കോട്ടയം : വെന്തുരുകി കേരളം. പൊള്ളുന്ന ചൂടില് പാലക്കാടിനും പുനലൂരിനും മേലെ കോട്ടയം. ഇന്നലെ കോട്ടയത്തു രേഖപ്പെടുത്തിയത് 38.5 ഡിഗ്രി സെല്ഷ്യസ് ചൂട്. കോട്ടയത്ത് ഇതുവരെ മാര്ച്ചില് രേഖപ്പെടുത്തിയതില് ഏറ്റവും ഉയര്ന്ന താപനിലയാണ് ഇത്. 2004 മാര്ച്ച് ഒന്പതിനാണ് മുമ്പു കോട്ടയത്ത് 38.5 ഡിഗ്രി രേഖപ്പെടുത്തിയത്. സംസ്ഥാനത്ത് പുനലൂരിലും പാലക്കാട്ടും കോഴിക്കോട്ടും കണ്ണൂരും മാത്രമാണ് ഇത്രയും ഉയര്ന്ന തോതിലോ അതിനു മുകളിലോ താപനില രേഖപ്പെടുത്തിയിട്ടുള്ളത്.
വ്യാഴാഴ്ചയിലെ 35.5-ല്നിന്നു മൂന്നു ഡിഗ്രി കൂടിയാണ് 38.5 ലെത്തിയത്. കാലാവസ്ഥാ നിരീക്ഷണകേന്ദ്രത്തിന്റെ കണക്കുപ്രകാരം തൃശൂര് വെള്ളാനിക്കരയിലും 38.5 ഡിഗ്രിയായിരുന്നു ചൂട്. പൊതുവേ ചൂടു കൂടുതല് രേഖപ്പെടുത്തുന്ന പാലക്കാട്ട് ഇതേസമയം 36.9 ഡിഗ്രിയും പുനലൂരില് 37.4 ഡിഗ്രിയുമായിരുന്നു താപനില. ഒറ്റ ദിവസം കൊണ്ടു മൂന്നു ഡിഗ്രി ചൂട് വര്ധിച്ചത് അപൂര്വ പ്രതിഭാസമാണെന്നും വരും ദിവസങ്ങളില് ചൂടിന്റെ അളവില് നേരിയ കുറവിനു സാധ്യതയുണ്ടെന്നും കാലാവസ്ഥാ നിരീക്ഷണകേന്ദ്രം ഡയറക്ടര് സുദേവന് പറഞ്ഞു. കോട്ടയത്തു താപനിലയില് ശരാശരി 2.5 ഡിഗ്രിയുടെയും ആലപ്പുഴയില് 2.7 ഡിഗ്രിയുടെയും വര്ധനയുണ്ട്.
ഇതുവരെയുള്ള കണക്കുപ്രകാരം സംസ്ഥാനത്ത് ഏറ്റവും ഉയര്ന്ന ചൂട് രേഖപ്പെടുത്തിയത് 2016 ല് പാലക്കാട് ജില്ലയിലെ മലമ്പുഴയിലാണ്, 41.9 ഡിഗ്രി സെല്ഷ്യസ്. നിലവിലെ അവസ്ഥ തുടര്ന്നാല് ഇത്തവണ റെക്കോഡ് ഭേദിക്കുമെന്നാണ് കാലാവസ്ഥാ നിരീക്ഷകരുടെ കണക്കുകൂട്ടല്.ശക്തമായ വേനല്മഴയ്ക്ക് ഏപ്രില് പകുതിവരെ കാത്തിരിക്കേണ്ടി വരും. ഇപ്പോള് മഴ പെയ്താലും തെക്കന് ജില്ലകളില് പെയ്തുമാറാനാണ് സാധ്യത. രാത്രി താപനിലയിലും വര്ധനയുണ്ടായിട്ടുണ്ട്.
ആലപ്പുഴയിലും കോട്ടയത്തും രാത്രി താപനിലയില് ഒരു ഡിഗ്രിക്കു മുകളിലാണു വര്ധന. അതേസമയം, പകല്, രാത്രി താപനിലകളിലെ വര്ധന ഉഷ്ണതരംഗത്തിന് ഇടയാക്കുമോയെന്നും ആശങ്കയുണ്ട്. നിരീക്ഷണ കേന്ദ്രങ്ങളിലെ ചൂട് 40 ഡിഗ്രി കവിയുകയോ രാത്രി താപനിലയില് മൂന്നു ഡിഗ്രിയുടെ വര്ധനയുണ്ടാകുകയോ ചെയ്യുമ്പോഴാണ് ഉഷ്ണതരംഗം ബാധിച്ചതായി പ്രഖ്യാപിക്കുന്നത്. 2016 ഇത്തരത്തില് ഉഷ്ണതരംഗം പ്രഖ്യാപിച്ചിരുന്നു.
