കണ്ണൂര്: പ്രകാശ് ജാവദേക്കറെ കണ്ടിരുന്നെന്നും എന്നാല് രാഷ്ട്രീയ കാര്യങ്ങള് സംസാരിച്ചിട്ടില്ലെന്നും എല്ഡിഎഫ് കണ്വീനര് ഇ പി ജയരാജന്. കെ സുധാകരനും ശോഭാസുരേന്ദ്രനും ചേര്ന്ന് തനിക്കെതിരെ ഗൂഢാലോചന നടത്തുകയാണെന്നും പറഞ്ഞു. ജയരാജന് ബിജെപിയിലേക്ക് പോകാന് ശ്രമം നടത്തിയെന്നും പ്രകാശ് ജാവദേക്കറുമായി കൂടിക്കാഴ്ച നടത്തിയെന്നുമുള്ള ആരോപണത്തിനാണ് അദ്ദേഹം മറുപടി നല്കിയത്.
മകന്റെ ആക്കുളത്തുള്ള ഫ്ളാറ്റില് വെച്ചാണ് ജാവദേക്കറെ കണ്ടതെന്നും തന്നെ കാണാന് പലരും വരാറുണ്ട് അതുപോലെയാണ് കണ്ടത്. എന്നെ കാണാന് മകന്റെ ഫ്ളാറ്റിലാണ് വന്നത്. ഞാന് ഫ്ളാറ്റില് ഉള്ളപ്പോള് മുന്നറിയിപ്പ് ഇല്ലാതെയാണ് കയറി വരികയായിരുന്നു. എന്നാല് രാഷ്ട്രീയ കാര്യം സംസാരിച്ചില്ല. സംസാരിച്ചാല് മാറുന്നതല്ല തന്റെ രാഷ്ട്രീയമെന്നും പറഞ്ഞു. ബിജെപിയിലേക്കുപോകുമെന്ന ആരോപണം അടിസ്ഥാന രഹിതമാമെന്നും മോദി പറഞ്ഞാലും അക്കാര്യത്തില് താന് കുലുങ്ങില്ലെന്നും ജയരാജന് പ്രതികരിച്ചു.
ദല്ലാള് നന്ദകുമാര് തന്നെ ടാര്ഗറ്റ് ചെയ്യുന്നുവെന്ന് കരുതുന്നില്ല. നേരത്തേ ബിജെപിയില് എത്തിക്കാന് വേണ്ടി നേരത്തേ ചര്ച്ച നടത്തിയ സിപിഎം നേതാവ് ഇ.പി. ജയരാജനാണെന്നും എന്നാല് എന്തുകൊണ്ടാണ് അദ്ദേഹം ബിജെപിയില് എത്താതെ പോയതെന്ന് പിണറായി വിജയന് അറിയാമെന്നും നേരത്തേ ശോഭാസുരേന്ദ്രന് വ്യക്തമാക്കിയിരുന്നു. ശോഭാ സുരേന്ദ്രനുമായി കൂടിക്കാഴ്ച നടത്തിയിട്ടില്ലെന്നും ഇ.പി. പറഞ്ഞു.
ഒരിക്കല്പോലും നേരിട്ട് ശോഭാ സുരേന്ദ്രനുമായി സംസാരിച്ചിട്ടില്ല. ഉമ്മന്ചാണ്ടിയുടെ സംസ്കാര ചടങ്ങിന്റെ ഭാഗമായി കോട്ടയത്ത് വച്ച് കണ്ടിരുന്നു. തന്റെ മകനും ശോഭയുമായി ഒരു ബന്ധവുമില്ല. മകന് രാഷ്ട്രീയത്തിലില്ല. എറണാകുളത്ത് ഒരു വിവാഹത്തിന് പോയപ്പോള് ഹോട്ടലിന്റെ റിസപ്ഷനില് വെച്ച് കണ്ടു. അന്ന് നമ്പര് വാങ്ങി പിന്നീട് ശോഭ മകനെ ബന്ധപ്പെട്ടിരുന്നു. അവര് മകന്റെ ഫോണില് വിളിച്ചിട്ടും അതിന് മകന് പ്രതികരിച്ചില്ലെന്നും പറഞ്ഞു. വോട്ടുരേഖപ്പെടുത്തിയ ശേഷം മാധ്യമങ്ങളോട് പ്രതികരിക്കുകയായിരുന്നു അദ്ദേഹം.
