കൊച്ചി: പേരണ്ടൂര്‍ കനാല്‍ തീരത്തെ പി.ആന്‍ഡ്‌.ടി കോളനി നിവാസികളെ പുനരധിവസിപ്പിച്ച മുണ്ടംവേലിയിലെ അപ്പാര്‍ട്ടുമെന്റിന്റെ ശോച്യാവസ്‌ഥ വിവരിച്ച്‌ അമിക്കസ്‌ക്യൂറി റിപ്പോര്‍ട്ട്‌. അപ്പാര്‍ട്ടുമെന്റുകളിലെ ശൗചാലയത്തിലും അടുക്കളയിലും നിന്നുമുള്ള മലിനജലം താഴെയുള്ള അപ്പാര്‍ട്ടുമെന്റുകളിലേക്ക്‌ ഒലിച്ചിറങ്ങുന്നുവെന്നതടക്കം ചൂണ്ടിക്കാട്ടിയാണ്‌ അഡ്വ. ഗോവിന്ദ്‌ പത്മനാഭന്റെ റിപ്പോര്‍ട്ട്‌. റിപ്പോര്‍ട്ട്‌ ഞെട്ടിക്കുന്നതാണെന്നും ഈ ദുരവസ്‌ഥയ്‌ക്ക്‌ ഉത്തരവാദികളായവരെ കണ്ടെത്തണമെന്നും റിപ്പോര്‍ട്ട്‌ പരിശോധിച്ച ജസ്‌റ്റിസ്‌ ദേവന്‍ രാമചന്ദ്രന്‍ പറഞ്ഞു. ഇതില്‍ കരാറുകാര്‍ക്കും ഉത്തരവാദിത്വമുണ്ടെന്ന്‌ കോടതി വ്യക്‌തമാക്കി.
സെപ്‌റ്റിക്‌ ടാങ്കില്‍ നിന്നുള്ള മലിനജലം തുറസായ സ്‌ഥലങ്ങളിലേക്ക്‌ കവിഞ്ഞൊഴുകുകയാണെന്ന്‌ അമിക്കസ്‌ക്യുറിയുടെ റിപ്പോര്‍ട്ടില്‍ പറയുന്നു. മലിനജല സംസ്‌കരണ പ്ലാന്റിന്റെ ശേഷി അപര്യാപ്‌തമാണ്‌. അഴുക്കുവെള്ളം ചോര്‍ന്നൊലിക്കുന്നതിനാല്‍ അപ്പാര്‍ട്ട്‌മെന്റിന്റെ സ്‌റ്റീല്‍ തൂണുകളും ഷീറ്റുകളും തുരുമ്പെടുക്കുന്നു. അപ്പാര്‍ട്ട്‌മെന്റില്‍ ലിഫ്‌റ്റ്‌ സൗകര്യമില്ല. സമീപത്തായി കടന്നുപോകുന്ന 110 കെ.വി. ഹൈടെന്‍ഷന്‍ ലൈനില്‍ നിന്ന്‌ പാലിക്കേണ്ട നിര്‍ബന്ധിത സുരക്ഷാ അകലം പാലിച്ചിട്ടില്ല. ഇലക്‌ട്രിക്കല്‍ കണ്‍ട്രോള്‍ റൂമുകളിലെ ഉപകരണങ്ങളുടെ അടിത്തറ തുരുമ്പിച്ച നിലയിലാണ്‌. കൃത്യമായി എര്‍ത്തിങ്‌ സംവിധാനമോ അഗ്‌നിനിയന്ത്രണ സംവിധാനമോ ഇല്ല.
Comments