'രാമൻ ധനികരുടെ ദൈവം, ശിവൻ പാവങ്ങളുടെ ദൈവം'; രേവന്ത് റെഡ്ഡി ദൈവങ്ങളെയും രാഷ്ട്രീയവത്ക്കരിക്കുന്നു എന്ന് ബിജെപി

ഹൈദരാബാദ്: ഹിന്ദു ദൈവങ്ങളായ ശ്രീരാമനെയും ശിവനെയും സംബന്ധിച്ച പരാമർശങ്ങളിലൂടെ തെലങ്കാന മുഖ്യമന്ത്രി രേവന്ത് റെഡ്ഡി വലിയ രാഷ്ട്രീയ വിവാദത്തിന് തിരികൊളുത്തി. അതേസമയം, രാഷ്ട്രീയ നേട്ടങ്ങൾക്കായി റെഡ്ഡി സമൂഹത്തെ ഭിന്നിപ്പിക്കാൻ ശ്രമിക്കുന്നുവെന്ന് ആരോപിച്ച് ബിജെപി ഇതിനെതിരെ ശക്തമായി രംഗത്തെത്തി.

ദേശീയ തലസ്ഥാനത്ത് നടന്ന ഒരു മാധ്യമ പരിപാടിയിൽ, ബിജെപി പതിവായി ഉപയോഗിക്കുന്ന "ജയ് ശ്രീ റാം" എന്ന മുദ്രാവായകത്തെ ചോദ്യം ചെയ്ത രേവന്ത് റെഡ്ഡി, എന്തുകൊണ്ടാണ് പ്രധാനമന്ത്രി നരേന്ദ്ര മോദിയും ബിജെപി നേതാക്കളും "ഹർ ഹർ മഹാദേവ്" എന്ന് ജപിക്കാത്തതെന്നും ചോദിച്ചു. ദേശീയ തലസ്ഥാനത്ത് നടന്ന ഒരു മാധ്യമ പരിപാടിയിൽ, ബിജെപി പതിവായി ഉപയോഗിക്കുന്ന "ജയ് ശ്രീ റാം" എന്ന മുദ്രാവാക്യത്തെ ചോദ്യം ചെയ്ത രേവന്ത് റെഡ്ഡി, എന്തുകൊണ്ടാണ് പ്രധാനമന്ത്രി നരേന്ദ്രമോഡിയും ബിജെപി നേതാക്കളും "ഹർ ഹർ മഹാദേവ്" എന്ന് ജപിക്കാത്തതെന്നും ചോദിച്ചു.

"ഞങ്ങൾ ദ്രാവിഡരാണ്; അവർ ആര്യന്മാരാണ്. ഞങ്ങൾ ശിവന്റെ ഭക്തരാണ്, അതേസമയം അവർ ശ്രീരാമന്റെ ഭക്തരാണ്," റെഡ്ഡി പറഞ്ഞു. ശിവനെ "പാവങ്ങളുടെ ദൈവമെന്നും" രാമനെ "ധനികരുടെ ദൈവമെന്നും" അദ്ദേഹം വിശേഷിപ്പിച്ചു. എങ്കിലും രണ്ട് ദൈവങ്ങളെയും ജനങ്ങൾ ആരാധിക്കുന്നുണ്ടെന്നും അദ്ദേഹം കൂട്ടിച്ചേർത്തു. ഉത്തരേന്ത്യയും ദക്ഷിണേന്ത്യയും തമ്മിലുള്ള രാഷ്ട്രീയ സംസ്കാരങ്ങളിൽ വലിയ വ്യത്യാസങ്ങളുണ്ടെന്ന വാദത്തെ പിന്തുണച്ചുകൊണ്ടാണ് അദ്ദേഹത്തിന്റെ ഈ പരാമർശങ്ങൾ വന്നത്.

അതേസമയം, രേവന്ത് റെഡ്ഡി ഭക്തർക്കിടയിൽ രാഷ്ട്രീയ ഭിന്നത ഉണ്ടാക്കുന്നുവെന്ന് ആരോപിച്ച് ബിജെപി നേതാവും കേന്ദ്രമന്ത്രിയുമായ ബന്ദി സഞ്ജയ് കുമാർ രേവന്ത് റെഡ്ഡിയുടെ പ്രസ്താവനയ്ക്ക് ശക്തമായ മറുപടി നൽകി. ബിജെപി നേതാക്കൾ ശിവനെ വിളിക്കുന്നില്ലെന്ന റെഡ്ഡിയുടെ അവകാശവാദത്തെ പ്രതിരോധിക്കാൻ, കാശി വിശ്വനാഥ ക്ഷേത്രവുമായുള്ള പ്രധാനമന്ത്രി മോദിയുടെ ബന്ധവും തെലങ്കാനയിലെ ശ്രീ രാജ രാജേശ്വര സ്വാമി ക്ഷേത്ര സന്ദർശനവും ബന്ദി സഞ്ജയ് എടുത്തുപറഞ്ഞു.

"മുസ്ലീം എന്നാൽ കോൺഗ്രസാണ്, കോൺഗ്രസ് എന്നാൽ മുസ്ലീമാണെന്ന് മുമ്പ് പറഞ്ഞ രേവന്ത് റെഡ്ഡി ഇപ്പോൾ ശ്രീരാമനും ശിവനുമിടയിൽ രാഷ്ട്രീയ അതിർത്തികൾ വരയ്ക്കുകയാണ്. വെമുലവാഡയിൽ ദക്ഷിണ കാശിയും ഭദ്രാചലത്തിൽ ദക്ഷിണ അയോദ്ധ്യയുമുള്ള തെലങ്കാനയുടെ മുഖ്യമന്ത്രിയായ റെഡ്ഡി, ശ്രീരാമനെയും ശിവനെയും വടക്കും തെക്കുമായി വിഭജിക്കാതിരിക്കാൻ ശ്രദ്ധിക്കണമായിരുന്നു," മന്ത്രി പറഞ്ഞു. രാഷ്ട്രീയ നേട്ടങ്ങൾക്കായി കോൺഗ്രസ് മതപരവും പ്രാദേശികവുമായ സ്വത്വങ്ങൾ ഉപയോഗിക്കുകയാണെന്നും, ഹിന്ദു പാരമ്പര്യങ്ങളെ ഭൂമിശാസ്ത്രപരമായോ സാമൂഹികമായോ വിഭജിക്കരുതെന്നും അദ്ദേഹം റെഡ്ഡിയോട് ആവശ്യപ്പെട്ടു.