കുമളി: സുപ്രീം കോടതി ഉത്തരവിനു പിന്നാലെ മുല്ലപ്പെരിയാറിലെത്തിയ വിദഗ്ധ സമിതി അണക്കെട്ടിലെ ആദ്യഘട്ട പരിശോധന പൂര്ത്തിയാക്കി. സമിതി ചെയര്മാന് ബല്രാജ് ജോഷിയുടെ നേതൃത്വത്തിലുള്ള സംഘമാണ് ഇന്നലെ അണക്കെട്ടിലെത്തിയത്. ആദ്യഘട്ട പരിശോധന പൂര്ത്തിയായെന്നും റിപ്പോര്ട്ട് 15 ദിവസത്തിനകം ദേശീയ ഡാം സുരക്ഷ അതോറിറ്റിക്ക് സമര്പ്പിക്കുമെന്നും ബല്രാജ് ജോഷി പറഞ്ഞു. ഇന്ന് നടക്കുന്ന യോഗത്തില് കൂടുതല് പരിശോധന വേണമോയെന്ന് ചര്ച്ച ചെയ്ത് തീരുമാനിക്കും. സുരക്ഷയുമായി ബന്ധപ്പെട്ട എല്ലാ ഘടകങ്ങളും പരിശോധിക്കും. റിപ്പോര്ട്ട് നിഷ്പക്ഷമായിരിക്കുമെന്നും അദ്ദേഹം അറിയിച്ചു.
ഒഡീഷ ജലവിഭവ വകുപ്പ് മുന് മെമ്പര് സെക്രട്ടറി അശുതോഷ് ദാസ് ആണ് സമിതിയില് കേരളത്തിന്റെ പ്രതിനിധി. കോതമംഗലം സ്വദേശി ജോ ജോസഫ് നല്കിയ കേസില് 2022 ലാണ് മുല്ലപ്പെരിയാറില് പുതിയതായി സമഗ്ര സുരക്ഷ പരിശോധന നടത്താന് സുപ്രീം കോടതി നിര്ദേശിച്ചത്.
തേക്കടി ലാന്ഡിങ്ങില്നിന്ന് കേരളത്തിന്റെയും തമിഴ്നാടിന്റെയും വെവ്വേറെ ബോട്ടുകളിലാണ് പരിശോധന സംഘം അണക്കെട്ടില് എത്തിയത്. പ്രധാന അണക്കെട്ട്, ബേബി ഡാം, സ്പില്വേ ഷട്ടറുകള്, അണക്കെട്ട് ഗ്യാലറി, മഴമാപിനി, ഭൂചലനങ്ങള് രേഖപ്പെടുത്തുന്ന സീസ്മോഗ്രാഫ് ഉള്പ്പെടെയുള്ള സംവിധാനങ്ങളും, അവയുടെ പ്രവര്ത്തനക്ഷമതയും സംഘം വിശദമായി പരിശോധിച്ചു.
അണക്കെട്ടിന്റെ നിലവിലെ ഘടനാപരമായ സ്ഥിതി, സുരക്ഷാ സംവിധാനങ്ങളുടെ പ്രവര്ത്തനക്ഷമത, ഡാം ചുവരുകളിലെ ചോര്ച്ച എന്നിവയുടെ പരിശോധന നിര്ണായകമാണ്. സമീപ കാലത്ത് രാജ്യത്തിന്റ വിവിധ ഭാഗങ്ങളിലുണ്ടായ മേഘ വിസ്ഫോടനവും തുടര്ന്നുണ്ടായ ജലപ്രളയങ്ങളും മുല്ലപ്പെരിയാര് അണക്കെട്ടിന്റ താഴ്വാരങ്ങളില് ഭീതി പരത്തിയിട്ടുണ്ട്. സമഗ്രമായ പരിശോധനാ റിപ്പോര്ട്ട് കേന്ദ്ര സര്ക്കാരിനും കേന്ദ്ര ജല കമ്മിഷനും കേന്ദ്ര ഡാം സുരക്ഷാ അതോറിറ്റിക്കും സമര്പ്പിക്കുമെന്നാണ് വിവരം. മുല്ലപ്പെരിയാര് അണക്കെട്ടിലെ ജല നിരപ്പ് ഇന്നലെ 122.45 അടിയാണ്.
Comments