കേരളത്തിലുള്ളവര് തന്നെ തിരിച്ചറിയുമെന്ന് ഒരിക്കലും വിചാരിച്ചില്ലെന്നും ഇവിടെയുള്ളവരുടെ സ്നേഹത്തില് വീണുപോയെന്നും മുന് ഇന്ത്യന് ഓള്റൗണ്ടര് ഇര്ഫാന് പത്താന്. ഇവിടുത്തെ ഗ്രാമീണര് പോലും തിരിച്ചറിഞ്ഞത് ഞെട്ടിച്ചെന്നും എപ്പോഴും അവര് സ്നേഹം പ്രകടിപ്പിക്കുന്നവരാണെന്നും താരം പറഞ്ഞു. ടൈംസ് ഓഫ് ഇന്ത്യയ്ക്ക് നല്കിയ അഭിമുഖത്തിലാണ് ഇര്ഫാന് പത്താന് മലയാളികളുടെ സ്നേഹത്തെക്കുറിച്ച് വാചാലനായത്.
വയനാട്, ഈരാറ്റുപേട്ട, തൊടുപുഴ , കോട്ടയം, മൂവാറ്റുപുഴ എന്നിവിടങ്ങളില് വന്നപ്പോഴാണ് മുന് ഇന്ത്യന് താരം മലയാളികളുടെ സ്നേഹം അനുഭവിച്ചറിഞ്ഞത്. അതിന് മുമ്പ് മാരാരിക്കുളത്ത് വന്നപ്പോള് ആള്ക്കാര് ഓടിയെത്തിയത് തന്നെ അമ്പരപ്പിച്ചെന്നും ഇവിടെപോലും താന് അറിയപ്പെടുന്നതില് സന്തോഷം തോന്നിയെന്നും താരം പറഞ്ഞു. മലയാളികളില് താരത്തിന് ഏറെ ഇഷ്ടപ്പെട്ടത് ഇവിടുള്ളവര് അവരുടെ കുടുംബത്തോടും കുടുംബബന്ധത്തോടും അത്തരം മൂലങ്ങള്ക്കും നല്കുന്ന പ്രധാനമ്യമാണ്. മുതിര്ന്നവരെ ആള്ക്കാര് ബഹുമാനിക്കുന്നവരാണെന്നും പറഞ്ഞു. കുടുംബത്തോടൊപ്പം വന്നപ്പോഴാണ് താരത്തിന് മലയാളികളുടെ സംസ്ക്കാരം അടുത്തറിയാന് ഇടയായത്.
അഹങ്കാരം കുറവുള്ളവരാണ് മലയാളികള്. ലോകത്തുടനീളം സഞ്ചരിച്ച തനിക്ക് അത്തരം കാര്യങ്ങള് ഇവിടെ മാത്രമേ കാണാനായിട്ടുള്ളൂ. ആള്ക്കാര് തന്നെ സഹായിക്കാന് ഓടിവന്നെന്നും പരസ്പരം സഹായിച്ചെന്നും പറഞ്ഞു. കേരളത്തിലെ മത്സ്യ വിഭവങ്ങളെക്കുറിച്ചും ഇര്ഫാന് പത്താന് പറഞ്ഞു. റോഡിലൂടെ സഞ്ചരിച്ചതും വഴിയരികിലെ റെസ്റ്റോറന്റില് ഇറങ്ങി മീന് വിഭവങ്ങള് ആസ്വദിച്ചതും താരം ഓര്ക്കുന്നു. കേരളത്തിന്റെ അപ്പവും കുറുമയും താരത്തിന് ഏറെ ഇഷ്ടപ്പെട്ടു. എവിടെ പോയാലും അവിടുത്തെ നാട്ടുഭക്ഷണം രുചിക്കുന്നത് ശീലമാണെന്നും താരം പറഞ്ഞു.
അടുത്ത കാലത്ത് കേരളം ക്രിക്കറ്റില് നടത്തുന്ന മുന്നേത്തെക്കുറിച്ചും താരം അഭിപ്രായം വ്യക്തമാക്കി. രഞ്ജിട്രോഫിയില് കേരളം ക്വാര്ട്ടറില് എത്തിയത് അഭിമാനകരമായ നേട്ടമാണ്. ബേസില് തമ്പിയുമായി ഒരുമിച്ച് കളിച്ചിട്ടുണ്ട്. ബൗളിംഗ് അദ്ദേഹം ഈ രീതിയില് തുടരുകയാണെങ്കില് നന്നായി മെച്ചപ്പെടും. സഞ്ജു സാംസണും മികച്ച ഭാവിയുണ്ട്. ശരിയായ ഉപദേശം കിട്ടുകയാണെങ്കില് അദ്ദേഹം ദീര്ഘകാലം മുമ്പോട്ട് പോകും. സച്ചിന് ബേബിയെപ്പോലെ പുതിയ പ്രതിഭകളും മുതല്ക്കൂട്ടാണ്. ഇവരെ മാതൃകയാക്കിയാല് കൂടുതല് കുട്ടികള്ക്ക് മുന്നില് ഇന്ത്യന് ടീമിന്റെ വാതില് തുറക്കപ്പെടുമെന്നും അടുത്ത തലമുറ ഈ കളിക്കാരെ മാതൃകയാക്കി പിന്തുടരുമെന്നു തനിക്ക് ഉറപ്പുണ്ടെന്നും ഇര്ഫാന് പത്താന് പറഞ്ഞു.
