മലപ്പുറം: വല്ലപ്പോഴും ഉണ്ടാകുന്ന അട്ടിമറികള് ഒഴിച്ചാല് മുസ്ലീംലീഗിന്റെ ശക്തമായ ആധിപത്യമുള്ള മലപ്പുറം ജില്ലയില് ഇടതുപക്ഷത്ത് മത്സരിക്കാന് പോലും ആളില്ല. മിക്ക സീറ്റുകളിലും സ്ഥാനാര്ഥികളെ കണ്ടെത്താന് പാടുപെട്ട് സിപിഎമ്മും ഘടകകക്ഷികളും തല പുകയ്ക്കുന്നതായിട്ടാണ് റിപ്പോര്ട്ട്. ലീഗിന്റെ കടന്നു കയറ്റത്തില് മുങ്ങിത്താഴാന് പാര്ട്ടിക്കാര്ക്ക് താല്പ്പര്യമില്ലാത്തതിനാല് ശക്തമായ മത്സരം കാഴ്ചവെയ്ക്കാന് ലീഗിന്റെയും കോണ്ഗ്രസിന്റെയും വോട്ടുകളില് വിള്ളല് ഉണ്ടാക്കാന് കഴിയുന്നവര്ക്കായിട്ടാണ് തിരച്ചില്.
പാര്ട്ടിക്കാര് പോലും മത്സരിക്കാനും ഘടകക്ഷികള് സീറ്റുമാറാനും ഒരു ഉപാധിയും വെയ്ക്കാത്ത ജില്ലയില് മണ്ഡലം പിടിക്കാന് ജയിച്ചു കയറാന് കെല്പ്പുള്ള പൊതുസമ്മതരെ സ്വതന്ത്രരാക്കി പിന്തുണ നല്കാനാണ് ഇടതുപക്ഷത്തിന്റെ ആലോചന. പലയിടത്തും പൊതുസ്വതന്ത്രരെ രംഗത്തിറക്കാന് സി.പി.എം. ജില്ലാനേതൃത്വം തീരുമാനിച്ചിട്ടുണ്ട്. ആ നിലയ്ക്കുള്ള തെരച്ചിലും തുടരുകയാണ്. നേരത്തേ മുന് ഇന്ത്യന് ഫുട്ബോള് താരം യു. ഷറഫലിയുടേയും മറ്റും പേരുകള് സ്ഥാനാര്ത്ഥി പട്ടികയില് ഇടം പിടിച്ചത് അങ്ങിനെയാണ്്.
ഏറനാട്ടെ സീറ്റീലേക്കാണ് യു ഷറഫലിയുടെ പേര് പറഞ്ഞു കേള്ക്കുന്നത്. പൊതു സമ്മതര് കഴിഞ്ഞാല് പിന്നെ മുന്നണി വിട്ടു വന്ന വിമതര്ക്കാണ് സ്ഥാനം. കഴിഞ്ഞ ലോക്സഭാ തെരഞ്ഞെടുപ്പിലും തദ്ദേശ തെരഞ്ഞെടുപ്പുകളിലുമെല്ലാം ഈ രീതിയിലുള്ള പരീക്ഷണങ്ങള് നടന്നിരുന്നു. ചിലപ്പോഴൊക്കെ ഈ പരീക്ഷണം വിജയിക്കുകയും മറ്റു ചിലപ്പോള് തോറ്റാലും ശക്തമായ മത്സരം കാഴ്ചവെയ്ക്കാനാകുകയും ഒക്കെ ചെയ്തിട്ടുണ്ട്്. ഇത്തവണയും സീറ്റിനായി കടിപിടിയോ കടുംപിടിത്തമോ ഇടതുപക്ഷത്ത് ഇല്ല.
പച്ചക്കൊടി നിരന്തരം ഉയരുന്ന മലപ്പുറത്തെ ലീഗ് കോട്ടയില് ടി.കെ. ഹംസ, മഞ്ഞളാംകുഴി അലി, കെ.ടി. ജലീല്;, വി. അബ്ദുറഹിമാന്, പി.വി. അന്വര് എന്നിവരെയെല്ലാം പക്ഷേ ഇടതുപക്ഷം ജയിപ്പിച്ച് ഉയര്ത്തിയിട്ടുണ്ട്. മണ്ഡലം വെച്ചുമാറുന്നതിനോ സീറ്റ് വിട്ടുകൊടുക്കാനോ ഒക്കെ ഘടകകക്ഷികളും തയ്യാറാണ്. നിലവിലുള്ള നാല് സീറ്റുകളില് സിറ്റിങ് എംഎല്എമാര് തന്നെ തുടരും.
താനൂരില് വി. അബ്ദുറഹിമാന്, തവനൂരില് കെ.ടി.ജലീല്, പൊന്നാനി പി.ശ്രീരാമകൃഷ്ണന്, നിലമ്പൂരില് പി.വി. അന്വര് എന്നിവര് മത്സരിക്കും. വി.അബ്ദുറഹിമാന് തിരൂരിലേക്ക് മാറാനുള്ള സാധ്യതയും നിലനില്ക്കുന്നുണ്ട്.
തിരൂരിലും മങ്കടയിലും കഴിഞ്ഞ തവണ മത്സരിച്ച് പരാജയപ്പെട്ട ഗഫൂര് പി. ലില്ലീസ്, ടി.കെ. റഷീദലി എന്നിവരുടെ പേരുകളാണ് ഉയരുന്നത്. വണ്ടൂരില് പള്ളിക്കല് മുന് പഞ്ചായത്ത് പ്രസിഡന്റ് പി. മിഥുനയെ ആണ് പരിഗമിക്കുന്നത്. ചന്ദ്രബാബുവിന്റെ പേരും ഇവിടെ പരിഗണിക്കുന്നുണ്ട്. പഞ്ചായത്ത് പ്രസിഡന്റാകുമ്പോള് മുസ്ലീംലീഗിനൊപ്പമായിരുന്നു മിഥുന പിന്നീട് ലീഗുമായി പിണങ്ങി ഇടതുപക്ഷത്ത് എത്തുകയായിരുന്നു. എ.പി. അനില്കുമാര് ആയിരിക്കും കോണ്ഗ്രസ് സ്ഥാനാര്ത്ഥി.
പെരിന്തല്മണ്ണയില് ലീഗ് വിമതന് കെ. മുഹമ്മദ് മുസ്തഫയുടെ പേരാണ് ജില്ലാ സെക്രട്ടറിയേറ്റ് നിര്ദേശിക്കുന്നത്. എം. മുഹമ്മദ് സലീമും പട്ടികയിലുണ്ട്. കൊണ്ടോട്ടിയില് സുലൈമാന് ഹാജിയും എസ്എഫ്ഐ കേന്ദ്ര കമ്മിറ്റി അംഗം ജിജിയും പരിഗണനയിലുണ്ട്.
