കോട്ടയം: ജില്ലാ പഞ്ചായത്ത് പ്രസിഡന്റ് സ്ഥാനം വീതം വയ്ക്കുന്നതിനെച്ചൊല്ലി യു.ഡി.എഫുമായി ഇടഞ്ഞ് ഇടത്തേയ്ക്ക് പോയ കേരള കോണ്ഗ്രസ് (എം) പാലാ നഗരസഭാ ചെയര്മാനെച്ചൊല്ലി സി.പി.എമ്മുമായി ഇടഞ്ഞതോടെ, പാര്ട്ടി വീണ്ടും വലത്തേയ്ക്ക് വരുമോ എന്ന ചര്ച്ച സജീവമായി. പാലാ നഗരസഭാ ചെയര്മാനായി സി.പി.എം തെരഞ്ഞെടുത്ത ബിനു പുളിക്കക്കണ്ടത്തെ ഒരു കാരണവശാലും അംഗീകരിക്കാനാകില്ലെന്നാണ് കേരള കോണ്ഗ്രസിന്റെ നിലപാട്.ബിനു പുളിക്കക്കണ്ടത്തെ മാറ്റാനാകില്ലെന്ന് സി.പി.എം ജില്ലാ നേതൃത്വവും വ്യക്തമാക്കി.ഇതോടെ ഒരു വിഭാഗം വിട്ടുവീഴ്ചയ്ക്ക് തയാറായില്ലെങ്കില് മുന്നണി ബന്ധം തകരും.
മുന്നണി ബന്ധം തകര്ന്നാലും എടുത്ത നിലപാടില് നിന്നു പിന്നാക്കം പോകേണ്ടതില്ലെന്ന ഉറച്ച നിലപാടിലാണ് സി.പി.എം.പാലാ ഏരിയാ,ലോക്കല് കമ്മറ്റികള്.ബിനു പുളിക്കക്കണ്ടം ഒഴികെ ആരെ ചെയര്മാന് സ്ഥാനാര്ഥിയാക്കിയാലും പിന്തുണയ്ക്കാമെന്ന നിലപാടാണ് ജോസ് കെ. മാണി സ്വീകരിച്ചിരിക്കുന്നത്.എന്നാല് സി.പി.എമ്മിന്റെ ചെയര്മാന് സ്ഥാനാര്ത്ഥിയെ ഘടക കക്ഷിയല്ല തീരുമാനിക്കുന്നതെന്ന മറുപടിയാണ് സി.പി.എം. നേതൃത്വത്തിന്റേത്. ആദ്യത്തെ രണ്ടു വര്ഷം കേരള കോണ്ഗ്രസിനും പിന്നിടുളള ഒരു വര്ഷം സി.പി.എമ്മിനും പിന്നീടുളള രണ്ടു വര്ഷം കേരള കോണ്ഗ്രസിനും എന്ന കരാറിലാണ് പാലാ നഗരസഭ ഇടതുമുന്നണി ഭരിച്ചിരുന്നത്.മുന്നണി ധാരണ പ്രകാരം ആദ്യ ടേമില് ചെയര്മാനായിരുന്ന ആന്റോ ജോസ് പടിഞ്ഞാറേക്കര കഴിഞ്ഞ 28-ന് രാജിവച്ചു. അടുത്ത സി.പി.എം ടേമിലേയ്ക്കാണ് ബിനു പുളിക്കക്കണ്ടത്തെ ചെയര്മാനായി സി.പി.എം. തീരുമാനിച്ചത്.
26 അംഗ കൗണ്സിലില് 6 അംഗങ്ങളാണ് സി.പി.എമ്മിനുളളത്.ഇതില് പാര്ട്ടി ചിഹ്നത്തില് മത്സരിച്ച് വിജയിച്ച ഏക കൗണ്സിലര് ബിനു പുളിക്കക്കണ്ടമാണ്.മാത്രമല്ല പാര്ട്ടിയിലെ ഏക പുരുഷ കൗണ്സിലറും ബിനു പുളിക്കക്കണ്ടമാണ്.ഈ സാഹചര്യത്തില് ബിനുവിനെ മാറ്റേണ്ടി വന്നാല് സി.പി.എമ്മില് കടുത്ത പൊട്ടിത്തെറിക്ക് വഴിയൊരുക്കും.ഈ സാഹചര്യത്തില് ബിനുവിനെ മാറ്റേണ്ടിവരുന്നത് ആത്മഹത്യാപരമെന്നാണ് പാലായിലെ സി.പി.എം. നേതാക്കള് ചൂണ്ടിക്കാട്ടുന്നത്.സി.പി.എം നിലപാട് കടുപ്പിച്ചാല് പാലാ നഗരസഭയിലെ ഇടതുഭരണവും അവസാനിക്കും.ഇത്തരമൊരു സാഹചര്യം സൃഷ്ടിക്കപ്പെട്ടാല് കേരള കോണ്ഗ്രസ് വലത്തേക്ക് തിരികെ വരുന്നതിനുളള കാരണമാകുമെന്ന് കരുതുന്നവരും ഏറെയാണ്.
കേരള കോണ്ഗ്രസ് മടങ്ങിവന്നാല് സ്വീകരിക്കുമെന്ന കോണ്ഗ്രസ് നേതാക്കളുടെ നിലപാടും കേരള കോണ്ഗ്രസിന്റെ നിലപാട് മാറ്റത്തിന് പിന്നിലുണ്ടെന്നാണ് രാഷ്ട്രീയ നിരീക്ഷകരുടെ വിലയിരുത്തല്.ജില്ലാ പഞ്ചായത്തില് പ്രസിഡന്റ സ്ഥാനത്തെ ചൊല്ലി കേരള കോണ്ഗ്രസ് മാണി-ജോസഫ് വിഭാഗങ്ങള് തമ്മിലുളള തര്ക്കമാണ് മാണി ഗ്രൂപ്പിനെ ഇടതുപാളയത്തിലെത്തിക്കുന്നതിന് കാരണമായത്.ഇതേ സാഹചര്യമാണ് ഇപ്പോള് പാലാ നഗരസഭയിലും ഉരുത്തിരിഞ്ഞിരിക്കുന്നത്.
