കൊച്ചി: പറവൂരില്‍ പ്രിയദര്‍ശിനി ബസില്‍ പെണ്‍കുട്ടിയെ അപമാനിച്ചെന്ന പരാതിയില്‍ കണ്ടക്ടര്‍ക്കെതിരെ പോലീസ് കേസെടുത്തു. ഗുരുവായൂര്‍ - എറണാകുളം റൂട്ടില്‍ സര്‍വീസ് നടത്തുന്ന എറണാകുളം ഡിപ്പോയിലെ ആര്‍.എസ്.എ 173 'പ്രിയദര്‍ശിനി' ബസിലാണ് കേസിനാസ്പദമായ സംഭവം നടന്നത്.
യാത്രയ്ക്കിടെ പ്ലസ് ടു വിദ്യാര്‍ത്ഥിനിയോട് മോശമായി പെരുമാറുകയും അപമാനിക്കുകയും ചെയ്‌തെന്ന കെഎസ്ആര്‍ടിസി കണ്ടക്ടര്‍ക്കെതിരായ പരാതിയിലാണ് നടപടി വന്നത്. കണ്ടക്ടറെ സര്‍വീസില്‍ നിന്ന് സസ്‌പെന്‍ഡ് ചെയ്തു.
ശനിയാഴ്ച യാത്രയ്ക്കിടെ വിദ്യാര്‍ത്ഥിനി സീറോ ടിക്കറ്റ് ആവശ്യപ്പെട്ടപ്പോള്‍ നല്‍കാന്‍ കഴിയില്ലെന്ന് കണ്ടക്ടര്‍ പറയുകയായിരുന്നു. തുടര്‍ന്ന് പെണ്‍കുട്ടിയാണെന്ന് കണ്ടാല്‍ തോന്നില്ല എന്ന് പറഞ്ഞ് അധിക്ഷേപിക്കുകയും സ്ത്രീത്വത്തെ അപമാനിക്കുന്ന രീതിയില്‍ സംസാരിക്കുകയും ചെയ്‌തെന്നാണ് കേസ്. കണ്ടക്ടര്‍ മറ്റ് യാത്രക്കാരോടും മോശമായി പെരുമാറിയെന്ന് പരാതിയില്‍ പറയുന്നു.
പറവൂര്‍ പോലീസ് സ്റ്റേഷനില്‍ ലഭിച്ച പരാതിയെത്തുടര്‍ന്ന് കെഎസ്ആര്‍ടിസി വിജിലന്‍സ് വിഭാഗം പ്രാഥമിക അന്വേഷണം നടത്തി. കണ്ടക്ടറുടെ ഭാഗത്തുനിന്ന് ഗുരുതരമായ വീഴ്ച സംഭവിച്ചതായി കണ്ടെത്തിയതിനെ തുടര്‍ന്ന് സിഎംഡിയുടെ നിര്‍ദേശപ്രകാരമാണ് സസ്പെന്ഷന് നടപടി സ്വീകരിച്ചത്.
Comments