തിരുവനന്തപുരം: തലസ്ഥാനത്ത് ഒരു കുടുംബത്തിലെ മൂന്ന് പേരെ മരിച്ച നിലയില് കണ്ടെത്തി. കൊലപാതകമാണെന്ന് സംശയിക്കുന്നു. ഡോ. ജീന് പദ്മ അടക്കമുള്ളവരാണ് മരിച്ചത്. സംഭവത്തെ തുടര്ന്ന് മകന് ഒളിവിലാണ്. മൃതദേഹങ്ങള് മുറിച്ച് കത്തിച്ച നിലയിലാണുള്ളത്.
നന്തന്കോട് ക്ലിഫ് ഹൗസിന് സമീപത്തുള്ള വീട്ടിലാണ് സംഭവം. രാത്രി 11 മണിയോടെ വീട്ടില് നിന്നും പുക ഉയരുന്നത് കണ്ട് അയല്വാസികള് പോലീസില് അറിയിക്കുകയായിരുന്നു. പിന്നീട് പോലീസും അഗ്നിശമന ഉദ്യോഗസ്ഥരും ചേര്ന്ന് നടത്തിയ പരിശോധനയിലാണ് മൃതദേഹങ്ങള് കണ്ടെത്തിയത്. രണ്ട് മൃതദേഹങ്ങള് കത്തിക്കരിഞ്ഞ നിലയിലും മറ്റൊന്ന് ചാക്കില് കെട്ടിയനിലയിലുമായിരുന്നു ഉണ്ടായിരുന്നത്.
ഇവിടെ അഞ്ചു പേരാണ് താമസിച്ചിരുന്നത്. ഇതില് രണ്ടു പേരെ ഇനിയും കണ്ടെത്താനുണ്ട്. ചാക്കില് പൊതിഞ്ഞ മൃതദേഹത്തില് ഇതും ഉണ്ടോ എന്ന് പോലീസ് തിരയുന്നുണ്ട്. റിട്ട. ഡോക്ടര് ജീന് പദ്മയുടെ മകനാണ് ഒളിവില് പോയ കേദനെയാണ് കാണാതായിരിക്കുന്നത്. ഇയാളാണ് കൊലപാതകം നടത്തിയിരിക്കുന്നതെന്ന് പോലീസ് പറഞ്ഞു. ഇയാളുടെ പെരുമാറ്റത്തില് അസ്വാഭാവികതയുണ്ടായിരുന്നതായി ജോലിക്കാരി പറഞ്ഞു. മറ്റ് കുടുംബാംഗങ്ങളും രണ്ടു ദിവസമായി കാണാനില്ലായിരുന്നു. ഇവര് വിനോദസഞ്ചാരത്തിന് പോയതാണെന്നാണ് ഇയാള് അയല്വാസികളോട് പറഞ്ഞത്.
അതേസമയം, ഇയാള് രണ്ടു ദിവസം മുന്പേ കൃത്യം നടത്തിയിരുന്നതായും ഇതിന് ശേഷം മൃതദേഹങ്ങള് നശിപ്പിക്കുന്നതിന് കാത്തിരിക്കുകയാണെന്നും പോലീസ് സംശയിക്കുന്നു. ഇതിന് പുറമെ ശനിയാഴ്ച രാത്രി മതില് ചാടി ഓടുന്നത് കണ്ടതായും ദൃക്സാക്ഷികള് പറഞ്ഞു. എന്നാല് വിശദമായ അന്വേഷണത്തിന് ശേഷം മാത്രമെ ഇക്കാര്യങ്ങള് സ്ഥിരീകരിക്കാന് സാധിക്കു.
