വടകര: കേരളത്തില്‍ വന്‍ചര്‍ച്ചയായി മാറിയ വടകര എംഡിഎംഎ ലഹരിക്കടത്ത് കേസില്‍ അവസാനം പിടിയിലായ അനസിന് സെക്‌സ് റാക്കറ്റുമായും ബന്ധം സംശയിച്ച് പോലീസ്. അനേകം പെണ്‍കുട്ടികള്‍ ഇയാളുടെ വലയില്‍ ആയിട്ടുണ്ടെന്നും രാസലഹരി നല്‍കി അടിമപ്പെടുത്തിയും ഭീഷണിപ്പെടുത്തിയും സംഘത്തില്‍ എത്തിക്കുകയും കാരിയര്‍മാരാക്കി ഉപയോഗിക്കുകയും ചെയ്തിരുന്നതായിട്ടാണ് വിവരം.
കേസില്‍ ആറാം പ്രതിയായാണ് അനസിനെ ഉള്‍പ്പെടുത്തിയിരിക്കുന്നത്. ബിആര്‍സി അദ്ധ്യാപകരില്‍ കീര്‍ത്തനയെ സംഘത്തില്‍ എത്തിച്ചതും അനസായിരുന്നു. ഇയാളുടെ കൂത്താളിയിലുള്ള വീടിനടുത്ത് കീര്‍ത്തന വാടകയ്ക്ക് താമസിക്കാന്‍ എത്തിയപ്പോള്‍ പരിചയപ്പെടുകയും അടുപ്പമുണ്ടാക്കി ലഹരി നല്‍കുകയുമായിരുന്നു. കീര്‍ത്തന പിന്നീട് സഹഅദ്ധ്യാപികമാരായ നീഷ്മ, കാവ്യ എന്നിവരെ സംഘത്തിലേക്ക് കൊണ്ടുവന്നു. അനേകം പെണ്‍കുട്ടികളെ അനസ് ഈ രീതിയില്‍ കാരിയര്‍മാരാക്കി മാറ്റിയതായി പോലീസ് സംശയിക്കുന്നു.
പോലീസിനെ അക്രമിച്ച കേസില്‍ അറസ്റ്റിലാണ് അനസ് ഇപ്പോള്‍. കസ്റ്റഡിയില്‍ ചോദ്യം ചെയ്യലില്‍ നിന്നുമാണ് സെക്‌സ്‌റാക്കറ്റുമായുള്ള ബന്ധം പുറത്തുവന്നത്. കൂടുതല്‍ അന്വേഷണം നടത്തിവരികയാണ്. അറസ്റ്റിലായ ബിആര്‍സി അധ്യാപികമാര്‍ക്ക് പുറമെ കൂടുതല്‍ സ്ത്രീകളെ ലഹരി ശൃംഖലയുടെ ഭാഗമാക്കാന്‍ നീക്കം നടന്നതായി അനസിന്റെ ചോദ്യംചെയ്യലിലും ഫോണ്‍ പരിശോധനയിലും സൂചന ലഭിച്ചിട്ടുണ്ട്. ആദ്യം പെണ്‍കുട്ടികളെ പരിചയപ്പെടും. അതിന് ശേഷം അടുപ്പമുണ്ടാക്കി ഇവര്‍ക്ക് രാസലഹരി നല്‍കി വലയിലാക്കും. പിന്നീട് ഭീഷണിപ്പെടുത്തി കാരിയര്‍മാരായി ഉപയോഗിക്കുന്നതാണ് രീതി.
നേരത്തേ കേസുമായി ബന്ധപ്പെട്ട് അനസിന്റെ മൊബൈല്‍ ഫോണ്‍ കേന്ദ്രീകരിച്ച് നടത്തിയ ശാസ്ത്രീയ പരിശോധനയില്‍ പൊലീസിന് സുപ്രധാന വിവരങ്ങള്‍ ലഭിച്ചു. സാമ്പത്തിക സഹായത്തിന് പുറമെ, ഡെലിവറി കേന്ദ്രങ്ങള്‍ നിര്‍ണ്ണയിക്കുന്നതിലും ആവശ്യക്കാര്‍ക്ക് ലഹരി കൈമാറുന്ന പ്രക്രിയ ഏകോപിപ്പിക്കുന്നതിലും ഇയാള്‍ പ്രധാന പങ്ക് വഹിച്ചിരുന്നു. ലഹരി ആവശ്യപ്പെട്ട് എത്തുന്നവര്‍ക്ക് സാധനം എത്തിച്ചുനല്‍കേണ്ട സുരക്ഷിതമായ ലൊക്കേഷനുകള്‍ അറിയിക്കുന്നതും അനസ് തന്നെയാണ്. ഗൂഗിള്‍മാപ്പ് ഉപയോഗിച്ച് എത്തേണ്ട സ്ഥലം ഇടപാടുകാരന് വാട്‌സാപ്പ് ചെയ്യും.
വടകര താഴെ അങ്ങാടി സ്വദേശിയായ സഫ്വാന്‍ എന്നയാളെ രണ്ട് ഗ്രാം എംഡിഎംഎയുമായി പൊലീസ് പിടികൂടിയതോടെയാണ് ലഹരി ശൃംഖലയുടെ ചുരുളഴിയുന്നത്. സഫ്വാനെ വിശദമായി ചോദ്യം ചെയ്തതില്‍ നിന്നും ലഭിച്ച വിവരങ്ങളാണ് അന്വേഷണം ഉന്നത തലത്തിലേക്ക് വ്യാപിപ്പിക്കാന്‍ പൊലീസിനെ സഹായിച്ചത്. തുടര്‍ന്ന് നടത്തിയ അന്വേഷണത്തിലാണ് സാമ്പത്തിക ഇടനിലക്കാരായി പ്രവര്‍ത്തിച്ച മൂന്ന് ബിആര്‍സി സ്പെഷ്യലിസ്റ്റ് അധ്യാപികമാരിലേക്ക് പൊലീസ് എത്തുന്നത്.
കേസിലെ ആറുപ്രതികളില്‍ അഞ്ചുപേരും ജാമ്യം കിട്ടി പുറത്തുവന്നിട്ടുണ്ട്. ബിആര്‍സി അധ്യാപകരായ മൂന്നുപേര്‍ക്കും അഞ്ചാം പ്രതിയായ ജിജിന്‍ കുര്യാക്കോസിനുമാണ് വടകര എന്‍ഡിപിഎസ് കോടതി ജാമ്യം നല്‍കിയത്. അതേസമയം മുഖ്യപ്രതിയായ വയനാട് സ്വദേശിയെ ഇതുവരെ കണ്ടെത്താനായിട്ടില്ല. അനസിനെ കസ്റ്റഡിയിലെടുക്കാന്‍ ശ്രമിക്കുന്നതിനിടെ പേരാമ്പ്ര പൊലീസ് സ്റ്റേഷനിലെ ഉദ്യോഗസ്ഥര്‍ക്കും ഡാന്‍സാഫ് സ്‌ക്വാഡ് അംഗങ്ങള്‍ക്കും നേരെ അതിക്രമം നടന്നിരുന്നു. അനസും സഹോദരന്‍ ആസിഫും ചേര്‍ന്നാണ് പൊലീസുകാരെ ആക്രമിച്ചത്. ഇതോടെയാണ് ഇരുവേരയും പൊലീസ് മറ്റ് കേസുകളില്‍ കസ്റ്റഡിയിലെടുത്തതും പിന്നീട് റിമാന്‍ഡ് ചെയ്തതും.
Comments