"സേവനമാണ് ധർമ്മം, മുന്നേറുന്നത് ലക്ഷ്യങ്ങൾക്കുവേണ്ടിയാണ്, അഭിലാഷങ്ങൾക്കുവേണ്ടിയല്ല": പ്രധാനമന്ത്രി മോദി

ന്യൂഡൽഹി: സേവനമാണ് തന്റെ ധർമ്മമെന്നും ലക്ഷ്യങ്ങൾക്ക് വേണ്ടിയാണ്, അഭിലാഷങ്ങൾക്ക് വേണ്ടിയല്ല താൻ മുന്നേറുന്നതെന്നും പ്രധാനമന്ത്രി നരേന്ദ്ര മോദി. തന്റെ 25 വർഷത്തെ പൊതുസേവനത്തിന്റെ ഭാഗമായി ബിജെപി സംഘടിപ്പിച്ച 'സേവാ സങ്കൽപ്പ് അഭിയാന്റെ' ഭാഗമായുള്ള 'വികസിത് ഭാരത് സങ്കൽപ്പ് സഭയിൽ' സ്വീകരണം ഏറ്റുവാങ്ങി സംസാരിക്കുകയായിരുന്നു അദ്ദേഹം.

"2001 ഒക്ടോബർ 7-ന് ഞാൻ ഗുജറാത്ത് മുഖ്യമന്ത്രിയായി സത്യപ്രതിജ്ഞ ചെയ്യുമ്പോൾ ഇങ്ങനെയൊരു നാഴികക്കല്ല് മുന്നിലെത്തുമെന്ന് ഒരിക്കലും കരുതിയിരുന്നില്ല. ഭരണത്തലവനെന്ന നിലയിൽ ഞാൻ ഇന്ന് 25 വർഷത്തെ തുടർച്ചയായ സേവനം പൂർത്തിയാക്കിയിരിക്കുന്നു. ജനങ്ങളുടെ നിരന്തരമായ അനുഗ്രഹം കൊണ്ടുമാത്രമാണ് ഇത് സാധ്യമായത്. ജനാധിപത്യത്തിൽ വലിയ വിശ്വാസമർപ്പിക്കുന്ന ഇന്ത്യയിലെ ജനങ്ങൾക്കും ബിജെപി, എൻഡിഎ കൂട്ടുകെട്ടിനും എല്ലാ രാഷ്ട്രീയ സഹപ്രവർത്തകർക്കും ഞാൻ നന്ദി രേഖപ്പെടുത്തുന്നു,"

"സേവനമാണ് ധർമ്മം," 76-കാരനായ പ്രധാനമന്ത്രി വ്യക്തമാക്കി. താൻ "മുന്നേറുന്നത് ലക്ഷ്യങ്ങൾക്കുവേണ്ടിയാണ്, അഭിലാഷങ്ങൾക്കുവേണ്ടിയല്ല" എന്നും അദ്ദേഹം പറഞ്ഞു. സാംസ്കാരിക പൈതൃകവും മഹത്തായ ചിന്തകളും നിറഞ്ഞ രാജ്യത്തെ സേവിക്കുന്നത് തനിക്ക് എപ്പോഴും ശക്തി നൽകിയിട്ടുണ്ടെന്ന് അദ്ദേഹം പറഞ്ഞു.

വഡ്‌നഗറിലെ സ്കൂൾ കാലഘട്ടം ഓർത്തെടുത്ത പ്രധാനമന്ത്രി, ക്ലാസ്സിൽ വേഗത്തിൽ എത്തുന്ന ആദ്യ വിദ്യാർത്ഥികളിൽ ഒരാളായിരുന്നു താനെന്ന് പറഞ്ഞു. "വഡ്‌നഗറിലെ സ്‌കൂളിൽ പഠിക്കുമ്പോൾ ഞങ്ങളുടെ മാസ്റ്റർജി ഞങ്ങളെ പലതരം പാഠങ്ങൾ പഠിപ്പിച്ചത് ഞാൻ ഓർക്കുന്നു. ക്ലാസ്സിൽ ആദ്യം എത്തുന്ന വിദ്യാർത്ഥികളിൽ എപ്പോഴും എന്റെ പേരുമുണ്ടായിരുന്നു. പുതിയ കാര്യങ്ങൾ പഠിക്കാനുള്ള ആ ആഗ്രഹം എന്റെ ജീവിതത്തിന്റെ ഭാഗമായി മാറി. ഇന്നും ഞാൻ എന്നെ ഒരു വിദ്യാർത്ഥിയായാണ് കാണുന്നത്; ദിവസവും പുതിയത് എന്തെങ്കിലും പഠിക്കാൻ ഞാൻ ശ്രമിക്കുന്നു," പ്രധാനമന്ത്രി പറഞ്ഞു.

