പാലക്കാട്: മണ്ണാർക്കാട്ടെ അനുമോദനച്ചടങ്ങിനിടെ കുട്ടികളെ അപമാനിച്ചെന്ന ആരോപണത്തിൽ മുൻ ഉന്നത വിദ്യാഭ്യാസ മന്ത്രി കെ.ടി. ജലീൽ വിവാദത്തിൽ. ചടങ്ങിൽ പങ്കെടുത്ത വിദ്യാർഥികളോട് "അക്ഷരമറിയില്ലേ?" എന്ന് ചോദിക്കുകയും, വിലാസം തെറ്റായി എഴുതിയെന്ന് ആരോപിച്ച് ഒരു കുട്ടിയെ വേദിയിലേക്ക് വിളിച്ചുവരുത്തി ചെവിയിൽ നുള്ളുകയും ചെയ്തതായി ആരോപണമുണ്ട്.
സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ നടപടിക്കെതിരെ വിമർശനം ശക്തമായി. കുട്ടിയുടെ ചെവിയിൽ നുള്ളുന്ന രംഗം ദൃശ്യങ്ങളിൽ കാണാമെന്നാണ് ആരോപണം.
മണ്ണാർക്കാട് നഗരസഭയിലെ 19, 20, 22 വാർഡുകളുടെ വിജയോത്സവത്തിന്റെ ഭാഗമായി സംഘടിപ്പിച്ച അനുമോദനച്ചടങ്ങ് ഉദ്ഘാടനം ചെയ്യുന്നതിനിടെയായിരുന്നു സംഭവം.
അതേസമയം, സംഭവത്തിൽ കെ.ടി. ജലീലിന്റെ പ്രതികരണം ഇതുവരെ പുറത്തുവന്നിട്ടില്ല. പ്രചരിക്കുന്ന ദൃശ്യങ്ങളുടെയും ആരോപണങ്ങളുടെയും പശ്ചാത്തലത്തിൽ സംഭവം ചർച്ചയാവുകയാണ്.
