കണ്ണൂര്: അര്ജുന് ആയങ്കിക്കെതിരെ ഫേസ് ബുക്ക് ലൈവിലൂടെ ഗുരുതര ആരോപണമുന്നയിച്ച് ഭാര്യ അമല രംഗത്ത്. വിവാഹത്തിന് മുന്പ് തന്നെ ഇരുവരും ഒരുമിച്ച് താമസിച്ചെന്നും ഗര്ഭിണിയായപ്പോള് ഗര്ഭഛിദ്രം നടത്തിച്ചെന്നും അമല ലൈവില് വെളിപ്പെടുത്തി. താന് ആത്മഹത്യ ചെയ്താല് അതിന്റെ ഉത്തരവാദികള് അര്ജുനും കുടുംബവും ആയിരിക്കുമെന്നും ഭാര്യയുടെ വെളിപ്പെടുത്തല്.
സ്വര്ണക്കടത്ത് കേസ്, ക്വട്ടേഷന് കേസുകളില് പ്രതിയായ അര്ജുന് ആയങ്കി കഴിഞ്ഞ ദിവസം ഫേസ്ബുക്കിലൂടെ പങ്കുവച്ച കുറുപ്പിന് മറുപടിയായിട്ടാണ് ഭാര്യ അമല രംഗത്തെത്തിയത്. പ്രേമിക്കാതെ ഒരുവളെ കല്ല്യാണം കഴിച്ചതാണ് താന് ചെയ്ത ഏറ്റവും വലിയ തെറ്റെന്നാണ് അര്ജുന് പോസ്റ്റില് കുറിച്ചത്.
2019 ഓഗസ്റ്റിലാണ് ഇരുവരും പരിചയപ്പെടുന്നതും പ്രണയത്തിലാകുന്നതും എല്ലാം. തുടര്ന്ന് 2021 ഏപ്രില് വിവാഹം കഴിച്ചു. എന്നാല് വിവാഹത്തിന് മുന്പ് 2020 ല് തന്നെ കണ്ണൂരിലേക്ക് കൊണ്ടവരുകയും ഒരുമിച്ച് താമസിക്കുകയും ചെയ്തു. ഇതിനിടെ ഗര്ഭിണിയായപ്പോള് ഗര്ഭഛിദ്രം നടത്തിച്ചെന്നും അതിനു ശേഷമാണ് വിവാഹം നടന്നതെന്നുമാണ് അമല പറഞ്ഞത്.
ഒരു രൂപ പോലും പ്രണയകാലത്ത് അര്ജുന്റെ കൈയ്യില് ഇല്ലായിരുന്നെന്നും താന് നിരവധി സാമ്പത്തിക സഹായം ചെയ്തുവെന്നുമാണ് അമലയുടെ വെളിപ്പെടുത്തല്. കാശിനു വേണ്ടിയുള്ള കപടസ്നേഹമാണ് അര്ജുന് തന്നോട് കാണിക്കുന്നതെന്ന സുഹൃത്തിന്റെ വാക്കുകള് താന് വിശ്വസിച്ചിരുന്നില്ല ഇപ്പോഴും വിശ്വസിക്കില്ലെന്നും അവര് വ്യക്തമാക്കി. തന്നെ ഒരു ഭീകര ജീവിയായിട്ടാണ് ഭര്ത്താവ് ഫേസ്ബുക്കിലൂടെ ചിത്രീകരിക്കുന്നതെന്നാണ് അമലയുടെ പരാതി.
സ്വര്ണകടത്ത് കേസിന്റെയും കുഴല്പ്പണക്കേസിന്റെയും എല്ലാ കാര്യങ്ങളും താന് ആണ് നോക്കിയിരുന്നത്. അതില് ഭര്ത്താവിനെതിരെ ഒരു മൊഴി പോലും കൊടുത്തിരുന്നില്ല. തന്റെ ജീവിതം തകര്ത്തത് അര്ജുന്റെ അമ്മയും സഹോദരനുമാണെന്നും അമല വ്യക്തമാക്കി. നിറത്തിന്റെ പേരില് അര്ജുന്റെ അമ്മ നിരന്തരം തന്നെ പരിഹസിച്ചിരുന്നു എന്നും ഇവര് ആരോപിച്ചു.