തന്റെ ജീവിതയാത്രയിലേക്ക് തിരിഞ്ഞുനോക്കുമ്പോൾ വലിയ കൃതജ്ഞത തോന്നുണ്ടെന്നും, തനിക്ക് ഏറെ കാര്യങ്ങൾ പഠിപ്പിച്ചു തന്ന വിമർശകരോടും നന്ദിയുള്ളവനാണെന്നും അദ്ദേഹം കൂട്ടിച്ചേർത്തു. "എന്നെ എന്തെങ്കിലും പഠിപ്പിച്ച ഓരോ വ്യക്തിയോടും അനുഭവത്തോടും ഞാൻ കടപ്പെട്ടിരിക്കുന്നു. എന്നെ കാര്യങ്ങൾ പഠിപ്പിച്ചവർ വിനയം പഠിപ്പിച്ചു. എന്നെ താഴെയിറക്കാൻ ശ്രമിച്ചവർ വീണ്ടും എങ്ങനെ ഉയർന്നുനിൽക്കണമെന്ന് പഠിപ്പിച്ചു. എന്റെ പിന്തുണക്കാർ എന്നെ പ്രോത്സാഹിപ്പിച്ചു, എന്നാൽ എന്റെ വിമർശകർ സ്വന്തം ഉള്ളിലേക്ക് തിരിഞ്ഞുനോക്കാൻ എന്നെ പഠിപ്പിച്ചു. എന്റെ ഒപ്പം നിന്നവർ വിശ്വാസത്തിന്റെ ശക്തി കാണിച്ചുതന്നു," അദ്ദേഹം പറഞ്ഞു.

"ഓരോ പ്രതിസന്ധിയും എന്റെ ക്ഷമയെ പരീക്ഷിച്ചു, ഓരോ വിജയവും എന്റെ ഉത്തരവാദിത്തങ്ങൾ വർദ്ധിപ്പിച്ചു, ഓരോ നേട്ടവും വലിയ ലക്ഷ്യങ്ങളിലേക്ക് മുന്നേറാനുള്ള ധൈര്യവും നിശ്ചയദാർഢ്യവും നൽകി," പ്രധാനമന്ത്രി കൂട്ടിച്ചേർത്തു. തന്റെ പഠനത്തിന് വഴിതിരിച്ചുവിട്ട നിർണായക സംഭവങ്ങളും പ്രധാനമന്ത്രി എടുത്തുപറഞ്ഞു. പുനർനിർമ്മാണത്തിൽ ഉറച്ചുനിൽക്കാൻ പഠിപ്പിച്ച 2001-ലെ ഭുജ് ഭൂകമ്പം; പരാജയങ്ങളിൽ നിന്ന് ഉയർത്തെഴുന്നേൽക്കാൻ പഠിപ്പിച്ച ചന്ദ്രയാൻ ദൗത്യം; രാജ്യത്തിന്റെ കൂട്ടായ ബോധത്തിന്റെ പ്രാധാന്യം മനസ്സിലാക്കിത്തന്ന കോവിഡ് പ്രതിസന്ധി എന്നിവ അദ്ദേഹം ഓർത്തെടുത്തു. "കയ്പ്പും മധുരവും നിറഞ്ഞ അനുഭവങ്ങൾക്കിടയിൽ മുന്നോട്ട് പോകാൻ" പ്രചോദനം നൽകിയതിന് മാധ്യമങ്ങൾക്കും അദ്ദേഹം നന്ദി പറഞ്ഞു.

ഈ ദിവസം വെറും ഓർമ്മകൾ പുതുക്കാനല്ല, മറിച്ച് ഭാവിക്കായുള്ള പുതിയൊരു പ്രതിജ്ഞ എടുക്കാനാണെന്നും പ്രധാനമന്ത്രി അടിവരയിട്ടു. "ഈ വാഗ്ദാനം വീണ്ടും ഓർമ്മിപ്പിക്കുന്ന ദിനമാണിത്; 'നാം അത് തീർച്ചയായും കൈവരിക്കും' എന്ന് പറയുന്ന പ്രഖ്യാപനത്തിന്റെ ദിവസമാണിത്. നാം അത് നേടും; നാം അത് ചെയ്യും, നാം അത് ചെയ്യും, നാം അത് ചെയ്യും," 2047-ലേക്ക് രാജ്യത്തിന്റെ വികസന യാത്രയെ നയിക്കുന്ന ലക്ഷ്യങ്ങൾ മുൻനിർത്തി അദ്ദേഹം പ്രതിജ്ഞയെടുത്തു.