കൊച്ചി: ലൈഫ് മിഷന് വടക്കാഞ്ചേരി ഫ്ളാറ്റ് തട്ടിപ്പിലെ ഫോറിന് കോണ്ട്രിബൂഷന് റെഗുലേഷന് ആക്ട് (എഫ്.സി.ആര്.എ.) നിയമലംഘനം മുഖ്യമന്ത്രിയുടെ അറിവോടെയാണെന്ന അനില് അക്കരയുടെ വെളിപ്പെടുത്തലും ഇ.ഡിയുടെ അന്വേഷണപരിധിയില്.
മുഖ്യമന്ത്രിയുടെ അഡീ. പ്രൈവറ്റ് സെക്രട്ടറി സി.എം. രവീന്ദ്രനെ ഇ.ഡി. ചോദ്യം ചെയ്യാനൊരുങ്ങുന്നതിനിടെയാണു കേസിലെ പരാതിക്കാരനായ അനില് അക്കരയുടെ വെളിപ്പെടുത്തല്.
മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം ശിവശങ്കര് ഉള്പ്പെടെയാണ് െലെഫ് മിഷന് കോഴക്കേസിലെ പ്രതികള്. കേസില് മുന് സി.ഇ.ഒ: യു.വി. ജോസിനെ എന്ഫോഴ്സ്മെന്റ് വിളിച്ചുവരുത്തി മൊഴി എടുത്തിട്ടുണ്ട്. യൂണിടാക്കിനു കരാര് ലഭിക്കാന് ശിവശങ്കര് നടത്തിയ വഴിവിട്ട ഇടപെടലുകള് കണ്ടെത്തുകയാണു ലക്ഷ്യം.
െലെഫ് മിഷന് കോഴയിടപാടില് ഒന്നുമറിഞ്ഞിട്ടില്ലെന്നാണു എം. ശിവശങ്കര് ആവര്ത്തിക്കുന്നത്. കരാര് യൂണിടാക്കിനു തന്നെ കിട്ടാന് യു.വി. ജോസിനെ നിഷ്പ്രഭനാക്കി ശിവശങ്കര് ചരടുവലികള് നടത്തിയെന്നാണു സ്വപ്ന സുരേഷ് മൊഴി നല്കിയിരിക്കുന്നത്. യു.വി. ജോസിനെ ശിവശങ്കര് മുഖാന്തിരമാണു പരിചയപ്പെട്ടതെന്നു യൂണിടാക് ഉടമ സന്തോഷ് ഈപ്പനും മൊഴി നല്കിയിട്ടുണ്ട്.
ഇ.ഡിയുടെ അന്വേഷണം മുഖ്യമന്ത്രിയിലേക്ക് എത്തിക്കുകയാണ് അനില് അക്കരയുടെ നീക്കത്തിനു പിന്നിലെന്നാണു വിലയിരുത്തല്. സ്വപ്നയുടെ വാട്സാപ്പ് ചാറ്റുകളും ഇതേ ലക്ഷ്യംവച്ചുള്ളതാണെന്നു സംശയിക്കുന്നു.
യു.എ.ഇയിലെ റെഡ് ക്രസന്റിനെ െലെഫ് മിഷന് പദ്ധതിയിലേക്ക് കൊണ്ടുവരാന് എന്തൊക്കെ ചെയ്യണമെന്നാണു ശിവശങ്കര് ചാറ്റില് സ്വപ്നയോടു നിര്ദേശിക്കുന്നത്. ഇതിനായി മുഖ്യമന്ത്രിയുടെ ഓഫീസിലേക്ക് അയക്കേണ്ട കത്തിന്റെ മാതൃകയും നല്കുന്നുണ്ട്.
രവീന്ദ്രനോട് ഇക്കാര്യത്തില് കൂടുതല് വ്യക്തത വരുത്താമെന്നും സംഭാഷണത്തിലുണ്ട്. മുഖ്യമന്ത്രിയുടെ അഡീഷണല് പ്രൈവറ്റ് സെക്രട്ടറി സി.എം. രവീന്ദ്രന് ഇക്കാര്യങ്ങള് മുന്കൂട്ടി അറിയാമായിരുന്നു എന്നാണ് ഇ.ഡി. സംശയിക്കുന്നത്. ഇതിനു ബലം നല്കുന്നതാണ് അനില് അക്കരെയുടെ പുതിയ ആരോപണം. കോഴപ്പണം െകെപ്പറ്റിയതായി തെളിഞ്ഞാല് മാത്രമേ രവീന്ദ്രന്റെ അറസ്റ്റിനു സാധ്യതയുള്ളൂ.
എന്നാല്, ശിവശങ്കറിന്റെ ഇടപെടലുകള് അഴിമതി നടത്താന് വേണ്ടി ആയിരുന്നു എന്ന നിഗമനത്തിലാണ് ഇ.ഡി. കോഴപ്പണം കണ്ടെത്തിയ ലോക്കര് ശിവശങ്കര് പറഞ്ഞിട്ടാണു തുറന്നതെന്നു ചാര്ട്ടേഡ് അക്കൗണ്ടന്റ് വേണുഗോപാലും മൊഴി നല്കിയിട്ടുണ്ട്.
ശിവശങ്കര്, രവീന്ദ്രന് എന്നിവരിലൂടെ സ്വപ്നവഴി അന്വേഷണം മുഖ്യമന്ത്രിയിലേക്ക് എത്തിക്കാനാണ് ഇ.ഡി. ശ്രമിക്കുന്നത്. ശിവശങ്കറിന്റെ റിമാന്ഡ് റിപ്പോര്ട്ടില് മുഖ്യമന്ത്രിയും കോണ്സുല് ജനറലും സ്വപ്നയും ശിവശങ്കറും തമ്മില് ചര്ച്ച നടത്തിയെന്ന് ഇ.ഡി. ആരോപിച്ചിരുന്നു.
