പാലക്കാട്: മെട്രോമാന് ഇ. ശ്രീധരന് പാലക്കാട്ട് ഓഫീസ് തുറക്കട്ടെ അത് റെയില്വേയുടെ പ്രൊജക്ടിന് വേണ്ടി ഉപയോഗിക്കാമെന്നും എംഎല്എ യുടെ ഓഫീസ് പാലക്കാട്ട് സിറ്റിംഗ് എംഎല്എ ഷാഫി പറമ്പിലിന് വേണ്ടി മാത്രമായിരിക്കുമെന്നും പറഞ്ഞു. പാലക്കാട് വീട് എടുക്കാനും എംഎല്എ ഓഫീസ് തുറക്കാനും പോകുന്നെന്ന ഇ. ശ്രീധരന്റെ പ്രസ്താവനയ്ക്ക് പാലക്കാട് എംപി വി.കെ. ശ്രീകണ്ഠനാണ് മറുപടി പറഞ്ഞത്.
ജയിക്കുമെന്ന കടുത്ത ആത്മവിശ്വാസത്തിലാണ് ഇ. ശ്രീധരന്. തനിക്ക് കോണ്ഗ്രസ് വോട്ടുകള് ലഭിച്ചെന്നും ഇതിനായി മുതിര്ന്ന കോണ്ഗ്രസ് നേതാക്കള് സഹായിച്ചെന്നും ഇ.ശ്രീധരന് നേരത്തേ പ്രതികരിച്ചിരുന്നു. വ്യക്തി എന്ന നിലയിലാണ് ആളുകള് തനിക്ക് സഹായം വാഗ്ദാനം ചെയ്തതെന്നും ബി.ജെ.പി പറഞ്ഞാല് മുഖ്യമന്ത്രിയാകാന് താന് തയ്യാറാണെന്നും താന് പിണറായി വിജയനേക്കാള് നല്ല മുഖ്യമന്ത്രിയാകുമെന്നും പറഞ്ഞു. അതേസമയം 34 സീറ്റുമായി എങ്ങനെ ഭരിക്കുമെന്ന് അറിയില്ലെന്നും അദ്ദേഹം പറഞ്ഞു.
ആരെയും പ്രേരിപ്പിച്ച് പാര്ട്ടിയിലേക്ക് കൊണ്ടുവരില്ല. കോണ്ഗ്രസില് നിന്ന് ആര്ക്കുവേണമെങ്കിലും വരാം. മുഖ്യമന്ത്രിയായാല് രാഷ്ട്രീയം കളിക്കില്ല. സംസ്ഥാനത്തെ മികച്ച രീതിയില് ഭരിക്കുമെന്നും ഇ.ശ്രീധരന് പറഞ്ഞു. ബി.ജെ.പിയുടെ വളര്ച്ച താന് വന്നതോടെ കൂടിയെന്നും മറ്റു മണ്ഡലങ്ങളിലും തന്റെ വരവ് നല്ലോണം സ്വാധീനിച്ചിട്ടുണ്ടെന്നും ശ്രീധരന് അവകാശപ്പെട്ടു. സംസ്ഥാനത്ത് തൂക്കുമന്ത്രിസഭയ്ക്കാണ് സാധ്യതയെന്നും ആര്ക്കും പിന്തുണ നല്കില്ലെന്നും തൂക്കുമന്ത്രിസഭ വന്നാല് ഒരു പക്ഷേ രാഷ്ട്രപതി ഭരണമാവാനാണ് സാധ്യതയെന്നുമാണ് ശ്രീധരന് പറഞ്ഞത്.
