തിരുവനന്തപുരം: കേരള അഡ്മിനിസ്ട്രേറ്റീവ് പരീക്ഷ ഉള്പ്പെടെയുള്ള എല്ലാ തൊഴില് പരീക്ഷകളും മലയാളത്തിലും ന്യൂന ഭാഷകളിലും നടത്തുകയെന്ന് ആവശ്യമുന്നയിച്ച് പി.എസ്.സി ഓഫീസിനു മുന്നില് നടത്തി നിരാഹാര സമരം താല്കാലികമായി അവസാനിപ്പിച്ചതായി സമരസമിതി. കെ.എ.എസ് ഉള്പ്പെടെ ഇനി വിജ്ഞാപനം ചെയ്യാനിരിക്കുന്ന എല്ലാ പി.എസ്.സി പരീക്ഷകളും മലയാളത്തിലും കൂടി നടത്തുമെന്ന മുഖ്യമന്ത്രിയുടെ ഉറപ്പിനെ തുടര്ന്നാണ് നിരാഹാരം അവസാനിപ്പിക്കുന്നത്.
പരീക്ഷകളെല്ലാം മലയാളത്തിലാക്കുമെന്നും സാങ്കേതിക പദാവലികളുടെ വിജ്ഞാനകോശം തയ്യാറാക്കുന്നതിന് വിദഗ്ദ്ധ സമിതി രൂപീകരിക്കുമെന്നും ഭാവിയില് ന്യൂനപക്ഷ ഭാഷകളിലും പരീക്ഷ നടത്തും മുഖ്യമന്ത്രി ഉറപ്പ് നല്കിയതായി സമരി സമിതിയുടെ പ്രസ്താവനയില് പറയുന്നു.
അതേസമയം നിലവില് മുഖ്യമന്ത്രി പി.എസ്.സിയോട് നിര്ദേശിച്ചതും നടപ്പിലാക്കാമെന്ന് പി.എസ്.സി തത്വത്തില് അംഗീകരിച്ചതുമായ കാര്യങ്ങള് പ്രായോഗികമായി നടപ്പിലാക്കുന്നതുവരെ സംയുക്ത സമരമുന്നണി തുടരുമെന്നും സമരസമിതി അറിയിച്ചു.
കഴിഞ്ഞമാസം 29-ാം തീയതി മുതലാണ് ഐക്യമലയാളം പ്രസ്താനത്തിന്റെ നേതൃത്വത്തിലുള്ള നിരാഹാര സമരം ആരംഭിച്ചത്. രൂപിമ, അധ്യാപകനും ഐക്യവേദി സംസ്ഥാന സെക്രട്ടറിയുമായ പ്രിയേഷ്, ശ്രേയ എന്നിവരായിരുന്നു നിരാഹാരമിരുന്നത്. ഒപ്പം തിരുവോണ ദിവസം സംവിധായകന് അടൂര് ഗോപാലകൃഷ്ണന്, സുഗത കുമാരി, എം.കെ. സാനു, ഷാജി എന് അരുണ്, സി രാധാകൃഷ്ണന് എന്നിവര് ഉപവാസമിരുന്നിരുന്നു.
