ചിലരെ ഒക്കെ കാണുമ്പോള് പ്രായം റിവേഴ്സ് ഗിയറിലാണോ എന്ന് നാം പറഞ്ഞുപോകാറുണ്ട്. വാര്ധക്യത്തിലാണെങ്കിലും യുവത്വം തുളുമ്പു അവരുടെ ശരീര പ്രകൃതിയാണ് ഇങ്ങനെ ചോദിക്കാന് നമ്മുക്ക് പ്രേരണയാകുന്നത്. പ്രായത്തിന്റെ പരിമിതികളെ മറികടക്കാനായി തികഞ്ഞ വ്യായാമവും ഭക്ഷണ ശീലവും ഒക്കെ ഇവര് പിന്തുടരുന്നതുകൊണ്ടാണ് ആരോഗ്യത്തോടെയിരിക്കാന് ഇവര്ക്ക് കഴിയുന്നത്. പ്രായമാകുമ്പോള് മടിപിടിച്ച് എവിടെയെങ്കിലും ചടഞ്ഞ് കൂടി ഇരിക്കുന്നവര്ക്ക് ഇങ്ങനെയുള്ള ആളുകള് പ്രചോദനമാകാറുണ്ട്. ഇതിനുള്ള ഉദാഹരണമാണ് സിംഗപ്പൂരില് നിന്നുള്ള ഈ മുത്തശ്ശി.
ഈ മുത്തശ്ശിയുടെ പേര് ഷാലറ്റ് വോങ് എന്നാണ്. ഇവര്ക്ക് 78 വയസ്സ് പ്രായമുണ്ട്. വോങ്ങിന്റെ മകള് യാന് ലിന് പങ്കിട്ട വീഡിയോയില് ഈ പ്രായത്തിലും അവര് പുഷ് അപ്പും, പുള് അപ്പും, വെയ്റ്റ് ലിഫ്റ്റും ഒക്കെ ഒരു തളര്ച്ചയോ മടിയോ ഒന്നും കൂടാതെ ചെയ്യുന്നത് കാണാം. അമ്മ 57 -ാമത്തെ വയസ്സിലാണ് വ്യായാമം ചെയ്ത് തുടങ്ങുന്നത് എന്നാണ് യാന് ലിന് പറയുന്നത്. 'കോര്പ്പറേറ്റ് ലോകത്ത് ജോലി ചെയ്തപ്പോള് അമ്മ ആരോഗ്യകാര്യത്തില് അലസയായിരുന്നു, ധാരാളം യാത്ര ചെയ്യേണ്ടി വന്നിരുന്നു. ആരോഗ്യത്തോടെയിരിക്കാന് ജീവിതശൈലി മാറ്റിയേ തീരൂ എന്ന് പിന്നെയാണ് അവര്ക്ക് മനസിലാവുന്നത്' എന്നും യാന് ലിന് പറഞ്ഞു.
അമ്മയ്ക്ക് കൊളസ്ട്രോള് കൂടുതലാണ്. അതിനൊക്കെയുള്ള പരിഹാരം എന്ന രീതിയിലാണ് വിരമിച്ച ശേഷം 57 -ാം വയസ്സില് വര്ക്കൗട്ട് ചെയ്ത് തുടങ്ങുന്നത് എന്നും യാന് ലിന് പറഞ്ഞു. ഫിറ്റ്നെസ്സ് കോച്ചുകളാണ് വോങ്ങിന്റെ മകളായ യാന് ലിനും അതുപോലെ മകനും. ഇരുവരും ചേര്ന്നാണ് അമ്മയ്ക്കുള്ള വ്യായാമം ചിട്ടപ്പെടുത്തിക്കൊടുക്കുന്നത്. ആഴ്ചയില് മൂന്നു ദിവസം വോങ് ഈ വര്ക്കൗട്ടുകള് മുടങ്ങാതെ ചെയ്യും.
നാല് വര്ഷം മുമ്പ് തന്റെ കൂടെ ട്രെയിനിംഗ് ആരംഭിക്കുമ്പോള് സഹായമില്ലാതെ സിറ്റ് അപ്പ്സ് ചെയ്യണം എന്ന് മാത്രമായിരുന്നു അവര്ക്ക്. അപ്പോഴും പുഷ് അപ്പും പുള് അപ്പുമൊന്നും മനസിലുണ്ടായിരുന്നില്ല എന്നും അവള് പറഞ്ഞു. എപ്പോഴും ഫിറ്റായിരിക്കാനും വര്ക്കൗട്ട് ചെയ്യാനുള്ള മോട്ടിവേഷന് കിട്ടാനും എന്ത് ചെയ്യണമെന്ന ചോദ്യത്തിന് വോങ്ങിനും യാന് ലിനും പറയാനുള്ളത് ഒരേ കാര്യമാണ്. നല്ലൊരു കോച്ചുണ്ടെങ്കില് മടിയൊക്കെ മാറി വര്ക്കൗട്ട് ചെയ്ത് തുടങ്ങും എന്ന്.
