സാന്റിയാഗോ ബെര്‍ണേബു: തുടര്‍ച്ചയായ തിരിച്ചടികള്‍ക്ക് പിന്നാലെ വിജയവഴിയില്‍ തിരിച്ചെത്തി സ്പാനിഷ് വമ്പന്മാരായ റയല്‍ മാഡ്രിഡ്. സെവിയ്യയെ ഒന്നിനെതിരേ നാലുഗോളുകള്‍ക്ക് തകര്‍ത്തുവിട്ടു. കിലിയന്‍ എംബാപ്പേ ഇരട്ടഗോളുകളുമായി ടീമിന്റെ വിജയത്തില്‍ നിര്‍ണ്ണായക പങ്ക് വഹിച്ചു. ഗുലാറും ഡിയോമാണ്ടേയുമായിരുന്നു മറ്റു സ്‌കോറര്‍മാര്‍.
കളിയുടെ 30 ാം മിനിറ്റില്‍ റയല്‍ മുന്നിലെത്തി. ആര്‍ഡ ഗൂലറുടെ തകര്‍പ്പന്‍ ഗോളിലൂടെ ജോസ് മൗറീഞ്ഞോയുടെ സംഘം അക്കൗണ്ട് തുറന്നു. ഗോള്‍കീപ്പര്‍ ഒഡിസീസ് വ്‌ലാചോഡിമോസിനെ കബളിപ്പിച്ച് പന്ത് വലയിലെത്തിച്ച എംബാപെ, ഏഴ് മിനിറ്റിനുള്ളില്‍ റിയലിന്റെ ലീഡ് ഇരട്ടിയാക്കി. തുടര്‍ന്ന് താരം പെനാല്‍റ്റിയില്‍ നിന്നും മറ്റൊരു ഗോള്‍ കൂടി കുറിച്ചു. ബോക്‌സിനുള്ളില്‍ വെച്ച് സെവിയ്യ പ്രതിരോധം തന്നെ വീഴ്ത്തിയതിന് കിട്ടിയ പെനാല്‍റ്റി മുതലാക്കുകയായിരുന്നു. മത്സരത്തിന്റെ അവസാന സമയത്ത് സെവിയ്യക്കായി മനു ബുയെനോ ഒരു ഗോള്‍ മടക്കിയെങ്കിലും, യാന്‍ ഡിയോമാന്‍ഡെയുടെ തകര്‍പ്പന്‍ ഗോളിലൂടെ റിയല്‍ മാഡ്രിഡ് വിജയം സുരക്ഷിതമാക്കി.
ജയത്തോടെ ലാ ലിഗയില്‍ ഒന്നാമതുള്ള ബാഴ്സലോണയുമായുള്ള പോയിന്റ് വ്യത്യാസം ആറായി നിലനിര്‍ത്താന്‍ റിയലിന് കഴിഞ്ഞു. ഒക്ടോബര്‍ 25-ന് ബാഴ്സലോണയ്ക്കെതിരെ നടക്കുന്ന എല്‍ ക്ലാസിക്കോ മത്സരം വരാനിരിക്കെ, റിയല്‍ മാഡ്രിഡിനെ സംബന്ധിച്ചിടത്തോളം ഇത് വളരെ നിര്‍ണ്ണായകമായ മൂന്ന് പോയിന്റുകളാണ്. സീസണില്‍ മികച്ച തുടക്കം കുറിച്ച എംബാപെ, എല്ലാ ടൂര്‍ണമെന്റുകളിലുമായി വെറും 11 മത്സരങ്ങളില്‍ നിന്നാണ് 11 ഗോളുകള്‍ നേടിയത്.
Comments