ബെര്ഗാമോ: ലോകഫുട്ബോളിലെ നീലക്കുപ്പായക്കാര് വീണ്ടും ഒരു ലോകകപ്പിനരികേ. യോഗ്യതാറൗണ്ടില് പ്ളേ ഓഫീലേക്ക് വീണുപോയ അസൂറികള് പ്ളേ ഓഫില് 2-0 ന് നോര്ത്തേണ് അയര്ലണ്ടിനെ തോല്പ്പിച്ചു. ഇതോടെ 2014-ന് ശേഷമുള്ള തങ്ങളുടെ ആദ്യ ലോകകപ്പ് പ്രവേശനത്തിന് ഇറ്റലി ഒരു പടി കൂടി അരികിലെത്തി. ബെര്ഗാമോയില് നടന്ന പ്ലേ-ഓഫ് സെമി ഫൈനലില് വടക്കന് അയര്ലന്ഡിന്റെ ലോകകപ്പ് സ്വപ്നങ്ങള് തകര്ത്താണ് നാല് തവണ ലോക ചാമ്പ്യന്മാരായ ഇറ്റലി വിജയം കുറിച്ചത്.
മത്സരത്തിന്റെ 56-ാം മിനിറ്റില് ന്യൂകാസില് യുണൈറ്റഡ് മിഡ്ഫീല്ഡര് സാന്ദ്രോ ടൊണാലി ഉതിര്ത്ത തകര്പ്പന് ഗോളാണ് സന്ദര്ശകരുടെ പ്രതിരോധം തകര്ത്തതും സ്റ്റേഡിയത്തിലെ പിരിമുറുക്കം ലഘൂകരിച്ചതും. കളി അവസാനിക്കാന് 10 മിനിറ്റ് ശേഷിക്കെ മോയിസ് കീന് രണ്ടാം ഗോള് കൂടി നേടിയതോടെ ഇറ്റലി വിജയം ഉറപ്പിച്ചു. ശരാശരി പ്രായം 22.5 ആയ യുവ കളിക്കാരുമായാണ് അയര്ലന്റ് ഇറ്റലിയെ തേടി വന്നത്.
മത്സരത്തിന്റെ തുടക്കത്തില് ഇറ്റലിയെ പ്രതിരോധത്തിലാക്കാനും മികച്ച മുന്നേറ്റങ്ങള് നടത്താനും അവര്ക്ക് സാധിച്ചെങ്കിലും ഗോള് നേടുന്നതില് പരാജയപ്പെട്ടത് അവര്ക്ക് തിരിച്ചടിയായി. 40 വര്ഷത്തിന് ശേഷം തങ്ങളുടെ നാലാമത്തെ ലോകകപ്പ് ലക്ഷ്യമിട്ടിറങ്ങിയ വടക്കന് അയര്ലന്ഡിന് ഇറ്റാലിയന് ഗോള്കീപ്പര് ജിയാന്ലൂജി ഡോണറുമ്മയെ കാര്യമായി പരീക്ഷിക്കാന് കഴിഞ്ഞില്ല.
തുടര്ച്ചയായി മൂന്ന് ടൂര്ണമെന്റുകള് നഷ്ടപ്പെടുത്തുന്ന ആദ്യ ലോക ചാമ്പ്യന്മാരെന്ന ചീത്തപ്പേര് ഒഴിവാക്കാനുള്ള കടുത്ത സമ്മര്ദ്ദത്തിലായിരുന്നു ജൈന്നാരോ ഗട്ടൂസോയുടെ ഇറ്റലി. കോനര് ബ്രാഡ്ലി, ഡാന് ബല്ലാര്ഡ്, അലി മക്കാന് എന്നീ പ്രമുഖ താരങ്ങളില്ലാതെയാണ് വടക്കന് അയര്ലന്ഡ് പൊരുതിയത്. ഇനി നടക്കുന്ന പ്ലേ-ഓഫ് ഫൈനലില് ഇറ്റലി ബോസ്നിയ-ഹെര്സഗോവിനയെ നേരിടും.
കാര്ഡിഫില് നടന്ന മത്സരത്തില് പെനാല്റ്റി ഷൂട്ടൗട്ടില് വെയില്സിനെ തകര്ത്താണ് (43) ബോസ്നിയ ഫൈനലിലെത്തിയത്. ചൊവ്വാഴ്ച നടക്കുന്ന ഈ മത്സരത്തിലെ വിജയികള്ക്ക് ലോകകപ്പിലെ ഗ്രൂപ്പ് ബി-യില് കാനഡ, സ്വിറ്റ്സര്ലന്ഡ്, ഖത്തര് എന്നിവര്ക്കൊപ്പം ഇടം ലഭിക്കും. പരാജയപ്പെട്ട വടക്കന് അയര്ലന്ഡ് ഇനി കാര്ഡിഫില് വെയില്സിനെതിരെ ഒരു സൗഹൃദ മത്സരത്തില് ഏറ്റുമുട്ടും.
