ബംഗലുരു: ഓഫ് സീസണ് ഫുട്ബോള് താരങ്ങളെ സംബന്ധിച്ചിടത്തോളം രത്നതുല്യമാണ്. മൈതാനത്തെ കാഠിന്യമേറിയ ഒരു സീസണ് ശേഷം പരുക്കിന്റെയും പരിശീലനത്തിന്റെയും തിരക്കുകള് ഇല്ലാതെ സുഹൃത്തുക്കളും കുടുംബവുമായി സമയം ചെലവഴിക്കാനും ഇഷ്പ്പെട്ട കാര്യങ്ങളെല്ലാം ചെയ്യാനുള്ള സമയം. വീട്ടില് നിന്നും അകന്ന് ദേശീയ ടീമിനും ക്ളബ്ബുകള്ക്കും കളിക്കാന് വേണ്ടി നഷ്ടപ്പെട്ട സമയം കുടുംബത്തിനു തിരിച്ചു കൊടുക്കാനാണ് ചിലര്ക്ക് താല്പ്പര്യം.
ഇന്ത്യയുടെ നിലവിലെ ഏറ്റവും വിലപിടിപ്പുള്ള മുന്നേറ്റക്കാരില് ഒരാളായ വിനീതിന് പക്ഷേ ഇത്തരം ഇടവേള കൃഷിപ്പണിക്കുള്ള സമയമാണ്. ക്ളബ്ബിലെ തിരക്ക് പിടിച്ച സമയത്തിന് ശേഷം വീട്ടിലെത്തുമ്പോള് താരം പിതാവിനെ കൃഷിയില് സഹായിക്കുക പതിവാണ്. കണ്ണൂര് ജില്ലയിലെ വേങ്ങാട് പഞ്ചായത്തില് നിന്നുമാണ് വിനീത് ഇന്ത്യന് ഫുട്ബോളിന്റെ നെറുകയിലേക്ക് വളര്ന്നത്. താരം യന്ത്രം ഉപയോഗിച്ച് നിലം ഉഴുന്നതിന്റെ ദൃശ്യം ചില മാധ്യമങ്ങള് പുറത്തുവിട്ടു. മകന് എന്ന നിലയില് താന് പിതാവിനെ സഹായിക്കാന് ബാദ്ധ്യസ്ഥനാണെന്നും വീട്ടില് വരുമ്പോള് സമയം കിട്ടുമ്പോളെല്ലാം വയലില് പണിയാന് പിതാവിനെ സഹായിക്കാറുണ്ടെന്നും കുടുംബത്തിലെ എല്ലാവരും ഓരോ ജോലി ചെയ്യണമെന്നും വിനീത് പറയുന്നു.
ഫുട്ബോള് മൈതാനത്തെ കടുത്ത സീസണുകള് അവസാനിക്കുമ്പോള് വീട്ടിലേക്ക് തിരിച്ചുപോകണമെന്നും കൃഷിയില് ഏര്പ്പെടണമെന്നും പതിവായി തോന്നാറുണ്ടെന്നും വിനീത് വ്യക്തമാക്കുന്നു. വീടിന്റെ മുന്നില് തന്നെയുള്ള വയലാണ് ഫുട്ബോള് താരത്തിന്റെ കൃഷിയിടം. നാലു വര്ഷം മുമ്പ് വിരമിച്ചശേഷം പിതാവ് ഇപ്പോള് പതിവായി കൃഷി ചെയ്യാറുണ്ട്. ജോലി ചെയ്തിരുന്ന കാലത്ത് കിട്ടുന്ന സമയമെല്ലാം അദ്ദേഹം വയലില് പണിയെടുത്തിരുന്നെന്നും വിനീത് ഓള് ഇന്ത്യാ ഫുട്ബോള് ഫെഡറേഷന്റെ വെബ്സൈറ്റില് പറയുന്നു.
ബാംഗ്ളൂര് എഫ് സി താരമായ വിനീത് ഇന്ത്യന് സൂപ്പര്ലീഗില് കേരളാ ബ്ളാസ്റ്റേഴ്സിന്റെ താരമാണ്. ഈ സീസണില് ക്ളബ്ബ് നില നിര്ത്തിയിരിക്കുന്ന രണ്ടു താരങ്ങളില് ഒരാള് വിനീതാണ്. കഴിഞ്ഞ സീസണില് ക്ളബ്ബിനായി അഞ്ചു ഗോളുകള് നേടി ലീഗിലെ ഇന്ത്യന് താരങ്ങളില് ടോപ് സ്കോര് നേടിയിരുന്നു. ഐഎസ്എല്ലില് ഇത്തവണ ആദ്യമായി കളിക്കുന്ന ബാംഗ്ളൂര് എഫ് സുനില്ഛേത്രിയെയും മറ്റൊരു താരത്തെയും നില നിര്ത്തിയതിനാല് വിനീതിനെ ബ്ളാസ്റ്റേഴ്സിന് കിട്ടിയിട്ടുണ്ട്. മറ്റൊരു താരം മെഹ്താബ് ഹുസൈനാണ്.
