രണ്ടാമത്തെ ഏകദിനത്തില് ഓസീസിനെതിരേ ഇന്ത്യന് ബാറ്റിംഗ് ചീട്ടുകൊട്ടാരം പോലെ തകര്ന്നുപോയപ്പോള് മുതല് ഉയര്ന്ന് കേള്ക്കുന്നതാണ് മലയാളിതാരം സഞ്ജു സാംസണിന്റെ പേര്. പക്ഷേ ഇന്ത്യന് നായകന് രോഹിത്ശര്മ്മ ഇതൊന്നും ഗൗരവമായി കേള്ക്കുന്നതേയില്ല.
ഏകദിനത്തിലെ തുടര്ച്ചയായി രണ്ടാം മത്സരത്തിലും യുവതാരം സൂര്യകുമാര് യാദവ് പൂജ്യത്തിന് പുറത്തായെങ്കിലും അടുത്ത ഏകദിനത്തിലും അദ്ദേഹം ടീമില് ഉണ്ടാകുമെന്നാണ് രോഹിത് ശര്മ്മ പറഞ്ഞുകൊണ്ടിരിക്കുന്നത്. തുടര്ച്ചയായി രണ്ടാം മത്സരത്തിലൂം സ്റ്റാര്ക്കിന്റെ ഒരേ രീതിയിലുള്ള പന്തിലാണ് സൂര്യകുമാര് വീണത്. ഇരു കളികളിലും വിക്കറ്റിന് മുന്നില് കുരുങ്ങുകയായിരുന്നു.
രണ്ടാം ഏകദിനത്തിലും താരം പരാജയപ്പെട്ടതോടെ സഞ്ജുസാംസണിനെ ടീമില് ഉള്പ്പെടുത്താന് വിദഗ്ദ്ധരുടേയും ആരാധകരുടേയും ഇടയില് നിന്നും മുറവിളി ഉയരുകയാണ്. ശ്രേയസ് അയ്യര് പരിക്കേറ്റ് പുറത്തായ സാഹചര്യത്തിലാണ് സൂര്യകുമാറിനെ ടീമില് ഉള്പ്പെടുത്തിയത്. എന്നാല് സൂര്യകുമാറിനേക്കാള് മികച്ച ചോയ്സ് സഞ്ജു തന്നെയായിരുന്നു എന്ന് വാദിക്കുന്നവര് ഏറെയാണ്.
കണക്കുകളുടെ പിന്ബലത്തിലാണ് ഇവര് ഈ വാദം ഉന്നയിക്കുന്നത്. നിലവില് 11 ഏകദിനം മാത്രമാണ് സഞ്ജു കളിച്ചിട്ടുള്ളത്. 330 റണ്സ് എടുത്തിട്ടുള്ള സഞ്ജുവിന്റെ ശരാശരി 66 റണ്സാണ്. എന്നാല് നേരെ ഇരട്ടി 22 ഏകദിനം കളിച്ചിട്ടും സൂര്യകുമാറിന്റെ ശരാശരി 25.47 ആണ്. 433 റണ്സാണ് സൂര്യകുമാര് യാദവ് എടുത്തിട്ടുള്ളത്. ടിട്വന്റിയില് കാണിക്കുന്ന മികവ് സൂര്യകുമാര് യാദവിന് ഏകദിനത്തില് കണ്ടെത്താന് കഴിയുന്നില്ലെന്നാണ് പ്രധാനമായും ഉയരുന്ന വിമര്ശനം.
അതേസമയം അടുത്ത ഏകദിനത്തിലും സൂര്യകുമാറിനാണ് നായകന് രോഹിത്ശര്മ്മയുടെ പിന്തുണ. ട്വന്റി20 യില് കാട്ടുന്ന അതേ മികവ് ഏകദിനത്തിലും കണ്ടെത്താന് സൂര്യകുമാറിന് കൂടുതല് അവസരം നല്കേണ്ടതുണ്ടെന്ന പക്ഷമാണ് രോഹിത്ശര്മ്മയ്ക്ക്. വൈറ്റ്ബോളില് സൂര്യകുമാറിന് കൂടുതല് മികവുണ്ടെന്നും ദൈര്ഘ്യമേറിയ ഫോര്മാറ്റില് എങ്ങിനെ കളിക്കണമെന്ന് സൂര്യകുമാറിന് അറിയാം. ശ്രേയസിന്റെ തിരിച്ചുവരവ് ഇപ്പോഴും വ്യക്തതയില്ലാതെ തുടരുമ്പോള് ആ സ്ഥാനത്ത് ഒഴിവു നികത്താന് ഇപ്പോള് അനുയോജ്യന് സൂര്യകുമാര് യാദവ് തന്നെയാണെന്ന് രോഹിത് പറയുന്നു.
