കൊച്ചി: അന്താരാഷ്ട്ര സ്റ്റേഡിയത്തില് ക്രിക്കറ്റ് വേണോ ഫുട്ബോള് വേണോ എന്ന തര്ക്കത്തില് ക്രിക്കറ്റും ഫുട്ബോളും നടത്തുമെന്ന് വ്യക്തമാക്കി ജിസിഡിഎ. തിരുവനന്തപുരത്ത് ക്രിക്കറ്റ് കൊച്ചിയില് ഫുട്ബോള് എന്ന തരത്തിലുള്ള വാദം അംഗീകരിക്കാന് കഴിയില്ലെന്നനും അതേസമയം തന്നെ അന്തിമ തീരുമാനം വിദഗ്ദ്ധരുടെ അഭിപ്രായം കൂടി തേടിയ ശേഷമേ ഉണ്ടാകൂ എന്നും വ്യക്തമാക്കി.
ക്രിക്കറ്റ് കൊച്ചിയില് നിന്നും പൂര്ണ്ണമായും ഒഴിവാക്കാനുള്ള വാദത്തെ അംഗീകരിക്കാനാകില്ല. ഫുട്ബോളും ക്രിക്കറ്റും ഇവിടെ നടത്തേണ്ടതുണ്ട്. നിലവിലെ ടര്ഫിന് ഒരു തരത്തിലും പ്രശ്നം ഉണ്ടാക്കില്ലെന്നും എന്നാല് ഇക്കാര്യത്തില് സര്ക്കാരിന്റെ അന്തിമ നിര്ദേശം അനുസരിക്കുമെന്നും ജിസിഡിഎ വ്യക്തമാക്കി. കേരള ബ്ളാസ്റ്റേഴ്സ്, കെസിഎ, ജിസിഡിഎ പ്രതിനിധികളുമായി നടത്തിയ ചര്ച്ചകള്ക്ക് പിന്നാലെയാണ് ജിസിഡിഎ വാര്ത്താ സമ്മേളനം വിളിച്ചത്. ഇന്ത്യാ വെസ്റ്റിന്ഡീസ് ഏകദിനം കൊച്ചിയില് തന്നെ നടത്തുമെന്ന് കെസിഎയും വ്യക്തമാക്കി.
കെസിഎയുടെ തീരുമാനത്തിനൊപ്പം നില്ക്കുമെന്നാണ് ബിസിസിഐ യും വ്യക്തമാക്കിയിരിക്കുന്നത്. നേരത്തേ ലോകകപ്പിന് പിന്നാലെ കൊച്ചിയിലെ ടര്ഫ് ഒരു ഏകദിനത്തിന് വേണ്ടി മാത്രം വെട്ടിപ്പൊളിക്കുന്നതിനെ എതിര്ത്ത് ബ്ളാസ്റ്റേഴ്സ് താരങ്ങളും മൂന്കാല ഫുട്ബോള് താരങ്ങളും രംഗത്ത വന്നിരുന്നു. ഇതിന് പിന്നാലെയാണ് ഇന്ന് ജിസിഡിഎ ഇക്കാര്യത്തില് ചര്ച്ചയ്ക്ക് വിളിച്ചത്.
