പന്തുകളി പഠിപ്പിച്ചത് ഉറുഗ്വേ കോച്ച്, ആദ്യം പ്രൊഫഷണല് ഫുട്ബോളില് ഇറക്കിയതും മുന്നേറ്റത്തില് ആദ്യം പങ്കാളിയായതും ഉറുഗ്വേക്കാരന്ന്മാര്, നിലവില് കളിക്കുന്ന ക്ലബ്ബിലെ ഏറ്റവും അടുത്ത കൂട്ടുകാരന്മാരും ഉറുഗ്വേക്കാര് തന്നെ. എന്തിനേറെ ഇടവേളയില് കുടിക്കുന്ന കാപ്പിശീലം പോലും ഉറുഗ്വേയിലും അര്ജന്റീനയിലും ഏറെ പ്രിയങ്കരമായ മാരേറ്റാണ്. അപ്പോള് പിന്നെ ഫ്രഞ്ച് സൂപ്പര്താരം അന്റോണിയോ ഗ്രീസ്മാന് ലോകകപ്പിലെ ഉറുഗ്വേയ്ക്ക് എതിരേയുള്ള ക്വാര്ട്ടര് പോരാട്ടത്തെ കുടുംബകാര്യം എന്നല്ലാതെ എന്ത് പറയാനാണ്.
ലോകകപ്പിലെ നിര്ണ്ണായകമായ ആദ്യ നാലില് ആദ്യം കടക്കുന്നത് ഫ്രാന്സാണോ ഉറുഗ്വേയാണോ എന്നറിയാന് മണിക്കൂറുകള് മാത്രമാണ് ഇനിയുള്ളത്. പക്ഷേ ലോകകപ്പ് കളിക്കുന്ന ഫ്രഞ്ച് ടീമിലെ സൂപ്പര്താരം അന്റോണിയോ ഗ്രീസ്മാന് ഏതു നീലക്കുപ്പായമായാലും അത് കുടുംബകാര്യം പോലെയാണ്. പന്തുകളിയുടെ ഭാഗമായി 13 വര്ഷമായി സ്പെയിനിലുള്ള ഗ്രീസ്മാന് ഉറുഗ്വായന് ദേശീയതയുമായി അഭേദ്യമായ ബന്ധമാണുള്ളത്.
സ്പാനിഷ് ഭൂവില് റീയല് സോസിഡാഡിന്റെ യൂത്ത് ടീമിലൂടെയായിരുന്നു ഗ്രീസ്മാന് കളി തുടങ്ങിയത്. 2005 ല് ഇവിടെയെത്തിയ ഗ്രീസ്മാന് നാലു വര്ഷം കഴിഞ്ഞ് പ്രൊഫഷണല് ഫുട്ബോളില് അരങ്ങേറുകയും അഞ്ചു വര്ഷം കഴിഞ്ഞ് സ്പാനിഷ് തലസ്ഥാനത്തെ അത്ലറ്റിക്കോയില് എത്തപ്പെട്ടതും ചരിത്രം. രണ്ടു ക്ളബ്ബിലും ഗ്രീസ്മാന്റെ ഉറ്റ ചങ്ങാതികളായത് ഉറുഗ്വേയന് കളിക്കാരായിരുന്നു. റീയല് സോസിഡാഡില് പ്രൊഫഷണല് ഫുട്ബോളിലെ മികവ് തേച്ചു മിനുക്കാന് സഹായിച്ചത് കാര്ലോസ് ബ്യൂണോ ആയിരുന്നെങ്കില് അത്ലറ്റിക്കോ മാഡ്രിഡില് ഡിയഗോ ഗോഡിനും ജോസ് ജിംനസുമാണ് താരത്തിന്റെ കൂട്ടുകാര്.
കളിക്കളത്തിന് പുറത്ത് താന് എപ്പോഴും ഗോഡിനൊപ്പമാണെന്ന് ഗ്രീസ്മാന് തന്നെ പറയുന്നു. റീയല് സോസിഡാഡില് ഉറുഗ്വേക്കാരനായ പരിശീലകന് മാര്ട്ടിന് ലെസാര്ട്ടേയായിരുന്നു ഗ്രീസ്മാന്റെ പ്രതിഭ കണ്ടറിഞ്ഞത്. ടീമിന്റെ ഒന്നാം നമ്പര് സ്ട്രൈക്കറായിരുന്ന മറ്റൊരു ഉറുഗ്വായന് കാര്ലോസ് ബ്യൂണോയ്ക്കൊപ്പമാണ് ലെസാര്ട്ടേ ഗ്രീസ്മാനെ മുന്നേറ്റത്തിന് നിയോഗിച്ചത്. 11 വയസ്സ് മൂപ്പുള്ള ബ്യൂണോ ഒരു തള്ളപ്പക്ഷി ചിറകിനടിയില് എങ്ങിനെയാണ് കുഞ്ഞിനെ സൂക്ഷിക്കുന്നത് എന്നത് പോലെ ഗ്രീസ്മാനെ പരിപാലിച്ചു. സുന്ദരമായ ഒരു സ്ട്രൈക്കിംഗ് പങ്കാളിത്തമാണ് റീയല് സോസിഡാഡ് ബ്യൂണോ-ഗ്രീസ്മാന് സഖ്യത്തിലൂടെ കണ്ടെത്തിയത്. പകരം ക്ളബ്ബിന് കിട്ടിയതാകട്ടെ സ്പാനിഷ് ടോപ്പ് ഫ്ളൈറ്റിലേക്കുള്ള ടിക്കറ്റും.
