇന്നലെയാണ് നാടിനെ നടുക്കിയ സംഭവമുണ്ടായത്. എസ്.ബി.ഐ ജീവനക്കാരനായ മാനസ് വാജ്പേയിയാണ് ഭാര്യയും ഐ.സി.ഐ.സി.ഐ. ജീവനക്കാരിയുമായ ദിവ്യ മിശ്രയെയും സ്വന്തം സഹോദരി ശിവ വാജ്പേയി(28)യെയും കൊലപ്പെടുത്തിയത്.
രണ്ടു കൊലപാതകങ്ങള്ക്കുംശേഷം ഇയാള് വീട്ടില് ജീവനൊടുക്കുകയായിരുന്നെന്നു പോലീസ് പറഞ്ഞു. ഭാര്യയ്ക്ക് വിവാഹേതരബന്ധമുണ്ടെന്നും തന്നെ വഞ്ചിച്ചെന്നും ചൂണ്ടിക്കാട്ടിയാണ് മാനസ് ജീവനൊടുക്കിയതെന്നും പോലീസ് പറഞ്ഞു. ഇക്കാര്യം മാനസ് വാട്ട്സ്ആപ്പ് സ്റ്റാറ്റസ് ആയി പങ്കുവയ്ക്കുകയും ചെയ്തിട്ടുണ്ട്.
12 വര്ഷം മുമ്പ് വിവാഹിതരായ മാനസും ദിവ്യയും ഒരു വര്ഷമായി വേര്പിരിഞ്ഞ് താമസിക്കുകയാണ്. ഇന്നലെ ഉച്ചയോടെ ഐ.സി.ഐ.സി.ഐ. ബാങ്കിലെത്തിയ ഇയാള് ഭാര്യയെ ഓഫീസിനു പുറത്തേക്ക് വിളിച്ചിറക്കി സംസാരിച്ചശേഷം വെടിവച്ചുകൊലപ്പെടുത്തുകയായിരുന്നു. ഉടന്തന്നെ ദിവ്യയെ ആശുപത്രിയിലെത്തിച്ചെങ്കിലും രക്ഷപ്പെടുത്താനായില്ല. സംഭവസ്ഥലത്തുനിന്ന് രക്ഷപ്പെട്ട മാനസ് വീട്ടിലെത്തിയശേഷം തന്റെ സഹോദരി ശിവ വാജ്പേയിയെയും കൊലപ്പെടുത്തുകയായിരുന്നു. ശിവ മാനസികവെല്ലുവിളി നേരിടുന്നയാളാണെന്നു പോലീസ് പറഞ്ഞു.
തുടര്ന്ന് രണ്ടു കൊലപാതകങ്ങള് നടത്തിയ വിവരം വാട്ട്സ്ആപ്പില് സ്റ്റാറ്റസ് ഇട്ടശേഷം മാനസും ജീവനൊടുക്കുകയായിരുന്നു. 'എന്നെ ചതിച്ച ഭാര്യയെ ഇന്ന് ഞാന് കൊന്നു. ഇനി സഹോദരിയെയും കൊലപ്പെടുത്തിയശേഷം എനിക്ക് ആത്മഹത്യ ചെയ്യണം... അവളുടെ സഹോദരി പ്രജ്ഞയ്ക്കും ഭാരതിനും എല്ലാം അറിയാം'- എന്നാണ് മാനസ് വാട്ട്സ്ആപ്പില് സ്റ്റാറ്റസ് ഇട്ടിരിക്കുന്നത്.
Comments