ലഖ്നൗ: ഉത്തർപ്രദേശിലെ സേവതയിൽ നിന്നുള്ള ബിജെപി എംഎൽഎയായ ജ്ഞാൻ തിവാരിയുടെ മകളെ വ്യാജ തിരിച്ചറിയൽ രേഖകൾ ഉപയോഗിച്ച് ഒരു തട്ടിപ്പുകാരൻ കബളിപ്പിച്ച് വിവാഹം കഴിച്ചതായി പരാതി. വിവിധ സംസ്ഥാനങ്ങളിലായി ഇയാൾ ഇതിനകം 25 സ്ത്രീകളെ വിവാഹം കഴിച്ച് തട്ടിപ്പ് നടത്തിയിട്ടുണ്ടെന്നും എംഎൽഎ ആരോപിക്കുന്നു.
ശനിയാഴ്ച പോലീസ് നൽകിയ വിവരപ്രകാരം, എംഎൽഎയുടെ പരാതിയെ തുടർന്ന് റെയുസ പോലീസ് സ്റ്റേഷനിൽ എഫ്ഐആർ രജിസ്റ്റർ ചെയ്യുകയും, മുഖ്യപ്രതിയായ പ്രഖർ ത്രിവേദിയെയും പിതാവ് അനുജ് ത്രിവേദിയെയും അറസ്റ്റ് ചെയ്യുകയും ചെയ്തു. ആഗസ്റ്റ് 6-ന് മകളോടൊപ്പം സോഷ്യൽ മീഡിയയിൽ പങ്കുവെച്ച വീഡിയോയിലൂടെയാണ് ജ്ഞാൻ തിവാരി ഈ ഗുരുതര ആരോപണങ്ങൾ ഉന്നയിച്ചത്.
ആരോപിതരായ കുടുംബവുമായുള്ള എല്ലാ സാമൂഹിക, വ്യക്തിപരമായ ബന്ധങ്ങളും താൻ വിച്ഛേദിച്ചതായും മകളെ സ്വന്തം വീട്ടിലേക്ക് തിരിച്ചുകൊണ്ടുവന്നതായും എംഎൽഎ അറിയിച്ചു. ഈ വിവാഹം തന്റെ കുടുംബത്തിന് കനത്ത മാനസികാഘാതമുണ്ടാക്കിയെന്നും, ഒരു ജനപ്രതിനിധി എന്ന നിലയിലുള്ള തന്റെ പ്രതിച്ഛായയെയും ഇത് ബാധിച്ചെന്നും അദ്ദേഹം പറഞ്ഞു. പ്രതികൾക്ക് വധശിക്ഷ ഉൾപ്പെടെയുള്ള കടുത്ത ശിക്ഷ നൽകണമെന്ന് എംഎൽഎ ആവശ്യപ്പെട്ടു.
എംഎൽഎയുടെ മകളെ 2024-ലാണ് പ്രഖർ ത്രിവേദി വിവാഹം കഴിച്ചത്. മിശ്രിഖിലെ ചന്ദ്രാവൽ സ്വദേശിയായ പ്രഖർ, വിവാഹത്തിന് മുമ്പ് താൻ മുംബൈ കേന്ദ്രമായി പ്രവർത്തിക്കുന്ന റിയൽ എസ്റ്റേറ്റ് ബിസിനസുകാരനാണെന്നാണ് സ്വയം പരിചയപ്പെടുത്തിയിരുന്നത്. എന്നാൽ തന്റെ ക്രിമിനൽ പശ്ചാത്തലവും മുൻകാല വിവാഹങ്ങളും ഇയാൾ തിവാരിയുടെ കുടുംബത്തിൽ നിന്ന് മറച്ചുവെച്ചിരുന്നു.
പ്രാദേശികമായി അന്വേഷണം നടത്തിയ ശേഷവും, ആ പ്രദേശത്തെ സ്വാധീനമുള്ള ചിലരുടെ അനുകൂല അഭിപ്രായങ്ങൾ മാനിച്ചുമാണ് വിവാഹം ഉറപ്പിച്ചത്. എന്നാൽ വിവാഹം കഴിഞ്ഞ് രണ്ടര വർഷത്തോളം കഴിഞ്ഞപ്പോഴാണ് പ്രഖറിന്റെ നിയമവിരുദ്ധ പ്രവർത്തനങ്ങളെക്കുറിച്ചുള്ള വിവരങ്ങൾ സോഷ്യൽ മീഡിയയിലൂടെയും മറ്റ് സ്രോതസ്സുകളിലൂടെയും കുടുംബത്തിന് ലഭിക്കുന്നത്.
മഹാരാഷ്ട്ര ഉൾപ്പെടെയുള്ള വിവിധ സംസ്ഥാനങ്ങളിലെ നിരവധി സ്ത്രീകളെ വ്യാജ വിലാസങ്ങൾ കാണിച്ച് പ്രണയത്തിലാക്കി വഞ്ചിച്ചിട്ടുണ്ടെന്നാണ് ബിജെപി എംഎൽഎ ആരോപിക്കുന്നത്. വ്യാജ തിരിച്ചറിയൽ രേഖകൾ ഉപയോഗിച്ച് ഇയാൾ ഏകദേശം 25 വിവാഹങ്ങൾ നടത്തിയിട്ടുണ്ടെന്നും റിപ്പോർട്ടിൽ പറയുന്നു. കുറ്റക്കാരനാണെന്ന് കണ്ടെത്തിയാൽ പ്രഖറിന് നിയമപ്രകാരം ഏറ്റവും കടുത്ത ശിക്ഷ നൽകണമെന്നാണ് എംഎൽഎയുടെ ആവശ്യം.
Comments