ബ്യൂണോയുമായുള്ള കൂട്ടുകെട്ട് ഗ്രീസ്മാന് ഉറുഗ്വേയെക്കുറിച്ചു നല്ല അറിവാണ് നല്കിയത്. തന്നെ ചിറകിന് കീഴിലാക്കിയ ബ്യൂണോ 'മേറ്റ്' എങ്ങിനെ കുടിക്കണമെന്ന് വരെ പഠിപ്പിച്ചെന്ന് ഗ്രീസ്മാന് പറയുന്നു. അര്ജന്റീനക്കാര്ക്കും ഉറുഗ്വേക്കാര്ക്കും ഏറെ ഇഷ്ടമായ ലാറ്റിനമേരിക്കന് കയ്പേറിയ ചായ മേറ്റ് കുടിച്ചുള്ള റീയല് സോസിഡാഡിലെ ശീലം അഞ്ചു വര്ഷം കഴിഞ്ഞ് അത്ലറ്റിക്കോ മാഡ്രിഡില് എത്തിയിട്ടും ഗ്രീസ്മാന് തുടര്ന്നു. കളിക്കളത്തില് താരം ഒരു ഫ്ളാസ്ക്കില് ഇത് കൊണ്ടുനടക്കുമായിരുന്നു. 2009 ല് അത്ലറ്റിക്കോയിലും ഗ്രീസ്മാന് തുണ ഉറുഗ്വേക്കാരായിരുന്നു. ഫിറ്റ്നസ് കോച്ച് ഓസ്ക്കറും പ്രതിരോധതാരങ്ങളായ ഗോഡിനും ജിമിനെസും പിന്നെ 2015 ല് ക്ളബ്ബ് വിട്ട ക്രിസ്ത്യന് റോഡ്രിഗ്രസും സൂപ്പര്താരത്തിന്റെ സൗഹൃദ പട്ടികയില് ഇടം പിടിച്ചു.
കഴിഞ്ഞ ഒക്ടോബറില് ഉറുഗ്വേ ലോകകപ്പ് യോഗ്യത നേടി കൂട്ടുകാര് തിരിച്ചു വന്നപ്പോള് ഉറുഗ്വേയുടെ ദേശീയ ജഴ്സിയുമണിഞ്ഞായിരുന്നു ഗ്രീസ്മാന് കാറില് അവരെ മാഡ്രിഡ് വിമാനത്താവളത്തില് നിന്നും കൂട്ടിക്കൊണ്ടുവരാന് പോയത്. ഗോഡിനും ജിംനസും കളിക്കുമ്പോള് ഉറുഗ്വേ ടീമിനുള്ള തന്റെ പിന്തുണ സോഷ്യല് മീഡിയവഴി പ്രകടിപ്പിക്കാനും ഗ്രീസ്മാന് മടിച്ചില്ല. ഗ്രീസ്മാനെ പോലെ ലോകത്തെ ഏറ്റവും മികച്ച സ്ട്രൈക്കര്മാരില് ഒരാള് തങ്ങള്ക്കൊപ്പമുള്ളത് ഉറുഗ്വേയും മാനിച്ചു. റോഡ്രിഗ്രസ് കളിക്കുന്ന ആദ്യ ലോകകപ്പ് ജേതാക്കളായ രാജ്യത്തെ ഏറ്റവും വിലയേറിയ ക്ളബ്ബ് പെനറോള് ഗ്രീസ്മാന് വിശിഷ്ടാംഗത്വം നല്കി ആദരിച്ചു.
അതേസമയം എല്ലാ സൗഹൃദവും രണ്ടു രാജ്യങ്ങളും ക്വാര്ട്ടറില് നേര്ക്കുനേര് വന്നതോടെ ചെറുതായി ഇല്ലാതാകും. ഇത് ശരിക്കും വൈകാരികമായ ഒരു മത്സരമായിരിക്കും. ഞാന് ആ രാജ്യത്തെ ഏറെ സ്നേഹിക്കുന്നു, അവിടുത്തെ ജനങ്ങളെയും. ഡീഗോ തന്റെ ഏറ്റവും വലിയ സുഹൃത്താണ്. മാഡ്രിഡില് എല്ലാ ദിവസവും ഒരുമിച്ചുണ്ട്. തന്നെക്കുറിച്ച് ഗിംനസിനും ഗോഡിനും എല്ലാം അറിയാം. അവരെക്കുറിച്ച് തനിക്കും അതുകൊണ്ടു തന്നെ വളരെ ചെറിയ കാര്യങ്ങള് പോലും എല്ലാവരും അങ്ങേയറ്റം ശ്രദ്ധിക്കുമെന്ന് ഗ്രീസ്മാന് പറയുന്നു.
മാര്ട്ടിന് ലസാര്ട്ടേയ്ക്കൊപ്പം തുടങ്ങി. അദ്ദേഹവുമായി ഏറെക്കാലം ഒരുമിച്ചുണ്ടായിരുന്നു. അയാളൊരു ഉറുഗ്വേക്കാരനാണെന്നാണ് എപ്പോഴും അവന് പറയാറ്. എപ്പോള് നോക്കിയാലും ഉറുഗ്വേക്കാര്ക്കൊപ്പമാണ്. ഞങ്ങള് എങ്ങിനെയാണ് ജീവിക്കുന്നതെന്നും ഞങ്ങളുടെ സംസ്ക്കാരം എന്താണെന്നും കഴിക്കുന്ന ബാര്ബിക്കും, സംഗീതവും ഞങ്ങളുടെ പാനീയം പോലും അവന് എന്നേക്കാള് നന്നായി അറിയാം. ഗോഡിനും പറയുന്നു.
