പാലക്കാട് : നടക്കാനിരിക്കുന്ന നിയമസഭാ തെരഞ്ഞെടുപ്പില് വന്ഭൂരിപക്ഷത്തില് ജയിക്കുമെന്ന് ബിജെപി സ്ഥാനാര്ത്ഥി ശോഭാസുരേന്ദ്രന്. ഇത്തവണ തനിക്ക് രണ്ടു മുന്നണികളില് നിന്നും വോട്ടുകള് കിട്ടുമെന്നും തനിക്കെതിരേ മത്സരിക്കുന്ന നൂലില് കെട്ടിയിറക്കിയ സ്ഥാനാര്ത്ഥികളെ പാലക്കാട്ടെ ജനങ്ങള് തള്ളുമെന്നും കേരളത്തില് ബിജെപി ഡബിള് എഞ്ചിന് സര്ക്കാര് ഉണ്ടാക്കുമെന്നും പറഞ്ഞു.
വികസനത്തെക്കുറിച്ച് ചര്ച്ച ചെയ്യുന്ന തെരഞ്ഞെടുപ്പാണ് ഇത്. എ ക്ലാസ് മണ്ഡലത്തില് മത്സരിക്കുന്നത് ജയിക്കാന് വേണ്ടിയാണെന്നും ശോഭാ സുരേന്ദ്രന് പ്രതികരിച്ചു. നാടിനെ മാറ്റുക വികസനത്തിന്റെ മാര്ഗ്ഗത്തിലേക്ക് എത്തിക്കുക എന്നതാണ് ബിജെപി ഉദ്ദേശിക്കുന്നത്. ജയിച്ചുകഴിഞ്ഞാല് പിറ്റേദിവസം തന്നെ പാലക്കാട് എംഎല്എ ഓഫീസ് തുറന്ന് ജനസഭ നടത്തി വികസനം കൊണ്ടുവരാനാണ് ഉദ്ദേശിക്കുന്നത്.
സാമൂഹ്യമേഖലയ്ക്ക് വേണ്ടിട്ട് പത്തുദിവസം പോലും പ്രവര്ത്തിക്കാത്ത ഒരാള് പെട്ടെന്ന് സ്ഥാനാര്ത്ഥിയാകുന്നതാണ് മറ്റ് രണ്ടു മുന്നണിയിലും കണ്ടത്. ദീര്ഘനാള് പാര്ട്ടിക്ക് വേണ്ടി പ്രവര്ത്തിക്കുന്നവരെ പോലും ത്ള്ളിയാണ് ഇവര് വന്നിരിക്കുന്നത്. അത്തരം ആള്ക്കാരെ ജനം തള്ളുമെന്നും പറഞ്ഞു. ഒരാഴ്ച പോലും ജനങ്ങള്ക്കിടയില് അവര്ക്ക് വേണ്ടി പ്രവര്ത്തിക്കാത്ത സ്വന്തം ജീവിതത്തിനായി മാത്രം സമയം ചെലവഴിച്ച പൊതുജീവിതം നടത്താത്ത ആള്ക്കാരെ ജനം തള്ളുമെന്നും പറഞ്ഞു. താന് ദീര്ഘകാലമായി ജനങ്ങള്ക്കിടയില് തന്നെ പ്രവര്ത്തിക്കുന്നയാളാണ്. കെ.സി. വേണുഗോപാലിനെതിരേ കഴിഞ്ഞ പാര്ലമെന്റ് തെരഞ്ഞെടുപ്പില് മത്സരിച്ചപ്പോള് 40,000 വോട്ടിലധികം തനിക്ക് കിട്ടിയിരുന്നു. ഇത്തവണ തനിക്ക് ബിജെപിയ്ക്ക് പുറമേ ഇടതുപക്ഷത്തെയും കോണ്ഗ്രസിലെയും വോട്ടുകള് കൂടി തനിക്ക് കിട്ടുമെന്നും പറഞ്ഞു.
പാലക്കാട്ടെ ഡീല് നടത്തുന്നത് വി.ഡി. സതീശനാണ്. ജമാ അത്തെ ഇസ്ളാമിയുമായി സതീശന് ഡീല് ചെയ്യുന്നു. ഡീലിന്റെ ഭാഗമായിട്ടാണ് കുഞ്ഞാലിക്കുട്ടിക്ക് പോലും സ്വന്തം മണ്ഡലം വിട്ടുകൊടുക്കേണ്ടി വന്നതെന്നും പറഞ്ഞു. എസ്ഡിപിഐയുടേയും ജമാ അത്തെ ഇസ്ളാമിയുടേയും തിണ്ണ നിരങ്ങി നടക്കുകയാണ് പ്രതിപക്ഷ നേതാവ്. ജമാ അത്തെ ഇസ്ളാമിയും എസ്ഡിപിയുമായും വി.ഡി. സതീശന് ഡീല് ഉണ്ടാക്കിയിരിക്കുകയാണ്. വികസന ചര്ച്ചയ്ക്ക് പകരം സ്ഫോടനങ്ങളും കുഴപ്പങ്ങളും ഉണ്ടാക്കുന്നവരുമായി ഡീല് ഉണ്ടാക്കുകയാണ് കോണ്ഗ്രസ് ചെയ്യുന്നത്.
