അന്യഭാഷാ ചിത്രങ്ങള് മികച്ച വിജയം നേടുന്നത് ഇതാദ്യമല്ല. അതുപോലെയൊരു സിനിമയാണ് ‘കാന്താര’. കെജിഎഫ് ഫ്രാഞ്ചൈസിക്കു പിന്നാലെ സാന്ഡല്വുഡിന്റെ അഭിമാനമായി ഈ ചിത്രം മാറി. ഭാഷയുടെ അതിര്വരമ്പുകള്ക്കപ്പുറത്ത് പാന് ഇന്ത്യന് സ്വീകാര്യതയും വന് ബോക്സ് ഓഫീസ് വിജയവും നേടിയ ഈ സിനിമ മികച്ച തിയേറ്റര് അനുഭവമാണ് നല്കുന്നതെന്നായിരുന്നു പ്രേക്ഷകര് പൊതുവായി പറഞ്ഞത്. ഇപ്പോഴിതാ സിനിമയുടെ 1.32 മിനിറ്റ് ദൈര്ഘ്യമുള്ള വീഡിയോ പുറത്തുവിട്ടിരിക്കുകയാണ് അണിയറ പ്രവര്ത്തകര്. സിനിമയുടെ വിജയം നിലനില്ക്കുമ്പോള് തന്നെ ചിത്രത്തിന്റെ ഓപണിംഗ് സീക്വന്സ് യുട്യൂബിലൂടെ പുറത്തു വിട്ടിരിക്കുന്നത്.
രചനയും സംവിധാനവും മാത്രമല്ല നായക കഥാപാത്രമായും റിഷഭ് ഷെട്ടി തിളങ്ങിയ സിനിമയാണിത്. ആദ്യം സിനിമയുടെ കന്നഡ പതിപ്പാണ് റിലീസ് ചെയ്തത്. പിന്നീട് കര്ണാടകത്തിന് പുറത്ത് മറ്റ് സംസ്ഥാനങ്ങളിലും പ്രേക്ഷകശ്രദ്ധ നേടിയതോടെ മറുഭാഷാ പതിപ്പുകള് പുറത്തിറക്കാന് നിര്മ്മാതാക്കള് തീരുമാനിച്ചു. മലയാളമുള്പ്പെടെ മൊഴിമാറ്റ പതിപ്പുകളെല്ലാം വന് വിജയം നേടിയതോടെ ഇന്ത്യന് സിനിമയില് തന്നെ കഴിഞ്ഞ വര്ഷത്തെ വര്ഷത്തെ ഏറ്റവും വലിയ വിജയങ്ങളില് ഒന്നായി ഇത് മാറി. ആഗോള ബോക്സ് ഓഫീസില് 400 കോടി ക്ലബ്ബില് ഇടംപിടിച്ച ചിത്രം, കേരളത്തില് നിന്നു മാത്രം 19 കോടി നേടിയിരുന്നു. രണ്ടാം വാരത്തിലേക്ക് കടന്നപ്പോള് കേരളത്തില് 208 സ്ക്രീനുകളിലാണ് കാന്താര പ്രദര്ശിപ്പിക്കുന്നതെന്ന് വിതരണക്കാരായ പൃഥ്വിരാജ് പ്രൊഡക്ഷന്സ് അറിയിച്ചിരുന്നു. ചിത്രത്തിന്റെ ഹിന്ദി പതിപ്പും വലിയ ബോക്സ് ഓഫീസ് നേട്ടമാണ് ഉണ്ടാക്കിയത്. തിയേറ്റര് റിലീസിനു പിന്നാലെ ഒടിടി റിലീസിലും വലിയ സ്വീകാര്യതയായിരുന്നു സിനിമയ്ക്ക്. ആമസോണ് പ്രൈം വീഡിയോയിലൂടെ നവംബര് 24 നാണ് ചിത്രം എത്തിയത്.
