ഷാര്ജ: ഓസ്ട്രേലിയയ്ക്ക് എതിരേയുള്ള ഏകദിന പരമ്പരയില് തുടര്ച്ചയായി മൂന്ന് കളികളില് സംപൂജ്യനായി ആദ്യ പന്തില് തന്നെ മടങ്ങിയ സൂര്യകുമാര് യാദവ് നേടിയെടുത്ത റെക്കോഡിന്റെ ചര്ച്ചകള് ഇതുവരെ അവസാനിച്ചിട്ടില്ല. എന്നാല് അതിനെ വെല്ലുന്ന റെക്കോഡാണ് പാകിസ്താന് താരം അബ്ദുള്ള ഷെഫീഖ് ടി20 പരമ്പരയില് നേടിയത്. തുടര്ച്ചയായി നാലു മത്സരങ്ങളില് ഇദ്ദേഹം അക്കൗണ്ട് തുറക്കും മുമ്പ് പുറത്തായി.
അഫ്ഗാനിസ്ഥാനെതിരേ നടക്കുന്ന ക്രിക്കറ്റ് പരമ്പരയിലെ പാകിസ്താന് തോറ്റുപോയ ആദ്യ രണ്ടു മത്സരത്തിലും അബ്ദുള്ളയ്ക്ക് റണ്ണെടുക്കാന് കഴിഞ്ഞില്ല. ഷാര്ജയില് നടന്ന ആദ്യ മത്സരത്തില് ആദ്യ പന്തില് പുറത്തായ ഷെഫീഖ് ഇന്നലെ രണ്ടാം ടി20യില് ആദ്യ പന്തില് തന്നെ വിക്കറ്റിന് മുന്നില് കുടുങ്ങി. ഇതോടെ അപൂര്വങ്ങളില് അപൂര്വമായ ഒരു മോശം റെക്കോര്ഡ് ഷെഫീഖിന്റെ അക്കൗണ്ടിലായി. ടി20 യില് തുടര്ച്ചയായി നാലു മത്സരങ്ങളില് റണ്ണെടന്നും എടുക്കാതെ ഡക്കാകുന്ന ആദ്യ താരമായിട്ടാണ് പാക് താരം മാറിയത്.
രണ്ടുവര്ഷത്തെ ഇടവേളയ്ക്ക് ശേഷമാണ് അബ്ദുള്ള ഷെഫീഖ് പാക്കിസ്താന് ദേശീയ ടീമിലേക്ക് തിരിച്ചെത്തുന്നത്. 2020ല് ആയിരുന്നു താരം ഇതിന് മുമ്പ് പാക് ജഴ്സി അണിഞ്ഞത്. എന്നാല് അന്ന് ന്യൂസിലന്ഡിനെതിരെ ഓക്ലന്ഡില് നടന്ന ആദ്യ മത്സരത്തില് രണ്ട് പന്ത് മാത്രമായിരുന്നു താരം നേരിട്ടത്. ഹാമില്ട്ടണില് നടന്ന തൊട്ടടുത്ത മത്സരത്തിലും ഷെഫീഖ് രണ്ടാം പന്തില് മടങ്ങി. ടീമില് നിന്ന് പുറത്തായ ഷെഫീഖ് അഫ്ഗാനെതിരായ ടി20 പരമ്പരയിലേക്കാണ് അതിന് ശേഷം തിരിച്ചെത്തിയത്. എന്നാല് ഈ പരമ്പരയിലും താരത്തിന് മികവ് കാട്ടാനായില്ല. മൂന്ന് മത്സരങ്ങളുടെ പരമ്പരയിലെ ആദ്യ രണ്ടു മത്സരം പാകിസ്താന് അഫ്ഗാനിസ്ഥാനോട് തോട്ട് പരമ്പര കൈവിടുകയൂം ചെയ്തു.
നേരത്തേ സൂര്യകുമാര് യാദവ് ബോര്ഡര് - ഗവാസ്ക്കര് ട്രോഫിക്ക് വേണ്ടിയുള്ള ഇന്ത്യാ ഓസ്ട്രേലിയ ഏകദിന പരമ്പരയില് ആദ്യ മൂന്ന് മത്സരത്തിലും പൂജ്യത്തിന് പുറത്തായിരുന്നു. ഏകദിനത്തില് ആദ്യ മൂന്ന് മത്സരങ്ങളിലും ആദ്യം പന്തില് പുറത്താകുന്ന താരമെന്ന മോശം റെക്കോഡും നേടി.
