കുഞ്ചിത്തണ്ണി: മദ്യപസംഘം ബജികടക്കാരന്റെ പെട്ടിക്കടയെടുത്ത് അന്പതടി താഴ്ചയുള്ള കൊക്കയിലേക്കു തള്ളി. ഒപ്പം വ്യാപാരിയെ മര്ദ്ദിച്ചു. കുഞ്ചിത്തണ്ണി ടൗണ് കേന്ദ്രീകരിച്ച് വിലസുന്ന ഗുണ്ടാ-മദ്യപസംഘമാണ് അക്രമം നടത്തിയത്. ശനിയാഴ്ച െവെകിട്ട് ആറിനാണ് സംഭവം.
മദ്യപിച്ച് ലക്കുകെട്ട കുഞ്ചിത്തണ്ണി ടൗണിലെ ഒരു ഡ്രൈവര് താഴത്തെ ടൗണില് പ്രവര്ത്തിക്കുന്ന ഹോട്ടലിലെത്തി പൊറോട്ട ആവശ്യപ്പെട്ടു. പൊറോട്ട പാഴ്സലായി നല്കിയശേഷം പണം വാങ്ങിയ ഹോട്ടല് ജീവനക്കാരനെ ഇയാള് മര്ദ്ദിച്ചു. തുടര്ന്ന് ഹോട്ടലിനു സമീപത്തുള്ള ബജിക്കടയില് എത്തിയ ഇയാള് ബജി വാങ്ങി. തുടര്ന്ന് പണം നല്കുന്നതിെന ചൊല്ലി തര്ക്കമായി. വാക്കേറ്റം രൂക്ഷമായപ്പോള് ഇയാള് സംഘത്തിലുള്ളവരെ വിളിച്ചുവരുത്തുകയും അവര് ബജിക്കട എടുത്ത് അന്പതടി താഴ്ചയുളള കൊക്കയിലേക്ക് വലിച്ചെറിയുകയുമായിരുന്നു.
അഞ്ചുവര്ഷമായി കുഞ്ചിത്തണ്ണി ടൗണില് ബജിക്കച്ചവടം നടത്തുന്ന തമിഴ്നാട് സ്വദേശി രാജയുടെ കടയാണ് മദ്യപിച്ചെത്തിയ ഗുണ്ടാസംഘം നശിപ്പിച്ചത്. മര്ദ്ദനത്തില് പരുക്കറ്റ രാജ (47) അടിമാലി താലൂക്ക് ആശുപത്രിയില് ചികിത്സയിലാണ്. തയ്യാറാക്കി വച്ചിരുന്ന ബജികളും ബജി തയാറാക്കുന്നതിനുള്ള വസ്തുക്കളും ഇവര് റോഡരികിലേക്ക് വലിച്ചെറിഞ്ഞു. കുഞ്ചിത്തണ്ണി ടൗണിലെ ഭക്ഷണശാലകളില് െവെകുന്നേരം മദ്യപരുടെ വിളയാട്ടം രൂക്ഷമാണെന്ന് ഒട്ടു മിക്ക വ്യാപാരികളും പറയുന്നു.
വെള്ളത്തൂവല് പോലീസ് ടൗണിലെത്തി സംഭവത്തെക്കുറിച്ച് അന്വേഷണം ആരംഭിച്ചു. വ്യാപാരിയുടെ മൊഴിയെടുത്ത ശേഷം കേസ് ചാര്ജു ചെയ്യുമെന്ന് പോലീസ് പറഞ്ഞു. ഒരു നിര്ധന കുടുംബത്തിന്റെ ജീവിതോപാധി പൂര്ണ്ണമായി തകര്ത്ത മദ്യപ-ഗുണ്ടാ സംഘത്തിനെതിരെ കുഞ്ചിത്തണ്ണി ടൗണില് പ്രതിഷേധം ശക്തമായി. കുഞ്ചിത്തണ്ണി ടൗണില് നടക്കുന്ന മദ്യപ-ഗുണ്ട വിളയാട്ടങ്ങള്ക്കെതിരെ കര്ശനനടപടി സ്വീകരിക്കാന് അധികൃതര് തയ്യാറാകണമെന്ന് ടൗണിലെ വ്യാപാരികളും ഡ്രൈവര്മാരും നാട്ടുകാരും ആവശ്യപ്പെടുന്നു.
