ടെഹ്റാന്/വാഷിങ്ടണ്: വിവാഹച്ചടങ്ങിനിടെ നാലു വയസുകാരന് ഉള്പ്പെടെ അഞ്ചുപേര് കൊല്ലപ്പെട്ടതടക്കമുള്ള ആക്രമണങ്ങള്ക്ക് പിന്നാലെ പശ്ചിമേഷ്യയിലെ യു.എസ്. താവളങ്ങളില് ഇറാന്റെ തിരിച്ചടി.
ജോര്ദാന്, യു.എ.ഇ, കുവൈത്ത്, ബഹ്റൈന്, ഇറാഖിന്റെ സ്വയംഭരണ പ്രദേശമായ കുര്ദിസ്ഥാന് എന്നിവിടങ്ങളിലെ യു.എസ്. താവളങ്ങളില് ആക്രമണം നടത്തിയതായി ഇറാന്റെ റെവല്യൂഷണറി ഗാര്ഡ്സ് അറിയിച്ചു. ആഴ്ചകള്ക്കിടയിലെ ഏറ്റവും ശക്തമായ ഏറ്റുമുട്ടലാണിത്. ജോര്ദാനിലെ യു.എസ്. മറീന് കോര് താവളമായ ക്യാമ്പ് ടിറ്റിന് നേരെയും ബാലിസ്റ്റിക് മിസൈല് ആക്രമണം നടന്നു.
അമേരിക്കന് ആക്രമണങ്ങളുടെ പേരില് തിരിച്ചടിച്ചാല് കൂടുതല് ശക്തവും കഠിനവുമായ ആക്രമണങ്ങളുണ്ടാകുമെന്ന് യു.എസ്. പ്രസിഡന്റ് ഡോണള്ഡ് ട്രംപ് മുന്നറിയിപ്പ് നല്കിയതിന് പിന്നാലെയാണ് ഇറാന്റെ ആക്രമണപരമ്പര.
ഇറാന്റെ വിവിധ കേന്ദ്രങ്ങളില് ചൊവ്വാഴ്ച യു.എസ്. ആക്രമണം നടത്തിയിരുന്നു. ഇസ്ലാമിക് റെവല്യൂഷണറി ഗാര്ഡുമായി ബന്ധപ്പെട്ട വ്യോമ പ്രതിരോധ കേന്ദ്രങ്ങള്, റഡാര് സംവിധാനങ്ങള്, സമുദ്ര ആസ്തികള്, മൈന് സ്ഥാപിക്കാനുള്ള ശേഷി, ആശയവിനിമയ കേന്ദ്രങ്ങള് എന്നിവ തങ്ങള് ലക്ഷ്യമിട്ടതായി യു.എസ്. സെന്ട്രല് കമാന്ഡ് അറിയിച്ചു.
ഹോര്മുസ് കടലിടുക്കില് വാണിജ്യ കപ്പലുകള്ക്ക് നേരെയും അമേരിക്കന് സൈനികര്ക്ക് നേരെയും ഇറാന് നടത്തിയ സമീപകാല ആക്രമണശ്രമങ്ങളെത്തുടര്ന്നാണിതെന്നും യു.എസ്. സെന്ട്രല് കമാന്ഡ് അറിയിച്ചു.
ഹോര്മുസ് കടലിടുക്കിനോടു ചേര്ന്ന തീരപ്രദേശമായ സിരികിലെ കുഹെസ്താക്കിലാണ് ഒരു കുട്ടിയടക്കം അഞ്ചുപേര് കൊല്ലപ്പെട്ടത്. 70 പേര്ക്കു പരുക്കേറ്റു. ഒരു വിവാഹച്ചടങ്ങിനെത്തിയവരാണ് ആക്രമിക്കപ്പെട്ടത്. സംഭവത്തെ ഇറാന് വിദേശമന്ത്രാലയം അപലിച്ചു. '
ഈ ക്രൂരതയെ മുന്കാല ആക്രമണങ്ങളില്നിന്ന് വേര്പെടുത്തി കാണാന് കഴിയില്ല. 'മിനാബ്, അലാമെര്ഡ്, ഖെഷം തുടങ്ങി പല സ്ഥലങ്ങളിലും സൈനികലക്ഷ്യങ്ങള്ക്കുനേരേയെന്ന വ്യാജേന നടത്തിയ കൊടുംക്രൂരതകള്ക്കു സമാനമാണിത്.'- ഇറാന് വിദേശമന്ത്രാലയ വക്താവ് പറഞ്ഞു.
അതിനിടെ, തിരിച്ചടിക്ക് ഇറാന് തുനിഞ്ഞാല് ആ രാജ്യത്തിന്റെ അവശിഷ്ടം മാത്രമേ ബാക്കിയുണ്ടാവൂ എന്ന് യു.എസ്. പ്രസിഡന്റ് ഡോണള്ഡ് ട്രംപ് പറഞ്ഞു. പ്രധാന സമുദ്രപാതയുടെ നിയന്ത്രണം വാഷിങ്ടണിന്റെ കൈയിലാണെന്നും അമേരിക്കന് ഉപരോധങ്ങളും യുദ്ധവും മൂലം ഇറാന്റെ സമ്പദ്വ്യവസ്ഥ തകരുകയാണെന്നും ട്രംപ് പറഞ്ഞു. എന്നാല്, ഇത് അവഗണിച്ചുകൊണ്ടായിരുന്നു പശ്ചിമേഷ്യയിലെ യു.എസ്. താവളങ്ങള് ഇറാന് ലക്ഷ്യമിട്ടത്.
Comments