ആന്ധ്രാ പ്രദേശില് ചന്ദ്രബാബു നായിഡുവിന്റെ പ്രതാപകാലത്ത് തകര്ന്നടിഞ്ഞ നിലയിലായിരുന്നു കോണ്ഗ്രസ്. നായിഡു പതിയെ ദേശീയ നേതാവായി ഉയരുകയും ചെയ്തു. കോണ്ഗ്രസിന് ഇനി സംസ്ഥാന രാഷ്ട്രീയത്തില് തിരിച്ചുവരവില്ലെന്നു നിരീക്ഷകര് പ്രവചിച്ച കാലം. വയോധിക നേതാക്കളെ മറികടന്നു ഡോ. െവെ.എസ്. രാജശേഖര് റെഡ്ഡി പാര്ട്ടിയുടെ മുഖമായത് അക്കാലത്താണ്. 1999 ല് അദ്ദേഹം ആന്ധ്രാ പ്രദേശിന്റെ പ്രതിപക്ഷ നേതാവായി. സംസ്ഥാനമൊട്ടാകെ അദ്ദേഹം സഞ്ചരിച്ചു. അഞ്ച് വര്ഷം പിന്നിട്ടപ്പോള് ആന്ധ്ര പ്രദേശ് കോണ്ഗ്രസിന്റെ കോട്ടയായി.
രാജശേഖര് റെഡ്ഡി മുഖ്യമന്ത്രിയും. രാജശേഖര് റെഡ്ഡി ഹെലികോപ്റ്റര് അപകടത്തില് അന്തരിച്ചതോടെയാണു കോണ്ഗ്രസിന്റെ കഷ്ടകാലം തുടങ്ങിയത്. തെലങ്കാനയില് കെ. ചന്ദ്രശേഖര് റാവു കരുത്താര്ജിച്ചു. അദ്ദേഹത്തിന്റെ ആവശ്യപ്രകാരം ആന്ധ്രയെ വിഭജിച്ചു തെലങ്കാന എന്ന പുതിയ സംസ്ഥാനം രൂപീകരിച്ചു. തെലങ്കാന റാവുവിന്റെ കോട്ടയായി. ആന്ധ്രയില് കോണ്ഗ്രസ് നാമാവിശേഷമായി.
2018 തെരഞ്ഞെടുപ്പില് മത്സരിച്ച് 94 സീറ്റില് 19 എണ്ണത്തില് മാത്രമാണ് കോണ്ഗ്രസിന് നേടാനായത്. അവരില് 12 എം.എല്.എമാരും ചന്ദ്രശേഖര് റാവുവിന്റെ പാര്ട്ടിയിലേക്കു കൂറുമാറി. ഉപതെരഞ്ഞെടുപ്പുകളിലും കോണ്ഗ്രസിന് നേട്ടമുണ്ടാക്കാനായില്ല. അഞ്ച് ഉപതെരഞ്ഞെടുപ്പുകളില് മൂന്നെണ്ണത്തില് ബി.ജെ.പിയും രണ്ടെണ്ണത്തില് ബി.ആര്.എസും ജയിച്ചപ്പോള് കോണ്ഗ്രസിനാകട്ടെ കയ്യിലുണ്ടായിരുന്ന മൂന്ന് സീറ്റുകള് നഷ്ടപ്പെടുകയും ചെയ്തു. തെലങ്കാനയില് ഇനി ബി.ആര്.എസും ബി.ജെ.പിയും ഏറ്റുമുട്ടും എന്ന പ്രതീതി ഉയര്ന്ന കാലമായിരുന്നു അത്.
നാശം നേരിടുന്ന കോണ്ഗ്രസ് പാര്ട്ടിയെ നയിക്കാനാണു രേവന്ത് റെഡ്ഡി(54) എത്തിയത്. ബി.ജെ.പിയുടെ വിദ്യാര്ഥി വിഭാഗമായ എ.ബി.വി.പിയില് തുടങ്ങി തെലുങ്കുദേശം പാര്ട്ടിയിലൂടെ വളര്ന്ന നേതാവ്. അദ്ദേഹത്തെ പി.സി.സി. അധ്യക്ഷനാക്കാനുള്ള െഹെക്കമാന്ഡ് തീരുമാനത്തിനെതിരേ മുതിര്ന്ന നേതാക്കള് മുറുമുറുത്തു. 2021 ലാണ് ഉത്തം കുമാര് റെഡ്ഡിയില്നിന്ന് രേവന്ത് റെഡ്ഡി പാര്ട്ടിയുടെ നിയന്ത്രണം ഏറ്റെടുത്തത്.
