തിരുവനന്തപുരം: എൻഫോഴ്സ്മെന്റ് ഡയറക്ടറേറ്റ് (ഇ.ഡി) അന്വേഷണവുമായി ബന്ധപ്പെട്ട് തനിക്കെതിരെ പുറത്തുവന്ന വാര്‍ത്തകള്‍ക്കെതിരെ കടുത്ത പ്രതികരണവുമായി മുൻ മന്ത്രി മുഹമ്മദ് റിയാസ് രംഗത്ത്. തന്നെ വ്യക്തിപരമായി തേജോവധം ചെയ്യാനുള്ള ബോധപൂർവ്വമായ നീക്കമാണ് മാധ്യമങ്ങളിലൂടെ നടക്കുന്നതെന്ന് അദ്ദേഹം തുറന്നടിച്ചു. ഫേസ്ബുക്ക് പോസ്റ്റിലൂടെയാണ് റിയാസ് തന്റെ നിലപാട് വ്യക്തമാക്കിയത്.
ഇ.ഡി അന്വേഷണത്തിന്റെ പേരില്‍ മാധ്യമങ്ങളില്‍ വരുന്ന വാര്‍ത്തകള്‍ യാതൊരു യാഥാര്‍ത്ഥ്യവുമില്ലാത്ത അസംബന്ധങ്ങളാണ്. ഇ.ഡിക്ക് മുന്നില്‍ വെച്ച് ഇത്തരം കാര്യങ്ങള്‍ വീണ സമ്മതിച്ചു എന്ന തരത്തിലുള്ള വാര്‍ത്തകള്‍ തികഞ്ഞ പച്ചക്കള്ളമാണെന്നും അദ്ദേഹം ആവര്‍ത്തിച്ചു. വാര്‍ത്തകള്‍ ചോര്‍ത്തി നല്‍കി വ്യക്തികളെ വേട്ടയാടി ആനന്ദം കണ്ടെത്തുന്നവരുടെ രീതികളെ അദ്ദേഹം കടുത്ത ഭാഷയിൽ ചോദ്യം ചെയ്തു.
മുഹമ്മദ് റിയാസിന്റെ ഫേസ്ബുക്ക് കുറിപ്പിന്റെ പൂര്‍ണ്ണരൂപം
"ഇന്നത്തെ മാധ്യമങ്ങളിൽ ഇഡി അന്വേഷണവുമായി ബന്ധപ്പെട്ടു പുതിയ അസംബന്ധങ്ങൾ ഉണ്ട്. ഇഡി ചോർത്തിക്കൊടുത്ത റിപ്പോർട്ടിൽ അത്തരം കാര്യങ്ങൾ ഉണ്ടെങ്കിൽ, അത് എന്നെ വ്യക്തിഹത്യ ചെയ്യാൻ ലക്ഷ്യമിട്ട് ബോധപൂർവ്വം മെനഞ്ഞ കള്ളക്കഥയാണ്. ഇത്തരം കാര്യങ്ങൾ വീണ ഇഡിക്കു മുന്നിൽ സമ്മതിച്ചു എന്ന് ഇഡി ചോർത്തി നൽകിയ വാർത്തയിൽ പറയുന്നുണ്ട്. ഇത് പച്ചക്കള്ളമാണ്. ഇഡി അന്വേഷണം എന്ന പേരിൽ ചോർത്തിക്കൊടുത്ത ഇത്തരം അസംബന്ധ വിവരങ്ങളിലൂടെ ജീവിക്കുന്ന മനുഷ്യരുടെ പച്ച ഇറച്ചി തിന്ന് രസിക്കുന്നവരുടെ ആട്ടം തുടരട്ടെ."
Comments