നീണ്ടൂര് : വിളവെടുപ്പ് നടത്തി പാടശേഖരത്തില് പടുതയിട്ട് മൂടി സൂക്ഷിച്ചിരുന്നു നെല്ലില് സാമൂഹ്യ വിരുദ്ധര് കക്കൂസ് മാലിന്യം നിക്ഷേപിച്ചു. നീണ്ടൂര് മുടക്കാലി പാലത്തിനു സമീപം വെളളിക്കണ്ണി പാടശേഖരത്തിലാണ് സാമൂഹ്യവിരുദ്ധരുടെ ഹീനമായ പ്രവൃത്തിയുണ്ടായത്.
ചൊവ്വാഴ്ച രാത്രിയിലോ ഇന്നലെ പുലര്ച്ചയോ ആണ് സംഭവം ഉണ്ടായിരിക്കുന്നത്. കൊയ്തു മെതിച്ച് സൂക്ഷിച്ചിരുന്ന നെല്ല് ഇന്നലെ രാവിലെ പടുത നീക്കി ചാക്കില് നിറയ്ക്കുന്നതിനിടയിലാണ് നെല് കൂനയുടെ അടിഭാഗം നനഞ്ഞിരിക്കുന്നത് കര്ഷകരുടെ ശ്രദ്ധയില്പ്പെട്ടത്.
രണ്ട് ഏക്കറില് നിന്ന് വിളവെടുത്ത നെല്ലാണ് ഇവിടെ സൂക്ഷിച്ചിരുന്നത്. നെല്ലിന്റെ നല്ലൊരു ഭാഗം ഉപയോഗിക്കാന് കഴിയാത്ത നിലയിലായി. വിനോദ സഞ്ചാരികള് എത്തുന്ന പുഞ്ചവയല്ക്കാറ്റിെന്റ തൊട്ടടുത്താണ് സാമൂഹ്യവിരുദ്ധരുടെ ഈ തേര്വാഴ്ച.
സമൂഹ്യ വിരുദ്ധരുടെ സ്ഥിരം താവളമാണ് ഇവിടം കൂട്ടുംകുടി മദ്യപിച്ച് ശേഷം മദ്യക്കുപ്പികള് പൊട്ടിച്ച് പാടത്തേക്ക് തളളും. പാടത്തിറങ്ങുന്ന കര്ഷകരുടെയും തൊഴിലാളികളുടെയും കാലില് കുപ്പിച്ചില്ല് കുത്തിയക്കയറി പരിക്കേല്ക്കുന്നതും പതിവു സംഭവമാണ്.
പഞ്ചായത്തിലും ആരോഗ്യ വിഭാഗത്തിലും പലതവണ പരാതി നല്കിയെങ്കിലും പ്രശ്നത്തിന് പരിഹാരം ഉണ്ടായിട്ടില്ല. ഇതില് കര്ഷകര് ആശങ്കയിലാണ്. മുമ്പും പല തവണ ഈ പ്രദേശത്ത് കക്കൂസ് മാലിന്യം നിഷേപിച്ചിട്ടുണ്ട്. ഇവിടെ നിരീക്ഷണ ക്യമാറ സ്ഥാപിക്കണമെന്നും കര്ഷകരുടെ ഏറേ നാളെത്തെ ആവശ്യം പഞ്ചായത്ത് അധികൃതര് നിരാകരിക്കുകയാണ്.