രേവന്ത് റെഡ്ഡി അധ്യക്ഷനായതിനു ശേഷം കോണ്ഗ്രസിനെ നയിക്കാന് നേതാവായി, പാര്ട്ടിയുടെ രീതികള് മാറി. സംഘടനാതലം മുതലുള്ള കാര്യങ്ങളില് മാറ്റങ്ങള് കൊണ്ടുവന്നു. നേതാവിന്റെ ജാഡയില്ലാതെ താഴേത്തട്ടിലേക്കിറങ്ങിയുള്ള രേവന്തിന്റെ പ്രവര്ത്തനം അണികളെ മടക്കിക്കൊണ്ടുവന്നു. രാഹുല് ഗാന്ധി നടത്തിയ ഭാരത് ജോഡോ യാത്ര മറ്റ് സംസ്ഥാനങ്ങളിലെന്ന പോലെ തെലങ്കാനയിലും പ്രവര്ത്തകര്ക്കിടയില് പുതിയ ഊര്ജം നല്കി
.
ഇതോടെയാണു രാജശേഖര് റെഡ്ഡിയുടെ പാത പിന്തുടരാന് രേവന്ത് റെഡ്ഡി തീരുമാനിച്ചത്. 2022 ല് തന്നെ അദ്ദേഹം തെരഞ്ഞെടുപ്പ് പ്രചാരണം തുടങ്ങി. സംസ്ഥാനത്തെ എല്ലാ മണ്ഡലങ്ങളിലും അദ്ദേഹമെത്തി. ബി.ആര്.എസില്നിന്ന് 35 ലധികം നേതാക്കളെ കോണ്ഗ്രസില് എത്തിച്ചായിരുന്നു അടുത്ത പ്രഹരം.
''ഡിസംബര് ഒമ്പത് എന്നൊരു ദിവസമുണ്ടെങ്കില് തെലങ്കാനയില് ഒരു കോണ്ഗ്രസ് മുഖ്യമന്ത്രി സത്യപ്രതിജ്ഞ ചെയ്ത് അധികാരത്തിലേറും. എല്.ബി സ്റ്റേഡിയത്തില് നടക്കാന്പോകുന്ന സത്യപ്രതിജ്ഞ ചടങ്ങിനായി നിങ്ങള് തയാറായിക്കോളൂ.''-അദ്ദേഹം അണികളോട് പറഞ്ഞു.
ഡിസംബര് 9 വെറുമൊരു തീയതി അല്ല തെലങ്കാനക്കാര്ക്ക്. അത് സോണിയ ഗാന്ധിയുടെ ജന്മദിനമാണ്. ഒപ്പം തെലങ്കാന എന്ന സംസ്ഥാനം രൂപീകരിക്കുമെന്ന് 2009ല് കേന്ദ്ര ആഭ്യന്തരമന്ത്രി പി ചിദംബരം പ്രഖ്യാപിച്ച ദിവസം കൂടിയാണ്.
മുഖ്യമന്ത്രി കെ. ചന്ദ്രശേഖര് റാവുവിനെ അദ്ദേഹത്തിന്റെ മണ്ഡലത്തിലെത്തി നേരിടാന് രേവന്ത് ഒരുങ്ങിയത് കോണ്ഗ്രസ് അണികള്ക്കും ആവേശമായി. കാമാറെഡ്ഡി മണ്ഡലത്തില് കെ.സി.ആറും രേവന്തും ബി.ജെ.പി. സ്ഥാനാര്ഥിയോട് തോറ്റെന്നത് മറ്റൊരു കാര്യം. സ്വന്തം മണ്ഡലമായ കോടങ്കലില് വന് വിജയമാണ് രേവന്ത് നേടിയത്.
