ശബരിമലയില് യുവതികളെ കയറ്റണമെന്ന് പോലീസ് അജണ്ഡയിട്ടിട്ടില്ലായിരുന്നെന്നും അത് തങ്ങളുടെ തന്നെ തീരുമാനം ആയിരുന്നെന്നും ശബരിമലയില് ആദ്യമായി പ്രവേശിച്ച യുവതികള് കനകദുര്ഗ്ഗയും ബിന്ദുവും. കഴിഞ്ഞ ദിവസം പുലര്ച്ചെ ശബരിമല ദര്ശനം നടത്തിയ ശേഷം അജ്ഞാത കേന്ദ്രത്തില് കഴിയുന്ന ഇവരുവരേയും അഭിമുഖം നടത്തി വാര്ത്താചാനല് പുറത്തുവിട്ട റിപ്പോര്ട്ടിലാണ് ഈ വിവരമുള്ളത്.
പോലീസ് തങ്ങളെ ഉപയോഗപ്പെടുത്തുക ആയിരുന്നില്ലെന്നും തങ്ങളുടെ വ്യക്തിപരമായ തീരുമാനത്തിന്റെ പുറത്താണ് ശബരിമല ദര്ശനം നടത്തിയതെന്നും അതേസമയം പോലീസിന്റെ സഹായം ഇക്കാര്യത്തില് കിട്ടിയെന്നും ഇവരെ ഉദ്ധരിച്ച് ചാനല് റിപ്പോര്ട്ട് ചെയ്യുന്നു. ശബരിമല ദര്ശനത്തിന് തയാറെടുത്ത വനിതാ കൂട്ടായ്മയുടെ ഭാഗമായിരുന്നു. ആദ്യം ദര്ശനം പരാജയപ്പെട്ടെങ്കിലും പരാജയപ്പെട്ട് പിന്മാറാന് ഒരുക്കമായിരുന്നില്ലെന്നും ഇവര് വ്യക്തമാക്കി. ബുധനാഴ്ച പുലര്ച്ചെയാണ് കനകദുര്ഗ്ഗയും ബിന്ദുവും ശബരിമലയില് ദര്ശനം നടത്തിയത്. ഇതിന് പിന്നാലെ ഉണ്ടായ ഹര്ത്താലില് കേരളത്തില് ഉടനീളം വ്യാപകമായ സംഘര്ഷം നടക്കുകയും വ്യാപക നാശനഷ്ടം ഉണ്ടാകുകയും ചെയ്തു.
സന്നിധാനത്തേക്ക് ആംബുലന്സിലായിരുന്നു എത്തിയെന്ന പ്രചരണത്തെ ബിന്ദു എതിര്ത്തു. പമ്പയില് നിന്നും നടന്നായിരുന്നു മല കയറിയതെന്നും മല കയറാന് പോലീസിനെ തങ്ങള് ഉപയോഗപ്പെടുത്തുകയായിരുന്നെന്നും പറഞ്ഞു. സുരക്ഷ ഉറപ്പുനല്കിയ രണ്ടു എസ്.പിമാര് പമ്പ മുതല് സുരക്ഷ ഒരുക്കി. ദര്ശനം നടത്താന് പൊലീസും പ്രേരിപ്പിച്ചു. ഭക്തര്ക്കൊപ്പമാണ് മല ചവിട്ടിയിട്ടിയതെന്നും ആരും എതിര്ത്തില്ലെന്നും ബിന്ദു പറഞ്ഞു.
ദര്ശനം നടത്തിയതിനു പിന്നില് സര്ക്കാര്, പൊലീസ് ഗൂഢാലോചന ഇല്ലെന്ന് ബിന്ദുവും പറഞ്ഞു. പൊലീസ് ഞങ്ങളെയല്ല, ഞങ്ങള് അവരെയാണ് ഉപകരണമാക്കിയത്. മാവോയിസ്റ്റ് അനുഭാവസംഘടനകളില് പ്രവര്ത്തിച്ചിട്ടുണ്ടെങ്കിലും ഇപ്പോള് ഒരു സംഘടനയിലും അംഗമല്ലെന്നും ബിന്ദു പറഞ്ഞു. അതേസമയം ശബരിമലദര്ശനം നടത്തിയതിന്റെ വാര്ത്ത പുറത്തു വന്നതിന് പിന്നാലെ ഇരുവരും അജ്ഞാതകേന്ദ്രത്തില് ഒളിവിലാണ്.
